Bombay High Court on uncontested elections : మహారాష్ట్ర స్థానిక సంస్థల ఎన్నికల్లో ఏకగ్రీవాలపై చెలరేగిన రాజకీయ దుమారానికి బాంబే హైకోర్టు తెరదించింది. అధికార ‘మహాయుతి’ కూటమి బలవంతంగా, బెదిరించి నామినేషన్లను ఉపసంహరింపజేస్తోందని, ఈ ఏకగ్రీవాలను రద్దు చేయాలని కోరుతూ దాఖలైన పిటిషన్ను న్యాయస్థానం కొట్టిపారేసింది. అంతేకాకుండా, తప్పుడు వాదనలతో కోర్టు సమయాన్ని వృథా చేశారంటూ పిటిషనర్కు చురకలు అంటించింది.
ప్రస్తుతం మహారాష్ట్రలో మున్సిపల్ కార్పొరేషన్ ఎన్నికల ప్రక్రియ కొనసాగుతోంది. ఈ క్రమంలో, పలుచోట్ల అధికార మహాయుతి కూటమి అభ్యర్థులు ఏకగ్రీవంగా ఎన్నికయ్యారు. అయితే, ఈ ఏకగ్రీవాలు స్వచ్ఛందంగా జరగలేదని, అధికార కూటమి నేతలు ఒత్తిడి చేసి, బెదిరించి ప్రతిపక్ష అభ్యర్థుల నామినేషన్లను ఉపసంహరింపజేశారని ప్రతిపక్షాలు ఆరోపించాయి. ఈ ఏకగ్రీవ విజయాలను రద్దు చేయాలని కోరుతూ, ఓ వ్యక్తి బాంబే హైకోర్టులో ప్రజా ప్రయోజన వ్యాజ్యం (PIL) దాఖలు చేశారు.
హైకోర్టు తీవ్ర వ్యాఖ్యలు.. పిటిషనర్కు చురకలు : బుధవారం ఈ పిటిషన్పై విచారణ చేపట్టిన ప్రధాన న్యాయమూర్తి జస్టిస్ ఎస్. చంద్రశేఖర్, జస్టిస్ గౌతమ్ ఎ. అంఖడ్లతో కూడిన ధర్మాసనం, పిటిషనర్ వాదనలను తీవ్రంగా తప్పుబట్టింది.
చట్టబద్ధమే: “ఎన్నికల చట్టాల ప్రకారం, పోటీలో నిలిచిన అభ్యర్థి ఏకగ్రీవంగా ఎన్నికవడం పూర్తిగా చట్టబద్ధం. దీనిని సవాల్ చేయడానికి వీల్లేదు,” అని ధర్మాసనం స్పష్టం చేసింది.
తప్పుడు వాదనలు: తన పిటిషన్, గతంలో విచారించిన మరో పిటిషన్ను పోలి ఉందని పిటిషనర్ ఉదయం కోర్టుకు తప్పుగా నివేదించారని, కానీ ఆ రెండు కేసులకు ఎలాంటి సంబంధం లేదని ధర్మాసనం ఆగ్రహం వ్యక్తం చేసింది.
జరిమానా హెచ్చరిక: “ఇలాంటి నిరాధారమైన ఆరోపణలతో, తప్పుడు వాదనలతో కోర్టు సమయాన్ని వృథా చేస్తే, జరిమానాలు విధిస్తామని” ధర్మాసనం పిటిషనర్ను హెచ్చరించింది. ఈ వ్యాఖ్యలతో, పిటిషన్ను కొట్టివేస్తున్నట్లు న్యాయస్థానం ప్రకటించింది. ఈ తీర్పుతో, మహారాష్ట్ర స్థానిక ఎన్నికల్లో ఏకగ్రీవంగా ఎన్నికైన అభ్యర్థులకు న్యాయపరమైన అడ్డంకులు తొలగిపోయినట్లయింది.