Income tax slab revision Budget 2026 : జీతం పెరుగుతున్నా, చేతిలో డబ్బులు మిగలడం లేదు.. ద్రవ్యోల్బణం దెబ్బకు కొనుగోలు శక్తి పడిపోతోంది.. వచ్చిన ఆదాయంలో అధిక భాగం పన్నులకే పోతోంది! ఇది దేశంలోని కోట్లాది మంది మధ్యతరగతి ప్రజల ఆవేదన. రాబోయే కేంద్ర బడ్జెట్ (2026)పై వారంతా భారీ ఆశలతో ఎదురుచూస్తున్నారు. ముఖ్యంగా, ఆదాయపు పన్ను (Income Tax) విధానంలో, 30% పన్ను శ్లాబులో మార్పులు రావాలని బలంగా కోరుకుంటున్నారు. 

ప్రస్తుత పన్ను విధానం, పెరుగుతున్న ధరలకు, జీవన వ్యయానికి అనుగుణంగా లేదన్నది ప్రధాన విమర్శ. ప్రస్తుత స్లాబుల ప్రకారం, ఆదాయం ఓ పరిమితి దాటగానే, సంపాదనలో దాదాపు మూడో వంతు (30%) పన్ను రూపంలో ప్రభుత్వానికి చెల్లించాల్సి వస్తోంది.

‘బ్రాకెట్ క్రీప్’ సమస్య: ధరలు, ద్రవ్యోల్బణం ఏటా పెరుగుతున్నా, ఆదాయపు పన్ను మినహాయింపు పరిమితులు, స్లాబులు మాత్రం ఏళ్ల తరబడి అవే ఉంటున్నాయి. దీనినే ఆర్థిక నిపుణులు ‘బ్రాకెట్ క్రీప్’ అంటారు. దీనివల్ల, జీతం కాగితంపై పెరిగినట్లు కనిపించినా, పన్ను పోగా చేతికి వచ్చే నిజ ఆదాయం మాత్రం పెరగడం లేదు.

నిపుణుల సూచన.. ప్రజల డిమాండ్ : ఈ సమస్యకు పరిష్కారంగా, 30% పన్ను శ్లాబు పరిమితిని ప్రస్తుతం ఉన్న దానికంటే గణనీయంగా పెంచాలని డిమాండ్ వినిపిస్తోంది. “ప్రస్తుతం ఉన్న 30% స్లాబును కనీసం రూ.35 లక్షల వార్షిక ఆదాయం వరకు పెంచాలి. అప్పుడే మధ్యతరగతి ప్రజల చేతిలో ఖర్చు చేయడానికి, పొదుపు చేయడానికి తగినంత డబ్బు మిగులుతుంది,” అని పన్ను నిపుణులు అభిప్రాయపడుతున్నారు. ట్యాక్స్ స్లాబులను ‘వినియోగదారుల ధరల సూచీ’ (Consumer Price Index)తో అనుసంధానించడం ద్వారా, ఏటా ద్రవ్యోల్బణానికి అనుగుణంగా స్లాబులు వాటంతట అవే మారేలా చూడాలని సూచిస్తున్నారు.

ప్రభుత్వానికి లాభమా? నష్టమా : పన్ను స్లాబులను మార్చడం వల్ల ప్రభుత్వానికి ప్రత్యక్ష పన్నుల రూపంలో ఆదాయం కొంత తగ్గినా, పరోక్షంగా ఆర్థిక వ్యవస్థకు ఎంతో మేలు జరుగుతుందని నిపుణులు విశ్లేషిస్తున్నారు.  ప్రజల చేతిలో డబ్బులు ఎక్కువగా ఉంటే, కార్లు, ఎలక్ట్రానిక్స్ వంటి వస్తువుల కొనుగోళ్లు పెరుగుతాయి. దీనివల్ల జీఎస్టీ రూపంలో ప్రభుత్వానికి పరోక్ష పన్నుల ఆదాయం పెరుగుతుంది. ప్రజలు పొదుపు చేసిన డబ్బును ఫిక్స్‌డ్ డిపాజిట్లు, మ్యూచువల్ ఫండ్లలో పెట్టుబడిగా పెడతారు. ఇది దేశ ఆర్థిక వృద్ధికి దోహదపడుతుంది.

పన్ను చెల్లింపుల్లో నిజాయితీ: పన్ను భారం తగ్గితే, ప్రజలు పన్ను ఎగవేతకు పాల్పడకుండా, నిజాయితీగా చెల్లించే అవకాశం పెరుగుతుంది. ఉద్యోగులు, వ్యాపారులు, రిటైర్ అయిన వారు.. ఇలా అన్ని వర్గాల వారూ ఈ పన్నుల భారం నుంచి ఊరట కోసం ఆశగా ఎదురుచూస్తున్నారు. గృహ రుణ వడ్డీపై ఇచ్చే మినహాయింపు పరిమితిని (సెక్షన్ 24బి) కూడా పెంచాలని కోరుతున్నారు. మరి, ఆర్థిక మంత్రి నిర్మలా సీతారామన్, రాబోయే బడ్జెట్‌లో సామాన్యుడి ఆశలను నెరవేరుస్తారో లేదో వేచి చూడాలి.