Delhi: భారతదేశంలో ఏకధాటిగా 24 గంటలూ పనిచేసే ఒకే ఒక్క ప్రదేశం ఉందంటే.. అది ఢిల్లీలోని ఇందిరా గాంధీ అంతర్జాతీయ విమానాశ్రయం (DEL). ఇది కేవలం విమానాలు వచ్చి వెళ్లే చోటు కాదు, ఇది దేశ ఆర్థిక వ్యవస్థ, వాణిజ్యం మరియు పర్యాటకానికి గేట్‌వేగా పనిచేసే ఒక చలనం లేని మినీ-సిటీ. రాత్రి పగలు తేడా లేకుండా విమానాల రణగొణ ధ్వనులు, లక్షలాది మంది ప్రయాణికుల సందడితో ఇది నిత్యం ఉల్లాసంగా ఉంటుంది.

అగ్రస్థానంలో ఢిల్లీ
ఢిల్లీ విమానాశ్రయం భారతదేశంలో ప్రయాణికుల రద్దీ, విమానాల రాకపోకలు ఈ రెండింటిలోనూ తిరుగులేని అగ్రస్థానాన్ని కలిగి ఉంది. దీని ఘనత కేవలం దేశానికే పరిమితం కాలేదు. ప్రపంచంలోని టాప్ 10 అత్యంత రద్దీగల విమానాశ్రయాల జాబితాలో చోటు దక్కించుకోవడం ద్వారా, భారతీయ విమానయాన రంగం శక్తిని ప్రపంచానికి చాటింది.ఈ విమానాశ్రయం సంవత్సరానికి 7.2 కోట్ల కంటే ఎక్కువ మంది ప్రయాణికులను నిర్వహిస్తుంది.ప్రపంచవ్యాప్తంగా 140కి పైగా గమ్యస్థానాలకు కనెక్టివిటీ కల్పిస్తూ, భారతదేశానికి ప్రధాన ద్వారంగా నిలుస్తోంది.ఇక్కడ ఉన్న ఐకానిక్ టర్మినల్ 3 అంతర్జాతీయ విమానాలకు ప్రపంచ స్థాయి సౌకర్యాలతో ఒక గమ్యస్థానం కంటే తక్కువేం కాదు. “ఆసియా-పసిఫిక్‌లో అత్యుత్తమ విమానాశ్రయం” వంటి ఎన్నో ప్రతిష్టాత్మక అవార్డులను గెలుచుకుంది.ఈ విమానాశ్రయం కేవలం ప్రయాణ సౌకర్యానికే కాకుండా, వేలాది మందికి ఉద్యోగాలు కల్పిస్తూ, జాతీయ వాణిజ్యం ,పర్యాటకానికి భారీ ప్రోత్సాహాన్ని ఇస్తోంది.

పోటీలో ఇతర భారతీయ దిగ్గజాలు
ఢిల్లీ టాప్‌లో ఉన్నప్పటికీ, దేశంలోని ఇతర ప్రధాన నగరాల విమానాశ్రయాలు కూడా అభివృద్ధిలో ఏమాత్రం వెనుకబడి లేవు.

ముంబై (CSMIA): దేశంలో రెండవ అత్యంత రద్దీగల విమానాశ్రయంగా, ముంబైలోని ఛత్రపతి శివాజీ మహారాజ్ అంతర్జాతీయ విమానాశ్రయం సంవత్సరానికి 5.5 కోట్లకు పైగా ప్రయాణికులను హ్యాండిల్ చేస్తూ పశ్చిమ భారతదేశానికి ముఖ్యమైన అంతర్జాతీయ కేంద్రంగా ఉంది.

బెంగళూరు (KIA): మూడవ స్థానంలో ఉన్న కెంపెగౌడ అంతర్జాతీయ విమానాశ్రయం, ఐటీ, వ్యాపార రంగాలకు కీలకమైనది. ఇక్కడి కొత్త ‘గార్డెన్ టర్మినల్’ (T2) పచ్చదనం , పర్యావరణ అనుకూల డిజైన్‌తో ప్రత్యేక ఆకర్షణగా నిలుస్తోంది.

హైదరాబాద్ (RGIA): నాలుగవ స్థానంలో ఉన్న రాజీవ్ గాంధీ అంతర్జాతీయ విమానాశ్రయం పరిశుభ్రత మరియు పంక్చువాలిటీ (సమయపాలన)కి ప్రసిద్ధి చెందింది.

కోల్‌కతా (NSCBI): తూర్పు భారతదేశానికి ప్రధాన ద్వారంగా ఉన్న నేతాజీ సుభాష్ చంద్రబోస్ అంతర్జాతీయ విమానాశ్రయం కూడా టాప్ 5 జాబితాలో ఉంది.

ఈ విమానాశ్రయాలన్నీ కలిసి భారతదేశాన్ని ప్రపంచంతో మరింత బలంగా అనుసంధానిస్తున్నాయి, దేశ ఏవియేషన్ రంగానికి వెన్నెముకగా నిలుస్తున్నాయి.