Free Book Bank Initiative : ఒక చిన్న ఆలోచన.. వేల జీవితాల్లో వెలుగులు నింపింది. ఖరీదైన పుస్తకాలు కొనలేక చదువు మానేసే పరిస్థితి నుంచి.. ఉచితంగా పాఠ్యపుస్తకాలు పొందే ‘దారి’ చూపింది. నర్సరీ చిన్నారుల నుంచి ఐఏఎస్, నీట్, జేఈఈ వంటి కఠినమైన పోటీ పరీక్షలకు సన్నద్ధమయ్యే అభ్యర్థుల వరకు అందరికీ అక్షర ఆయుధాలను అందిస్తోంది ఓ మహిళ. తన ఇంటి పనిమనిషి కష్టం చూడలేక మొదలుపెట్టిన ఒక చిన్న ప్రయత్నం.. నేడు దేశవ్యాప్తంగా విస్తరించి ‘వే ఆఫ్ లైఫ్’ (Way of Life) అనే మహోద్యమంగా మారింది. హరియాణాకు చెందిన ఛార్టర్డ్ అకౌంటెంట్ (CA) ప్రియాంకా గార్గ్ స్ఫూర్తిదాయక ప్రస్థానంపై ప్రత్యేక కథనం.
ఆవేదన నుంచి పుట్టిన ఆలోచన : భారతదేశంలో పేదరికం కారణంగా ఎంతోమంది విద్యార్థులు మధ్యలోనే బడి మానేస్తున్నారు. హరియాణాలోని ఫరీదాబాద్లో నివాసముంటున్న సీఏ ప్రియాంకా గార్గ్కు సరిగ్గా ఇలాంటి అనుభవమే ఎదురైంది. కొన్నేళ్ల క్రితం తన ఇంట్లో పనిచేసే మహిళ.. “మేడమ్, నా పిల్లలు స్కూలుకు వెళ్లాలంటే పుస్తకాలు కావాలి.. కొనడానికి డబ్బుల్లేవు” అని ఆవేదన వ్యక్తం చేసింది. ఆ సమయంలో ప్రియాంక వద్ద చిన్నపిల్లల పుస్తకాలు లేనప్పటికీ, ఆ తల్లి ఆవేదన ఆమెను ఆలోచింపజేసింది. ఎలాగైనా సాయం చేయాలని సంకల్పించారు.
వాట్సాప్ గ్రూపే వేదికగా : ప్రియాంక తాను నివసిస్తున్న హౌసింగ్ సొసైటీ వాట్సాప్ గ్రూప్లో ఒక మెసేజ్ పెట్టారు. “నా దగ్గర పనిచేసే ఆమె పిల్లలకు పాత పుస్తకాలు కావాలి.. ఎవరి దగ్గరైనా ఉంటే ఇవ్వండి” అని కోరారు. ఆశ్చర్యకరంగా సొసైటీలోని చాలామంది స్పందించడమే కాకుండా, తమ ఇళ్లలో పనిచేసే వారికి కూడా పుస్తకాల అవసరం ఉందని బదులిచ్చారు. దీంతో ఇది కేవలం ఒకరిద్దరి సమస్య కాదని ప్రియాంక గ్రహించారు. ఈ సమస్యకు పరిష్కారంగా 2018లో ‘వే ఆఫ్ లైఫ్’ అనే స్వచ్ఛంద సంస్థకు అంకురార్పణ చేశారు.
అడ్డంకులు ఎదురైనా.. ఇల్లే గ్రంథాలయమైంది : దాతల నుంచి సేకరించిన పుస్తకాలను తొలుత తమ హౌసింగ్ సొసైటీలోని కమ్యూనిటీ హాల్లో భద్రపరిచేవారు. అయితే, దీనిపై కొందరు సభ్యులు అభ్యంతరం వ్యక్తం చేయడంతో ప్రియాంక వెనకడుగు వేయలేదు. తన ఇంటినే బుక్ బ్యాంక్గా మార్చేశారు. తన ఇంటి తలుపులే గ్రంథాలయ ద్వారాలుగా చేసి పేద విద్యార్థులకు స్వాగతం పలికారు.
దిల్లీ టు ఆఫ్రికా.. విస్తరిస్తున్న సేవలు : కేవలం పేద విద్యార్థులే కాదు.. ప్రైవేటు, ఇంటర్నేషనల్ స్కూల్స్, చివరకు ఇంటెలిజెన్స్ బ్యూరో అధికారుల పిల్లలు సైతం ఇక్కడి నుంచి పుస్తకాలు తీసుకెళ్తున్నారు.
రాష్ట్రాలకతీతంగా: దిల్లీ-ఎన్సీఆర్, కర్ణాటక, ఉత్తరప్రదేశ్, అసోం, బిహార్, అరుణాచల్ ప్రదేశ్ వంటి రాష్ట్రాల నుంచి తల్లిదండ్రులు పుస్తకాల కోసం ప్రియాంకను సంప్రదిస్తున్నారు.
ఖండాలు దాటి: ఆఫ్రికాలోని ఘనా దేశం నుంచి కూడా పుస్తకాల కోసం విజ్ఞప్తులు వస్తుండటం విశేషం. అయితే రవాణా ఖర్చులు భరించే దాతలు ముందుకు వస్తే విదేశీ విద్యార్థులకూ సాయం చేస్తానని ప్రియాంక చెబుతున్నారు.
పుస్తకాలు పొందడం ఎలా : ఫరీదాబాద్లోని ఈ బుక్ బ్యాంక్ నుంచి పుస్తకాలు కావాల్సిన విద్యార్థులు తమ ఆధార్ కార్డు, స్కూల్ ఐడీ కార్డు జిరాక్స్ కాపీలను సమర్పించి ఉచితంగా పుస్తకాలు పొందవచ్చు. ప్రస్తుతం 100 మందికి పైగా వలంటీర్లు ఈ యజ్ఞంలో ప్రియాంకకు తోడుగా నిలుస్తున్నారు. పుస్తకాల కొరత వల్ల ఏ ఒక్క విద్యార్థీ చదువుకు దూరం కాకూడదన్నదే తన లక్ష్యమని ప్రియాంకా గార్గ్ స్పష్టం చేశారు. ప్రభుత్వం నుంచి సహకారం లభిస్తే మరిన్ని అద్భుతాలు చేయగలమని ఆమె ఆశాభావం వ్యక్తం చేశారు.