CBI crackdown on SIM card fraud : మీ ఫోన్‌కు వచ్చే మోసపూరిత కాల్స్, సందేశాల వెనుక ఎవరున్నారో ఎప్పుడైనా ఆలోచించారా? ఆ సైబర్ నేరగాళ్లకు వేలకొద్దీ సిమ్ కార్డులు ఎక్కడి నుంచి వస్తున్నాయి? ఈ ప్రశ్నల మూలాల్లోకి వెళ్లిన కేంద్ర దర్యాప్తు సంస్థ (సీబీఐ), దేశవ్యాప్తంగా సంచలనం సృష్టించిన ఓ కీలక అరెస్టును నమోదు చేసింది. సైబర్ నేరగాళ్లకు అక్రమంగా సిమ్‌లు అమ్ముతున్న ఓ ప్రముఖ టెలికాం సంస్థ ఏరియా సేల్స్ మేనేజర్‌ను సీబీఐ అధికారులు అదుపులోకి తీసుకున్నారు. అసలు ఈ మోసం ఎలా జరిగింది? కంచే చేను మేసిన ఈ వ్యవహారం ఎలా బయటపడింది?

దేశంలో పెరిగిపోతున్న సైబర్ నేరాల మూలాలపై దెబ్బకొట్టే లక్ష్యంతో, సీబీఐ ‘ఆపరేషన్ చక్ర-V’ పేరుతో దేశవ్యాప్తంగా దాడులు నిర్వహిస్తోంది. ఇందులో భాగంగా, సైబర్ నేరగాళ్లకు అండగా నిలుస్తున్న వారిపై ఉచ్చు బిగించింది. సైబర్ నేరగాళ్లు ఉపయోగిస్తున్న సిమ్ కార్డుల మూలాలను శోధించగా, ఢిల్లీకి చెందిన ఓ టెలికాం సర్వీస్ ప్రొవైడర్ అధికారి పాత్ర ఉన్నట్లు సీబీఐ గుర్తించింది. పక్కా ఆధారాలతో, గురువారం ఢిల్లీలో వొడాఫోన్ ఏరియా సేల్స్ మేనేజర్‌గా పనిచేస్తున్న బిను విద్యాధరన్‌ను సీబీఐ అధికారులు అరెస్ట్ చేశారు.

మోసం జరిగిందిలా : బిను విద్యాధరన్, తన పదవిని అడ్డం పెట్టుకుని ఈ అక్రమాలకు పాల్పడినట్లు సీబీఐ దర్యాప్తులో తేలింది. టెలికాం శాఖ (DoT) నిబంధనలను ఉల్లంఘించి, అక్రమంగా, ఎలాంటి సరైన ధ్రువీకరణ పత్రాలు లేకుండా బల్క్ సిమ్‌ కార్డులను జారీ చేయడంలో ఈ అధికారి కీలక పాత్ర పోషించారు.ఈ విధంగా పొందిన వందలాది సిమ్ కార్డులను, అధిక ధరకు సైబర్ నేరగాళ్ల ముఠాలకు విక్రయించేవాడని సీబీఐ గుర్తించింది. ఈ సిమ్ కార్డులనే ఉపయోగించి, నేరగాళ్లు దేశవ్యాప్తంగా వేలాది మందిని మోసం చేసి, కోట్లాది రూపాయలు కొల్లగొట్టినట్లు అధికారులు తెలిపారు.

‘ఆపరేషన్ చక్ర-V’ లక్ష్యం : ‘ఆపరేషన్ చక్ర-V’ లక్ష్యం కేవలం చిల్లర దొంగలను పట్టుకోవడం కాదు. సైబర్ నేరాలకు వెన్నెముకగా నిలుస్తున్న వ్యవస్థలనే కూకటివేళ్లతో పెకిలించడం. సిమ్ కార్డులు, బ్యాంకు ఖాతాలు, పేమెంట్ గేట్‌వేలు వంటి మౌలిక సదుపాయాలను నేరగాళ్లకు అందిస్తున్న వారిపై ఉక్కుపాదం మోపడమే ఈ ఆపరేషన్ ముఖ్య ఉద్దేశం. ఈ అరెస్ట్, సైబర్ నేరాల నిర్మూలనలో ఓ కీలక ముందడుగని, ఈ నెట్‌వర్క్‌తో సంబంధం ఉన్న మరికొందరి కోసం గాలిస్తున్నామని సీబీఐ వర్గాలు స్పష్టం చేస్తున్నాయి.