భారత ప్రభుత్వం సామాన్యులకు భారీ ఊరట కలిగించే నిర్ణయం తీసుకుంది. వంట నూనె ధరలపై భారం తగ్గేలా కీలక ఆదేశాలు జారీ చేసింది. వంటనూనెలపై కస్టమ్స్ డ్యూటీ తగ్గించినప్పటికీ, కంపెనీలు దీని లాభాలను వినియోగదారులకు చేరవేయడంలో వెనుకంజ వేస్తున్నాయన్న కారణంతో కేంద్రం రంగంలోకి దిగింది. తక్షణమే ధరలను తగ్గించాలని ఆయిల్ కంపెనీలకు ఆదేశాలు ఇచ్చింది.
కేంద్రం ఇటీవల పామ్ ఆయిల్, సన్‌ఫ్లవర్ ఆయిల్, సోయాబీన్ ఆయిల్ వంటి దిగుమతి వంట నూనెలపై బేసిక్ కస్టమ్స్ డ్యూటీని 20 శాతం నుంచి 10 శాతానికి తగ్గించింది. మే 31న తీసుకున్న ఈ నిర్ణయం దేశీయంగా నూనె ధరలు తగ్గేందుకు దోహదపడాల్సి ఉండగా, మార్కెట్‌లో మాత్రం పెద్దగా మార్పులు కనిపించలేదు. ఈ నేపథ్యంలో వినియోగదారుల వ్యవహారాల విభాగం సాల్వెంట్ ఎక్స్‌ట్రాక్టర్స్ అసోసియేషన్ (SEA)కు లేఖ రాసింది. తక్కువ డ్యూటీ ప్రయోజనాన్ని వినియోగదారులకు చౌక ధరల రూపంలో అందించాలంటూ స్పష్టంగా పేర్కొంది.
అంతేకాదు ప్రతి వారం బ్రాండ్ వారీగా ఎంఆర్‌పీ వివరాలను తెలియజేయాలనీ, వాటిని ప్రభుత్వానికి నివేదించాలన్న షరతు కూడా విధించింది. ఈ వ్యవస్థతో ధరలపై నియంత్రణ సాధించే అవకాశం ఉంది. ఈ ఆదేశాలపై SEA కూడా స్పందించింది. ఇప్పటికే తాము సభ్య సంస్థలకు సుంకాల తగ్గింపుతో ధరలు తగ్గించాలని సూచించినట్లు తెలిపింది. అయితే కొన్ని కంపెనీలు పాత ధరలకే కొన్న నూనె స్టాక్‌ను అమ్ముతున్నాయని, ఈ కారణంగా పూర్తిస్థాయి ధరల తగ్గుదల కనపడడానికి మరికొన్ని వారాలు పట్టవచ్చని పేర్కొంది. ప్రస్తుతానికి 7 లక్షల నుంచి 8 లక్షల టన్నుల వరకు పాత రేట్లకు కొనుగోలు చేసిన వంటనూనె నిల్వలు ఉన్నట్లు వెల్లడించింది.
మరోవైపు ఆయిల్ పరిశ్రమకు చెందిన కొంతమంది కేంద్ర ప్రభుత్వానికి కీలక సలహా ఇచ్చారు. క్రూడ్ ఆయిల్‌తో పాటు రిఫైన్డ్ ఆయిల్‌ల మధ్య ఉన్న కస్టమ్స్ డ్యూటీ వ్యత్యాసాన్ని పెంచాలని కోరారు. దీని వల్ల దేశీయ రిఫైనింగ్ కంపెనీలు దిగుమతులపై పోటీ పడగలవని, చౌక ధరల రిఫైన్డ్ ఆయిల్ వల్ల వచ్చే సమస్యలను తట్టుకోగలవని అభిప్రాయపడ్డారు. ఈ సూచనలపై కేంద్రం ఎలా స్పందిస్తుందో వేచి చూడాలి. మొత్తంగా చూసుకుంటే, వంటనూనె ధరల్లో ప్రజలకు ఊరట కలిగించే మార్పులు త్వరలో కనిపించే అవకాశముంది. ఈ నిర్ణయం నేరుగా సామాన్య కుటుంబాల నిత్యవసర ఖర్చులపై ప్రభావం చూపనుంది.
