Stalin questions Modi government : “బీజేపీ అనే వాషింగ్ మెషీన్‌లో పడితే, అవినీతిపరుల మరకలన్నీ పోయి, కడిగిన ఆణిముత్యాల్లా ఎలా బయటకు వస్తున్నారు?” – కేంద్ర ప్రభుత్వంపై తమిళనాడు ముఖ్యమంత్రి ఎంకే స్టాలిన్ సంధించిన పదునైన ప్రశ్న ఇది. కేవలం అవినీతికే పరిమితం కాకుండా, నిధుల కేటాయింపులో వివక్ష, హిందీ భాష రుద్దడం, బిహార్ ఓటర్ల జాబితా సవరణ వంటి అనేక అంశాలపై ఆయన కేంద్ర ప్రభుత్వాన్ని నిలదీశారు. ‘ఎక్స్’  వేదికగా ఆయన సంధించిన ఈ ప్రశ్నల వర్షం, దేశ రాజకీయాల్లో తీవ్ర చర్చకు దారితీసింది.

స్టాలిన్ సంధించిన కీలక ప్రశ్నలు : దేశ ప్రజల మనసుల్లో మెదులుతున్నాయంటూ, స్టాలిన్ కేంద్ర ప్రభుత్వం ముందు పలు కీలక ప్రశ్నలను ఉంచారు.
అవినీతి ‘వైట్ వాష్’: బీజేపీయేతర పార్టీలలో ఉన్నప్పుడు అవినీతిపరులుగా ముద్రపడిన నేతలు, బీజేపీలో చేరగానే ఎలా పునీతులవుతున్నారు?
భాషాహంకారం: జాతీయ ప్రాముఖ్యత కలిగిన ప్రాజెక్టులు, చట్టాలకు హిందీ, సంస్కృత భాషల్లోనే ఎందుకు పేర్లు పెడుతున్నారు? తమిళం వంటి ప్రాచీన భాషలను ఎందుకు విస్మరిస్తున్నారు?
మూఢనమ్మకాల వ్యాప్తి: కేంద్ర మంత్రులే సైన్స్‌కు వ్యతిరేకంగా మాట్లాడుతూ, దేశంలో మూఢనమ్మకాలను ఎందుకు వ్యాపింపజేస్తున్నారు?
గవర్నర్ల రాజకీయం: బీజేపీయేతర రాష్ట్రాల్లో గవర్నర్ల ద్వారా రాజకీయ ప్రయోజనం పొందాలని ఎందుకు ప్రయత్నిస్తున్నారు?

బిహార్ SIRపై అనుమానం: బిహార్ అసెంబ్లీ ఎన్నికల్లో బీజేపీని గెలిపించేందుకే, ఓట్లను చోరీ చేయడానికి ‘ఓటర్ల జాబితా సమగ్ర సవరణ’ (SIR) ప్రక్రియను చేపట్టారా?
‘కీలడి’పై చిన్నచూపు: 5,300 ఏళ్ల నాటి తమిళ ప్రాచీన నాగరికతకు సాక్ష్యంగా నిలిచిన ‘కీలడి నివేదిక’ను కేంద్రం ఎందుకు గుర్తించడం లేదు? దానిని ఎందుకు తొక్కిపెట్టాలని చూస్తోంది? “ఈ ప్రశ్నలకు ప్రభుత్వం వద్ద సమాధానాలు ఉన్నాయా? లేక, వాట్సాప్ యూనివర్సిటీ ద్వారా తప్పుడు ప్రచారానికే తెరతీస్తారా?” అని స్టాలిన్ ఘాటుగా ప్రశ్నించారు.

నిధుల కేటాయింపులో వివక్ష : కేంద్ర ప్రభుత్వం, రాజకీయ దురుద్దేశంతోనే తమిళనాడుకు నిధుల కేటాయింపులో తీవ్ర అన్యాయం చేస్తోందని రాష్ట్ర ఆర్థిక మంత్రి తంగం తెన్నరసు కూడా ఇటీవల ఆరోపించారు.
విద్యాహక్కు: విద్యాహక్కు అమలు కోసం రూ.4,000 కోట్లు కేటాయించాల్సి ఉండగా, కేవలం రూ.450 కోట్లే ఇచ్చారు.
జల్ జీవన్ మిషన్: ఈ పథకం కింద రాష్ట్రానికి ఇంకా రూ.3,407 కోట్ల బకాయిలు రావాల్సి ఉంది.
ఎక్స్‌ప్రెస్‌వేలు, రైల్వే ప్రాజెక్టులు: కొత్తగా మంజూరు చేసిన 8 ఎక్స్‌ప్రెస్‌వేలలో తమిళనాడుకు ఒక్కటీ కేటాయించలేదు. రైల్వే ప్రాజెక్టుల నిధుల్లోనూ బీజేపీ పాలిత రాష్ట్రాలకే అగ్ర ప్రాధాన్యత ఇస్తున్నారని ఆయన ఆరోపించారు.
ఈ వరుస ఆరోపణలు, ప్రశ్నలతో డీఎంకే ప్రభుత్వం, కేంద్రంపై తన పోరాటాన్ని ఉధృతం చేస్తోంది.