Congress protest against MGNREGA repeal : “గాంధీ పేరును చెరిపేయాలన్నదే వారి కుట్ర. గ్రామీణ పేదల కడుపుకొట్టే ఈ కొత్త చట్టాన్ని అడ్డుకుంటాం. పార్లమెంటులో దీనిపై యుద్ధం చేస్తాం.” – ఈ ఘాటు వ్యాఖ్యలతో కాంగ్రెస్ అధ్యక్షుడు మల్లికార్జున ఖర్గే, కేంద్ర ప్రభుత్వంపై తీవ్రస్థాయిలో విరుచుకుపడ్డారు. మహాత్మా గాంధీ జాతీయ గ్రామీణ ఉపాధి హామీ పథకం (MGNREGA)ను రద్దు చేసి, దాని స్థానంలో కొత్త చట్టాన్ని తీసుకురావడాన్ని ఆయన తీవ్రంగా తప్పుబట్టారు.
యూపీఏ హయాంలో ప్రతిష్ఠాత్మకంగా ప్రవేశపెట్టిన ఉపాధి హామీ చట్టాన్ని రద్దు చేసి, దాని స్థానంలో ‘వికసిత భారత్ – గ్యారెంటీ ఫర్ రోజ్గార్ ఆజీవిక మిషన్ (గ్రామీణ్) (VB-G RAM G) యాక్ట్’ను కేంద్ర ప్రభుత్వం తీసుకొచ్చింది. దీనికి వ్యతిరేకంగా, కాంగ్రెస్ ‘MGNREGA బచావో సంగ్రామ్’ పేరుతో 45 రోజుల దేశవ్యాప్త ప్రచారాన్ని ప్రారంభించింది. ఇందులో భాగంగా, ఢిల్లీలో నిర్వహించిన జాతీయ ఉపాధి హామీ కార్మికుల సదస్సులో ఖర్గే, రాహుల్ గాంధీ పాల్గొన్నారు.
ఖర్గే ఆరోపణలు.. ప్రభుత్వ లక్ష్యం అదేనా : ఈ సదస్సులో మాట్లాడిన మల్లికార్జున ఖర్గే, కేంద్ర ప్రభుత్వంపై తీవ్ర ఆరోపణలు చేశారు.
గాంధీ పేరు చెరిపేయడానికే: “ఉపాధి హామీ చట్టాన్ని రద్దు చేయడం వెనుక ఉన్న అసలు ఉద్దేశం, ప్రజా స్మృతి పథం నుంచి మహాత్మా గాంధీ పేరును చెరిపేయడమే,” అని ఆయన ఆరోపించారు.
గ్రామ స్వరాజ్యానికి గండి: ఇది గ్రామ స్వరాజ్య భావనను బలహీనపరిచే ప్రయత్నమని ఆయన విమర్శించారు.
పార్లమెంటులో పోరాటం: “రాబోయే బడ్జెట్ సమావేశాలలో, మేము ఈ అంశంపై గట్టిగా పోరాడతాం. ప్రజలందరూ ఏకమై, ఈ కొత్త చట్టం అమలును అడ్డుకోవాలి,” అని ఖర్గే పిలుపునిచ్చారు. ఈ సదస్సులో, దేశం నలుమూలల నుంచి వచ్చిన కార్మికులు, తమ పని ప్రదేశాల నుంచి తెచ్చిన పిడికెడు మట్టిని మొక్కలకు వేసి, ప్రతీకాత్మకంగా తమ నిరసనను తెలిపారు.
కాంగ్రెస్ డిమాండ్లు : కాంగ్రెస్ పార్టీ ఈ విషయంలో స్పష్టమైన డిమాండ్లతో ముందుకొచ్చింది. కొత్తగా తెచ్చిన VB-G RAM G చట్టాన్ని తక్షణమే ఉపసంహరించుకోవాలి. పాత ఉపాధి హామీ చట్టాన్ని (MGNREGA) దాని అసలు రూపంలో, అంటే హక్కు ఆధారిత చట్టంగా, పంచాయతీల అధికారాలతో పునరుద్ధరించాలి. గ్రామీణ పేదల జీవనాధారమైన ఉపాధి హామీ పథకంపై జరుగుతున్న ఈ రాజకీయ యుద్ధం, రాబోయే పార్లమెంట్ సమావేశాలను వేడెక్కించడం ఖాయం.