Delhi Yamuna flood crisis : దేశ రాజధాని ఢిల్లీని యమునమ్మ ముంచెత్తుతోంది. ఎగువ రాష్ట్రాల్లో కురుస్తున్న కుండపోత వర్షాలకు నది ఉగ్రరూపం దాల్చి, ప్రమాదకర స్థాయిని దాటి ప్రవహిస్తోంది. దీంతో వందలాది కాలనీలు జలదిగ్బంధంలో చిక్కుకోగా, వేలాది మందిని సురక్షిత ప్రాంతాలకు తరలించేందుకు అధికార యంత్రాంగం పరుగులు పెడుతోంది. అసలు ఈ జల ప్రళయానికి కారణమేంటి…? ప్రభుత్వం తీసుకుంటున్న చర్యలేంటి..? రాజధాని గట్టెక్కుతుందా..?
ప్రమాద స్థాయి దాటి ప్రవాహం : యమునా నది ప్రమాదకర స్థాయి 205.33 అడుగులు కాగా, మంగళవారం ఉదయం ఢిల్లీ పాత రైల్వే వంతెన వద్ద నీటి మట్టం 205.80 అడుగులకు చేరింది. ఇది గంటగంటకు పెరుగుతూనే ఉంది. హరియాణాలోని హత్నికుండ్ బ్యారేజీ నుంచి లక్షా 76 వేల క్యూసెక్కులకు పైగా వరద నీటిని దిగువకు విడుదల చేయడమే ఈ ఆకస్మిక వరదకు ప్రధాన కారణం. ఈ ప్రవాహం సాయంత్రానికి 206 అడుగులకు చేరవచ్చని కేంద్ర జల సంఘం అంచనా వేస్తోంది. దీంతో యమునా తీర ప్రాంతాలైన బోట్ క్లబ్, మొనాస్టరీ మార్కెట్, గీతా ఘాట్ వంటి లోతట్టు ప్రాంతాలు పూర్తిగా నీట మునిగాయి.
అప్రమత్తమైన అధికార యంత్రాంగం : పరిస్థితి తీవ్రతను గమనించిన ఢిల్లీ ముఖ్యమంత్రి రేఖా గుప్తా, ఉన్నతాధికారులతో అత్యవసర సమీక్ష నిర్వహించారు. “పరిస్థితిని నిరంతరం పర్యవేక్షిస్తున్నాం. ప్రజల ప్రాణాలను కాపాడటమే మా ప్రథమ కర్తవ్యం. లోతట్టు ప్రాంతాల ప్రజల కోసం తాత్కాలిక పునరావాస కేంద్రాలను ఏర్పాటు చేశాం” అని ఆయన తెలిపారు. పడవల ద్వారా పోలీసులు, విపత్తు నిర్వహణ సిబ్బంది ప్రజలను ఖాళీ చేయిస్తూ, హెచ్చరికలు జారీ చేస్తున్నారు. పాత రైల్వే వంతెనపై వాహనాల రాకపోకలను పూర్తిగా నిలిపివేశారు. అనేక పాఠశాలలకు సెలవులు ప్రకటించగా, ప్రైవేటు సంస్థలు ఉద్యోగులకు ఇంటి నుంచి పనిచేసే వెసులుబాటు కల్పించాలని ప్రభుత్వం సూచించింది.
ఉత్తరాదిని వణికిస్తున్న వానలు : ఢిల్లీలోనే కాకుండా యావత్ ఉత్తర భారతదేశాన్ని వరదలు వణికిస్తున్నాయి.
హిమాచల్ ప్రదేశ్, ఉత్తరాఖండ్: భారీ వర్షాలు, కొండచరియలు విరిగిపడి ఏడుగురు మరణించారు. అనేక రహదారులు మూసుకుపోయాయి.
పంజాబ్: కుండపోత వర్షాలతో జనజీవనం స్తంభించింది. పాఠశాలలు, కళాశాలలకు సెలవులు ప్రకటించారు.
జమ్ము కశ్మీర్: వైష్ణో దేవి యాత్ర మార్గంలో కొండచరియలు విరిగిపడిన ఘటన తర్వాత, యాత్రను వరుసగా ఏడో రోజు కూడా నిలిపివేశారు. ఈ నేపథ్యంలో, వరద ప్రభావిత రాష్ట్రాలకు కేంద్రం తక్షణమే ప్రత్యేక ప్యాకేజీ ప్రకటించాలని కాంగ్రెస్ అధ్యక్షుడు మల్లికార్జున ఖర్గే డిమాండ్ చేశారు. విపత్తు సమయంలో రాజకీయాలు చేయవద్దని ఆయన హితవు పలికారు.
