మన దేశంలో రైల్వేను నిత్యం లక్షలాది మంది ప్రయాణికులు ఉపయోగిస్తుంటారు. అదే విధంగా రైలు ప్రయాణానికి సంబంధించి రైల్వే అనేక నియమాలను రూపొందించింది. ప్రతి ప్రయాణికుడు పాటించాల్సిన కొన్ని నియమాలు కూడా ఉన్నాయి. దీనితో పాటు రైలులో ప్రయాణికులు తీసుకెళ్లే లగేజీ విషయంలో కూడా నిబంధనలు ఉన్నాయి. ముఖ్యంగా మత్తు పదార్థాలు రైలులో తీసుకువెళ్లడం నిషేధం. అందుకే మద్యాన్ని రైలులో తీసుకు వెళ్లకూడదు.
రైలులో మద్యం సేవించి ప్రయాణించలేరు. మీరు అలా పట్టుబడితే, మీరు రైల్వే చట్టం 1989లోని సెక్షన్ 165 ప్రకారం ప్రాసిక్యూట్ చేయబడవచ్చు. రైల్వే చట్టం ప్రకారం రైళ్లలో మాత్రమే కాకుండా, రైల్వే ఆస్తులు లేదా రైల్వే అధికారులకు చెందిన ఆస్తిలో మద్యం లేదా మరేదైనా మత్తు పదార్థాన్ని తీసుకెళ్లడానికి అనుమతి లేదు. రైల్వే చట్టంలోని సెక్షన్ 145 ప్రకారం, ఒక వ్యక్తి రైల్వే ఆవరణలో లేదా రైల్వే క్యారేజీలో మత్తు పదార్థాలను సేవిస్తున్నట్లు లేదా మత్తులో ఇతర ప్రయాణికులను ఇబ్బంది పెట్టడానికి ప్రయత్నిస్తున్నట్లు రైల్వే అడ్మినిస్ట్రేషన్‌కు తెలిస్తే.. అప్పుడు టికెట్ లేదా ఆ వ్యక్తి పాస్ రద్దు చేయబడవచ్చు. అంతేకాకుండా నిందితుడికి 6 నెలల జైలు శిక్ష, జరిమానా కూడా విధించే అవకాశం ఉంది.
రైలు మరియు ప్రయాణీకుల భద్రతను దృష్టిలో ఉంచుకుని రైలులో కొన్ని వస్తువులను తీసుకెళ్లకుండా రైల్వే నిషేధించింది. అగ్ని ప్రమాదానికి కారణమయ్యే వస్తువులు, అపరిశుభ్రంగా ఉండే వస్తువులు, తోటి ప్రయాణికులకు అసౌకర్యంగా ఉండే వస్తువులు తీసుకెళ్లకూడదు. స్టవ్‌లు, గ్యాస్ సిలిండర్లు, ఏదైనా మండే రసాయనాలు, బాణసంచా, దుర్వాసన వచ్చే వస్తువులు, తోలు లేదా నానబెట్టిన చర్మం, ప్యాకింగ్‌లో తెచ్చిన నూనె, గ్రీజు, విరిగిపోయే లేదా లీక్ అయ్యే వస్తువులు.. ప్రయాణికులకు హాని కలిగించే వస్తువులను రైలు ప్రయాణంలో తీసుకెళ్లడం నిషేధించబడింది. రైల్వే నిబంధనల ప్రకారం ఒక ప్రయాణికుడు రైలులో 20 కిలోల వరకు నెయ్యి తీసుకువెళ్లవచ్చు, అయితే నెయ్యిని టిన్ క్యాన్లలో బాగా ప్యాక్ చేయాలి.
రైలులో ప్రయాణిస్తున్నప్పుడు నిషేధిత వస్తువులను తీసుకెళ్లడం నేరం. వారు ఏ క్లాస్‌లో ప్రయాణం చేసినా ఇది నేరం. ప్రయాణ సమయంలో ఒక ప్రయాణీకుడు ఏదైనా నిషేధించబడిన వస్తువులను కలిగి ఉంటే, అతను రైల్వే చట్టంలోని సెక్షన్ 164 ప్రకారం ప్రాసిక్యూట్ చేయబడవచ్చు. ఈ సెక్షన్ కింద ప్రయాణీకుడికి రూ. 1000 జరిమానా లేదా మూడేళ్ల జైలు శిక్ష లేదా రెండూ విధించవచ్చు. ఇది కాకుండా వ్యక్తి తీసుకువచ్చిన నిషేధిత మెటీరియల్ వల్ల ఏదైనా రకమైన నష్టం లేదా ప్రమాదం జరిగితే.. దానికి అయ్యే ఖర్చును దోషి భరించవలసి ఉంటుంది.
