Ebola cases in Agra : ఉత్తరప్రదేశ్లోని తాజ్నగరి ఆగ్రాలో ప్రాణాంతక ‘ఎబోలా’ వైరస్ కలకలం రేపింది. ఆఫ్రికా దేశమైన కాంగో నుంచి తిరిగి వచ్చిన ఇద్దరు ప్రయాణికులకు ఈ మహమ్మారి సోకినట్లు తేలడంతో ఆరోగ్య శాఖ ఉలిక్కిపడింది.
విమానాశ్రయ స్క్రీనింగ్.. తక్షణ నిర్బంధం: కాంగో నుంచి దిల్లీ, ముంబయి అంతర్జాతీయ విమానాశ్రయాల మీదుగా ఆగ్రా చేరుకున్న ఇద్దరు వ్యక్తులకు ఎయిర్పోర్టుల్లో నమూనాలు సేకరించారు. వాటి ఫలితాల్లో ఎబోలా పాజిటివ్గా నిర్ధారణ కావడంతో వైద్య బృందాలు యుద్ధప్రాతిపదికన రంగంలోకి దిగాయి. ‘ముందుజాగ్రత్తే దివ్యౌషధం’ అన్న చందంగా వైరస్ ఇతరులకు సోకకుండా బాధితులను, వారి కుటుంబ సభ్యులను తక్షణమే కట్టుదిట్టమైన హోమ్ ఐసోలేషన్లో ఉంచారు.
ప్రమాదం లేదు.. కానీ నిరంతర నిఘా: ప్రస్తుతం బాధితుల్లో సాధారణ ఇన్ఫెక్షన్ లక్షణాలు మాత్రమే ఉన్నాయని, ప్రాణాపాయం లేదని ఆగ్రా ఇన్ఛార్జ్ చీఫ్ మెడికల్ ఆఫీసర్ (CMO) డాక్టర్ అమిత్ రావత్ తెలిపారు. అయితే, ఎబోలా ముదిరితే తీవ్ర జ్వరం, ఒంటినొప్పులతో పాటు అంతర్గత, బాహ్య రక్తస్రావం, కిడ్నీ-కాలేయ వైఫల్యం సంభవిస్తాయని వైద్యులు హెచ్చరిస్తున్నారు. ప్రపంచ ఆరోగ్య సంస్థ (WHO) మార్గదర్శకాల ప్రకారం యూపీ అంతటా ఆసుపత్రులను హై అలర్ట్లో ఉంచి, కాంటాక్ట్ ట్రేసింగ్ను ముమ్మరం చేశారు.