Ebola virus outbreak advisory India : ప్రపంచ దేశాలను ‘ఎబోలా’ భయం వణికిస్తోందా? అంటే అవుననే అంటున్నాయి తాజా పరిణామాలు. ఆఫ్రికా ఖండంలో మృత్యుఘంటికలు మోగిస్తున్న ఈ డేంజర్ వైరస్ దెబ్బకు కేంద్ర ప్రభుత్వం అత్యంత అప్రమత్తమైంది. “రాకముందే రక్షణ వలయం” అన్న చందంగా విదేశీ ప్రయాణికులపై డేగకన్ను వేసింది. ఈ ఆందోళనల నడుమ దిల్లీలో జరగాల్సిన ప్రతిష్టాత్మక భారత్-ఆఫ్రికా ఫోరమ్ సదస్సు సైతం వాయిదా పడింది. 

అడుగడుగునా నిఘా.. విదేశీ ప్రయాణికులకు మార్గదర్శకాలు : ఎబోలా తీవ్రత ఆఫ్రికా దేశాల్లో ప్రబలుతున్న వేళ, వైరస్ మన దేశంలోకి ప్రవేశించకుండా కేంద్ర ఆరోగ్య శాఖ అడ్డుకట్ట వేసే చర్యలు చేపట్టింది. డైరెక్టరేట్ జనరల్ ఆఫ్ హెల్త్ సర్వీసెస్ (DGHS) తాజాగా కీలక అడ్వైజరీ జారీ చేసింది.

Also Read: https://teluguprabha.net/telangana/uppal-ipl-tickets-black-market-scam-srh-vs-rcb/

ముందస్తు సమాచారం తప్పనిసరి: డెమొక్రటిక్ రిపబ్లిక్ ఆఫ్ కాంగో (డీఆర్‌సీ), ఉగాండా, దక్షిణ సూడాన్‌ తదితర ఎబోలా ప్రభావిత దేశాల నుంచి వచ్చే ప్రయాణికులు ఇమ్మిగ్రేషన్ క్లియరెన్స్‌కు ముందే ఎయిర్‌పోర్టులోని ఆరోగ్య అధికారులను సంప్రదించి, వారి ఆరోగ్య పరిస్థితిని వెల్లడించాలి.

లక్షణాలు ఉంటే తక్షణమే రిపోర్టింగ్: ప్రయాణికులకు జ్వరం, తీవ్ర అలసట, నీరసం, తలనొప్పి, కండరాల నొప్పులు, వాంతులు, విరేచనాలు లేదా శరీరంలో అనూహ్య రక్తస్రావం వంటి లక్షణాలు కనిపిస్తే విమానాశ్రయంలోని హెల్త్ డెస్క్‌కు రిపోర్ట్ చేయాలి. అనుమానిత రోగుల శరీర ద్రవాలతో కాంటాక్ట్ ఉన్నవారు కూడా సమాచారం ఇవ్వాలి.

Also Read: https://teluguprabha.net/national-news/cockroach-janata-party/

21 రోజుల ట్రాకింగ్: విదేశాల నుంచి భారత్‌కు వచ్చిన తర్వాత 21 రోజుల లోపు పై లక్షణాలు కనిపిస్తే వెంటనే ఐసోలేట్ అయి, వైద్యులను సంప్రదించాలి. తమ ట్రావెల్ హిస్టరీని అధికారులకు తప్పనిసరిగా తెలియజేయాలి. అంతర్జాతీయ ఆరోగ్య నిబంధనల (IHR) ప్రకారం స్క్రీనింగ్‌కు సహకరించాలి.

ఎబోలా ఎఫెక్ట్: వాయిదా పడిన భారత్-ఆఫ్రికా సదస్సు : ఒకవైపు ముందస్తు జాగ్రత్తలు తీసుకుంటున్న కేంద్రం, మరోవైపు కీలక దౌత్యపరమైన నిర్ణయం తీసుకుంది. వచ్చే వారం దిల్లీ వేదికగా జరగాల్సిన ‘4వ భారత్- ఆఫ్రికా ఫోరమ్ సదస్సు’ను భారత విదేశాంగ మంత్రిత్వ శాఖ తాత్కాలికంగా వాయిదా వేసింది. ఈ సదస్సుకు ఆఫ్రికా దేశాల నుంచి కీలక ప్రతినిధులు హాజరుకావాల్సి ఉంది. అయితే, ప్రజారోగ్యమే ప్రథమ ప్రాధాన్యతగా భావించిన కేంద్రం, ఆఫ్రికన్ యూనియన్ ప్రతినిధులతో సంప్రదింపులు జరిపిన అనంతరం ఈ నిర్ణయం తీసుకుంది. సదస్సు ఆగినప్పటికీ, ఎబోలా విపత్తును ఎదుర్కొనేందుకు ఆఫ్రికాకు భారత్ అన్ని విధాలా వైద్య సహాయం అందిస్తుందని భరోసా ఇచ్చింది.

గ్లోబల్ హెల్త్ ఎమర్జెన్సీ: డబ్ల్యూహెచ్‌ఓ ఆందోళన : తాజా నివేదికల ప్రకారం.. డెమొక్రటిక్ రిపబ్లిక్ ఆఫ్ కాంగోలో ఎబోలా బారిన పడి ఇప్పటికే 88 మంది ప్రాణాలు కోల్పోగా, మరో 300 మందికి పైగా వైరస్ బారిన పడ్డారు. పొరుగునే ఉన్న ఉగాండాలోనూ కేసులు నమోదవుతున్నాయి.
దీని తీవ్రతను గమనించిన ప్రపంచ ఆరోగ్య సంస్థ (WHO) దీనిని ‘గ్లోబల్ హెల్త్ ఎమర్జెన్సీ’గా ప్రకటించింది. 1976లో తొలిసారి వెలుగుచూసిన ఎబోలా, ఇలా విజృంభించడం ఇది 17వ సారి.
దీనికి నిర్దిష్టమైన, పూర్తిస్థాయిలో ఆమోదించబడిన వ్యాక్సిన్లు లేదా చికిత్స లేకపోవడం అత్యంత ఆందోళనకరమని డబ్ల్యూహెచ్‌ఓ హెచ్చరించింది. అయితే, దేశాలు సరిహద్దులను మూసివేయరాదని, ప్రయాణ, వాణిజ్య ఆంక్షలు విధించకుండా కేవలం పటిష్టమైన స్క్రీనింగ్ చేపట్టాలని డబ్ల్యూహెచ్‌ఓ డైరెక్టర్ జనరల్ టెడ్రోస్ అథనామ్ గెబ్రియేసస్ సూచించారు.

భారత్‌లో జీరో కేసులు.. అయినా సన్నద్ధం!
దేశీయంగా ప్రజలు ఆందోళన చెందాల్సిన పనిలేదని, భారత్‌లో ఇప్పటివరకు ఒక్క ఎబోలా కేసు కూడా నమోదు కాలేదని కేంద్ర ఆరోగ్య కార్యదర్శి పుణ్య సలిలా శ్రీవాస్తవ స్పష్టం చేశారు. “అప్రమత్తతే ఆయుధం” అన్న సూత్రాన్ని పాటిస్తూ, రాష్ట్రాలు మరియు కేంద్రపాలిత ప్రాంతాలకు వివరణాత్మక మార్గదర్శకాలు (SOPs) పంపినట్లు వెల్లడించారు. విమానాశ్రయాల్లో స్క్రీనింగ్, క్వారంటైన్ వార్డుల ఏర్పాటు, నమూనాల పరీక్షలు, అత్యవసర చికిత్సలకు సంబంధించిన ప్రణాళికను ఇప్పటికే సిద్ధం చేశామని ఆమె స్పష్టం చేశారు.