Emergency Meeting on Red Fort Blast:కేంద్ర కేబినెట్ సమావేశానికి ముందు, దేశంలో నెలకొన్న భద్రతా పరిస్థితులపై చర్చించేందుకు భద్రతా వ్యవహారాల మంత్రివర్గ ఉపసంఘం (సీసీఎస్) అత్యవసరంగా సమావేశం కానుంది. ఈ అత్యంత కీలకమైన సమావేశంలో ప్రధానంగా ఢిల్లీలోని చారిత్రక ఎర్రకోట సమీపంలో జరిగిన పేలుడు ఘటనపై సమీక్ష నిర్వహించనున్నారు.
ఈ సీసీఎస్ సమావేశం అనంతరం, సాయంత్రం 5:30 గంటలకు కేంద్ర మంత్రివర్గ సమావేశం జరగనుంది. ఈ రెండు కీలక సమావేశాలు దేశ అంతర్గత భద్రత, ఉగ్రవాద ముప్పుపై చర్చించి, భవిష్యత్తు కార్యాచరణను నిర్ణయించనున్నాయి.
భద్రతా వ్యవహారాల మంత్రివర్గ ఉపసంఘం (CCS) సమావేశంలో ప్రధానమంత్రి నరేంద్ర మోదీ నేతృత్వంలో కేంద్ర హోంమంత్రి అమిత్‌షా, రక్షణ మంత్రి రాజ్‌నాథ్‌ సింగ్‌, ఆర్థిక మంత్రి నిర్మలా సీతారామన్‌, విదేశాంగ మంత్రి ఎస్. జైశంకర్‌, మరియు జాతీయ భద్రతా సలహాదారు (NSA) అజిత్‌ దోవల్‌ తదితర కీలక సభ్యులు పాల్గొననున్నారు. దేశ భద్రతకు సంబంధించిన అత్యున్నత నిర్ణయాలు తీసుకునే ఈ ఉపసంఘం, ఎర్రకోట పేలుడు ఘటనకు సంబంధించిన నిఘా వర్గాల సమాచారాన్ని, దర్యాప్తు పురోగతిని సమీక్షించనుంది.
మొన్న సోమవారం సాయంత్రం ఢిల్లీలోని ఎర్రకోట మెట్రో స్టేషన్ సమీపంలో రద్దీగా ఉండే ప్రాంతంలో హై-ఇంటెన్సిటీ పేలుడు సంభవించింది. ఒక హ్యుందాయ్ ఐ20 కారులో జరిగిన ఈ పేలుడు కారణంగా కనీసం ఎనిమిది నుంచి పదమూడు మంది పౌరులు మరణించినట్లు, 20 మందికి పైగా గాయపడినట్లు తాజా సమాచారం. ఈ పేలుడు తీవ్రతకు సమీపంలోని అనేక వాహనాలు అగ్నికి ఆహుతయ్యాయి.
ఈ ఘటనపై ఢిల్లీ పోలీసులు ఉగ్రవాద నిరోధక చట్టం (UAPA) కింద కేసు నమోదు చేశారు. తదుపరి దర్యాప్తును జాతీయ దర్యాప్తు సంస్థ (NIA)కి అప్పగించారు. ప్రాథమిక విచారణలో ఈ పేలుడు వెనుక ఉగ్రవాద కుట్ర ఉందని, పేలుడుకు వాడిన కారులో జమ్ముకశ్మీర్‌లోని పుల్వామాకు చెందిన ఓ డాక్టర్, ఉమర్ నబీ ఉన్నట్లు తేలింది. పోలీసుల దాడుల ఒత్తిడి కారణంగా నిందితుడు పానిక్ అయి, బాంబు అనుకోకుండా పేలిపోయిందని దర్యాప్తు సంస్థలు అనుమానిస్తున్నాయి. ఈ ఘటన జరగడానికి కొన్ని గంటల ముందే, భారీ మొత్తంలో పేలుడు పదార్థాలను స్వాధీనం చేసుకున్న ఉగ్రవాద మాడ్యూల్ ఛేదన నేపథ్యంలో ఈ సమావేశం మరింత ప్రాధాన్యతను సంతరించుకుంది.
సీసీఎస్ సమావేశంలో ఈ ఉగ్రవాద మాడ్యూల్ వివరాలు, దేశంలోని కీలక ప్రాంతాలలో భద్రతా కట్టుదిట్టం చేయాల్సిన ఆవశ్యకత, మరియు భవిష్యత్తులో ఇటువంటి దాడులను నిరోధించడానికి తీసుకోవాల్సిన చర్యలపై సమగ్రంగా చర్చ జరగనుంది.
