చండీగఢ్, ఆగ‌స్టు 31 (తెలుగు ప్ర‌భ): హర్యానా అసెంబ్లీ ఎన్నికల తేదీ మారింది. హర్యానాలో అక్టోబర్ ఒక‌ట‌వ తేదీకి బ‌దులు అక్టోబర్ 5న ఓటింగ్ జరగనుంది. అక్టోబర్ 8న ఓట్ల లెక్కింపు జరగనుంది. పోలింగ్ తేదీని మార్చాలని కోరుతూ బీజేపీ, ఐఎన్‌ఎల్‌డీ ఎన్నికల సంఘానికి ఇటీవ‌ల లేఖ రాశాయి. రాజకీయ పార్టీల డిమాండ్లను పరిగణనలోకి తీసుకుని ఎన్నికల సంఘం ఓటింగ్ తేదీని మార్చింది.
ఎన్నికల సంఘం ఇచ్చిన సమాచారం ప్రకారం జమ్ముకశ్మీర్లో ఓటింగ్ తేదీలో ఎలాంటి మార్పు లేదు. అయితే హర్యానా, జమ్ముకశ్మీర్‌లలో ఓట్ల లెక్కింపు అక్టోబర్ 8న ఒకేసారి జరగనుంది. జమ్ముకశ్మీర్లో నామినేషన్ తేదీలు అలాగే ఉంటాయి. వాటిలో మార్పు లేదు. హర్యానాలో సెప్టెంబర్ 5న నోటిఫికేషన్ వెలువడనుంది. నామినేషన్‌కు చివరి తేదీ సెప్టెంబర్ 12. సెప్టెంబర్ 13న నామినేషన్ పత్రాల పరిశీలన ఉంటుంది. అభ్యర్థులు సెప్టెంబర్ 16 వరకు తమ పేర్లను ఉపసంహరించుకోవచ్చు. బిష్ణోయ్ కమ్యూనిటీ నిర్వ‌హించే పండుగను దృష్టిలో ఉంచుకుని హర్యానా అసెంబ్లీ ఎన్నికలలో మార్పు చేసిన‌ట్లు ఎన్నికల సంఘం తెలిపింది. బిష్ణోయ్ కమ్యూనిటీ సంప్రదాయాలను గౌరవిస్తూ ఎన్నికల సంఘం ఈ నిర్ణయం తీసుకుంది.