Haryana Lado Lakshmi Yojana: రాష్ట్రంలోని మహిళలకు ఆర్థికంగా అండగా నిలవడానికి ‘దీన్ దయాళ్ ఉపాధ్యాయ లాడో లక్ష్మీ యోజన’ అనే విప్లవాత్మక పథకాన్ని హర్యానా ప్రభుత్వం ప్రకటించింది. ఈ పథకం భారతీయ జనతా పార్టీ (BJP) ఎన్నికల వాగ్దానాల్లో ఒకటి. పండిట్ దీన్ దయాళ్ ఉపాధ్యాయ జయంతి అయిన సెప్టెంబర్ 25 నుండి ఈ పథకం అమలులోకి వస్తుంది. ఈ మేరకు హర్యానా ముఖ్యమంత్రి నయీబ్ సింగ్ సైనీ వివరించారు.
ఆర్థిక భరోసా
ఈ పథకం కింద, 23 సంవత్సరాలు లేదా అంతకంటే ఎక్కువ వయస్సు ఉన్న అర్హత కలిగిన ప్రతి మహిళకు నెలకు రూ. 2,100 ఆర్థిక సహాయం లభిస్తుంది. వివాహితులైనా, అవివాహితులైనా ఈ ప్రయోజనం పొందేందుకు అర్హులు. ముఖ్యమంత్రి నయీబ్ సింగ్ సైనీ ఈ పథకాన్ని ప్రకటించిన తరువాత, సెప్టెంబర్ 25 నుండి అర్హులైన మహిళలందరి ఖాతాల్లో డబ్బు జమ అవుతుందని తెలిపారు.
ముఖ్యమైన అర్హతలు
ఈ పథకం మొదటి దశలో, సంవత్సరానికి రూ. లక్ష కంటే తక్కువ ఆదాయం ఉన్న కుటుంబాల మహిళలను చేర్చనున్నారు. రాబోయే రోజుల్లో దశలవారీగా ఈ పథకాన్ని విస్తరించి అధిక ఆదాయ వర్గాలను కూడా దీని పరిధిలోకి తీసుకురావాలని ప్రభుత్వం యోచిస్తోంది. లాడో లక్ష్మీ యోజన ప్రయోజనం పొందాలంటే, లబ్ధిదారురాలు లేదా ఆమె భర్త గత 15 సంవత్సరాలుగా హర్యానాలో నివసిస్తూ ఉండాలి. ఒక కుటుంబంలో అర్హత ఉన్న మహిళా లబ్ధిదారుల సంఖ్యకు పరిమితి లేదు. అంటే, ఒకే కుటుంబంలో ముగ్గురు అర్హులైన మహిళలు ఉన్నా, వారికి ఈ పథకం ప్రయోజనం లభిస్తుంది.
భవిష్యత్ ప్రయోజనాలు
లాడో లక్ష్మీ యోజన కేవలం ఆర్థిక సహాయానికే పరిమితం కాదు. అవివాహిత మహిళ 45 ఏళ్లు నిండిన తర్వాత ఆమె స్వయంచాలకంగా వితంతు, నిరాశ్రయుల మహిళల ఆర్థిక సహాయ పథకానికి అర్హురాలవుతుంది. అలాగే, 60 ఏళ్లు నిండినప్పుడు వృద్ధాప్య సమ్మాన్ భత్యం పెన్షన్ పథకానికి కూడా ఆమె అర్హత పొందుతారు. దీనివల్ల మహిళలకు దీర్ఘకాలిక భరోసా లభిస్తుంది.
ఇప్పటికే క్యాన్సర్, హిమోఫిలియా వంటి తీవ్రమైన వ్యాధులతో బాధపడుతున్న మహిళలకు లభిస్తున్న పెన్షన్లకు అదనంగా ఈ పథకం ప్రయోజనాలు లభిస్తాయని ముఖ్యమంత్రి సైనీ స్పష్టం చేశారు. మొదటి దశలో దాదాపు 19-20 లక్షల మంది మహిళలు ఈ పథకం ద్వారా లబ్ధి పొందుతారని అంచనా.
సులభమైన దరఖాస్తు ప్రక్రియ
త్వరలో ఈ పథకం కోసం ఒక ప్రత్యేక యాప్ ప్రారంభించబడుతుంది. దీని ద్వారా అర్హులైన మహిళలు ఇంట్లోనే కూర్చుని సులభంగా దరఖాస్తు చేసుకోవచ్చు. అర్హులైన మహిళల జాబితాను పంచాయితీలు, వార్డులలో ప్రచురించనున్నట్లు ముఖ్యమంత్రి వెల్లడించారు. ఈ కొత్త పథకం హర్యానా మహిళల జీవితాల్లో సానుకూల మార్పు తీసుకువస్తుందని ఆశిస్తున్నారు.
