Ajit Pawar: మహారాష్ట్ర ఉపముఖ్యమంత్రి అజిత్‌ పవార్‌ మహిళా అధికారిని బెదిరించిన వీడియో వైరల్ గా మారింది. అజిత్ పవార్ కు, ఐపీఎస్ అధికారిణి అంజనా కృష్ణ మధ్య జరిగిన వాగ్వాదం ప్రస్తుతం వైరల్‌గా మారింది. సోలాపుర్‌లోని ఓ గ్రామంలో మహిళా ఐపీఎస్ అక్రమ ఇసుక తవ్వకాలకు వ్యతిరేకంగా ఆమె చర్యలు తీసుకుంది. అయితే, ఆ అంశంపైనే మంత్రికి, అధికారిణికి మధ్య వివాదానికి కారణమని తెలుస్తోంది. కాగా.. రోడ్డు నిర్మాణం కోసం కర్మలా తాలూకాలోని కుద్దు గ్రామంలో అక్రమంగా ఇసుక తవ్వకాలు జరుగుతున్నట్లు సబ్-డివిజనల్ పోలీసు అధికారిణి అంజనా కృష్ణకు ఫిర్యాదులు అందాయి. దీనిపై చర్యలు తీసుకునేందుకు రెండురోజుల క్రితం ఆమె ఆ గ్రామానికి వెళ్లారు. ఈక్రమంలో కొందరు గ్రామస్థులు, స్థానిక ఎన్సీపీ కార్యకర్తలు అక్కడికి చేరుకుని అధికారులతో ఘర్షణకు దిగారు. వారిలో ఒకరు డిప్యూటీ సీఎం అజిత్‌ పవార్‌కు ఫోన్‌ చేసి ఇచ్చారు. ఇసుక తవ్వకాలకు వ్యతిరేకంగా చర్యలు తీసుకోవడం ఆపాలని పవార్‌ ఆమెను ఆదేశించారు. ఈ క్రమంలో వారి మధ్య సంభాషణ జరిగింది.

Read Also: UNGA: ఉక్రెయిన్‌లో పరిస్థితులపై ఐరాసలో భారత్‌ ఆందోళన

పవార్, ఐపీఎస్ అధికారిణి మధ్య సంభాషణ ఎలా జరిగిందంటే?

పవార్‌: నేను ఉపముఖ్యమంత్రిని మాట్లాడుతున్నా. మీ చర్యలను వెంటనే ఆపేయండి.
ఐపీఎస్ అధికారిణి: మీరు చెబుతున్నది నాకు తెలుస్తోంది. కానీ, ఫోన్‌లో నేను మాట్లాడుతోంది నిజంగా డిప్యూటీ సీఎంతోనేనా? కాదా? అనే విషయం తెలియాలి. నా నంబర్‌కు ఒకసారి వీడియో కాల్‌ చేస్తారా?
పవార్‌: నీకు ఎంత ధైర్యం?. నేను నీపై చర్యలు తీసుకుంటా. నన్నే వీడియో కాల్‌ చేయమంటారా?నన్ను చూడాలనుకుంటున్నారుగా.. నాకు వీడియో కాల్‌ చేయండి.

महाराष्ट्र-

डिप्टी CM बोल रहा हूँ एक्शन रोको –

सोलापुर में तैनात IPS अंजना कृष्णा और DCM अजित पवार के बीच बातचीत का मामला वायरल !! pic.twitter.com/CMouSgl7Dc

— Gaurav Singh Sengar (@sengarlive) September 4, 2025

దీంతో పవార్‌కు ఐపీఎస్ అధికారిణి అంజనా కృష్ణ వీడియో కాల్‌ చేశారు. ఈ సందర్భంగా తక్షణమే చర్యలు ఆపేయాలంటూ పవార్‌ ఆదేశించారు. ఈ సంభాషణను ఎవరో వీడియో తీసి సోషల్ మీడియాలో పోస్టు చేశారు. ప్రస్తుతం ఇది వైరల్‌గా మారగా.. పవార్‌ ప్రవర్తనపై నెటిజన్లు విమర్శలు గుప్పిస్తున్నారు.

Read Also: Trump: ‘డిపార్ట్ మెంట్ ఆఫ్ వార్’- రక్షణ శాఖ పేరు మారుస్తూ ట్రంప్ నిర్ణయం

ఎన్సీపీ రాష్ట్ర చీఫ్ ఏమన్నారంటే?

ఈ వీడియోపై మహారాష్ట్ర పార్టీ చీఫ్‌ సునీల్‌ తట్కరే స్పందిస్తూ.. పవార్‌ వ్యాఖ్యలను తప్పుగా అర్థం చేసుకున్నారన్నారు. కార్యకర్తలను శాంతింపజేసేందుకు ఐపీఎస్ అధికారిణిని అజిత్ మందలించి ఉండవచ్చన్నారు. ఆమె విధులను పూర్తిగా అడ్డుకోవాలనేది ఆయన ఉద్దేశం కాదన్నారు. చట్టవిరుద్ధ కార్యకలాపాలకు అజిత్ ఎప్పుడూ మద్దతివ్వరని స్పష్టం చేశారు. మరోవైపు, ఈ వీడియోపై మాట్లాడేందుకు ఐపీఎస్‌ అధికారిణి అంజనా కృష్ణతో సహా పలువురు అధికారులు నిరాకరించారు. అయితే, దీనిపై ఎలాంటి ఫిర్యాదులు అందలేదని స్థానిక పోలీసులు తెలిపారు.