Telesurgery on 16-month-old baby : వైద్యుడు హైదరాబాద్‌లో.. రోగి 1600 కిలోమీటర్ల దూరంలోని మొరాదాబాద్‌లో! కానీ, మధ్యలో ఉన్న దూరం వారి చికిత్సకు అడ్డుకాలేదు. అత్యాధునిక 5జీ టెక్నాలజీ, దేశీయంగా తయారైన రోబోటిక్ సిస్టమ్ సాయంతో, హైదరాబాద్ వైద్యులు సుదూరంలో ఉన్న 16 నెలల చిన్నారికి విజయవంతంగా శస్త్రచికిత్స చేసి, సరికొత్త చరిత్ర సృష్టించారు. వైద్య రంగంలో అద్భుతంగా అభివర్ణిస్తున్న ఈ ‘టెలి-రోబోటిక్ సర్జరీ’ ఎలా సాధ్యమైంది..? దీని వెనుక ఉన్న సాంకేతికత ఏమిటి..?

అసలేం జరిగిందంటే : పుట్టుకతోనే కిడ్నీ సంబంధిత జన్యు సమస్యతో బాధపడుతున్న 16 నెలల బాలుడికి, హైదరాబాద్ ప్రీతి కిడ్నీ హాస్పిటల్ వైద్యులు ఈ అరుదైన శస్త్రచికిత్సను నిర్వహించారు.

సమస్య: బాలుడి మూత్రపిండం నుంచి మూత్రాశయానికి మూత్రం సరిగా వెళ్లకపోవడంతో (యూరేటరోపెల్విక్ అబ్‌స్ట్రక్షన్), కిడ్నీ వాపునకు గురైంది.
సవాల్: బాలుడి వయసు, తక్కువ బరువు కారణంగా, సంప్రదాయ ఓపెన్ సర్జరీ చేయడం అత్యంత ప్రమాదకరం.

టెలి-రోబోటిక్ సర్జరీతో అద్భుతం : ఈ క్లిష్ట పరిస్థితుల్లో, ప్రీతి కిడ్నీ హాస్పిటల్ ఎండీ, చీఫ్ యూరాలజిస్ట్ డాక్టర్ వి. చంద్రమోహన్, టెలి-రోబోటిక్ సర్జరీ చేయాలని నిర్ణయించారు. బాలుడిని ఉత్తరప్రదేశ్‌లోని మొరాదాబాద్‌లో ఉన్న ఆసుపత్రి ఆపరేషన్ థియేటర్‌లో ఉంచారు. డాక్టర్ చంద్రమోహన్, హైదరాబాద్‌లోని తన ఆసుపత్రి నుంచే, దేశీయంగా తయారైన ‘ఎస్ఎస్ఐ మంత్ర’ రోబోటిక్ సిస్టమ్‌కు అనుసంధానమైన కన్సోల్ వద్ద కూర్చున్నారు.

5జీ టెక్నాలజీతో అనుసంధానం: హై-స్పీడ్ 5జీ ఇంటర్నెట్ ద్వారా, డాక్టర్ చంద్రమోహన్ హైదరాబాద్ నుంచి మొరాదాబాద్‌లోని రోబోటిక్ చేతులను నియంత్రిస్తూ, గంట సేపట్లో శస్త్రచికిత్సను విజయవంతంగా పూర్తి చేశారు. ప్రపంచంలోనే అతి చిన్న వయసున్న బాలుడికి (16 నెలలు) విజయవంతంగా టెలిసర్జరీ చేసి, మరుసటి రోజే డిశ్చార్జ్ చేయడం ద్వారా కిమ్స్ వైద్యులు సరికొత్త రికార్డు సృష్టించారు.

భవిష్యత్తు వైద్యానికి ముందడుగు : ఈ విజయం, భారతదేశ వైద్య రంగంలో ఓ నూతన అధ్యాయానికి నాంది పలుకుతోంది.

“భారతదేశం చాలా సువిశాలమైన దేశం. అన్ని మారుమూల ప్రాంతాల్లోనూ నిపుణులైన వైద్యులు అందుబాటులో ఉండటం సాధ్యం కాదు. ఈ టెలి-రోబోటిక్ టెక్నాలజీ ద్వారా, మేం హైదరాబాద్ నుంచే దేశంలోని ఏ మారుమూల ప్రాంతంలో ఉన్న రోగికైనా సర్జరీ చేయగలం. ఇది అక్కడి వైద్యులకు శిక్షణ ఇవ్వడానికి కూడా ఉపయోగపడుతుంది.”
– డాక్టర్ వి. చంద్రమోహన్, చీఫ్ యూరాలజిస్ట్

ఇదే టెక్నాలజీతో, మొరాదాబాద్‌లోనే ఓ మహిళకు గర్భసంచి తొలగింపు శస్త్రచికిత్సను కూడా హైదరాబాద్ నుంచే విజయవంతంగా పూర్తిచేశారు. ఈ ఆవిష్కరణలు, గ్రామీణ, మారుమూల ప్రాంతాల్లోని రోగులకు సైతం, నిపుణులైన వైద్యుల సేవలను అందుబాటులోకి తీసుకురానున్నాయి.