India’s response to US tariffs : అగ్రరాజ్యం అమెరికా విసిరిన సుంకాల సవాల్‌కు భారత్ ప్రతివ్యూహం సిద్ధం చేసింది. భారతదేశం నుంచి ఎగుమతి అయ్యే వస్తువులపై 50% సుంకాలను ట్రంప్ సర్కార్ విధించిన నేపథ్యంలో, ఆ సంక్షోభాన్ని అవకాశంగా మార్చుకునేందుకు కేంద్రంలోని మోదీ ప్రభుత్వం సన్నద్ధమవుతోంది. సుమారు రూ.4 లక్షల కోట్ల విలువైన ఎగుమతులపై పడిన ఈ పిడుగుపాటుతో లక్షలాది ఉద్యోగాలు ప్రమాదంలో పడ్డాయి. ఈ సుంకాల సుడిగుండం నుంచి బయటపడేందుకు రాబోయే 72 గంటల్లో కేంద్రం కీలక అడుగులు వేయబోతోంది. 

అత్యవసర సమావేశాలు.. కొత్త మార్కెట్ల వేట: అమెరికా సుంకాల దెబ్బకు తక్షణమే స్పందించిన భారత వాణిజ్య శాఖ, రాబోయే 72 గంటల్లో పారిశ్రామిక, వాణిజ్య వర్గాలతో పాటు ఇతర దేశాల ప్రతినిధులతో అత్యవసర సమావేశాలు నిర్వహించనుంది. ముఖ్యంగా, వస్త్రాలు, దుస్తులు, రొయ్యలు, లెదర్, ఆభరణాల వంటి ఉపాధి ఆధారిత రంగాలపై తీవ్ర ప్రభావం పడనున్న నేపథ్యంలో, ఈ రంగాలకు కొత్త ఊపిరి పోయడంపై ప్రభుత్వం ప్రధానంగా దృష్టి సారించింది.

ఆ 40 దేశాలే కీలకం: అమెరికా మార్కెట్‌లో ఏర్పడిన లోటును పూడ్చుకునేందుకు, భారత్ తన దృష్టిని 40 కీలక దేశాలపై కేంద్రీకరించింది. బ్రిటన్, జపాన్, ఆస్ట్రేలియా, ఐరోపా దేశాలు ఈ జాబితాలో ఉన్నాయి. ఈ దేశాలు ఏటా సుమారు 590 బిలియన్ డాలర్ల విలువైన వస్త్రాలు, దుస్తులను దిగుమతి చేసుకుంటాయి. ఈ భారీ మార్కెట్‌లో మన వాటాను పెంచుకోవడం ద్వారా అమెరికా వల్ల కలిగే నష్టాన్ని భర్తీ చేయాలని ప్రభుత్వం భావిస్తోంది.

వివిధ రంగాలపై ప్రభావం – ప్రభుత్వ వ్యూహం

ఊరటనిస్తున్న ఫార్మా రంగం: ఈ సుంకాల గండం నుంచి భారత ఔషధ రంగానికి మినహాయింపు లభించడం ఒక శుభపరిణామం. సుమారు 27.6 బిలియన్ డాలర్ల విలువైన ఔషధ ఉత్పత్తులు, క్రియాశీల ఔషధ పదార్థాలపై ఈ సుంకాలు వర్తించవు. దీంతో అమెరికాకు మన ఫార్మా ఎగుమతులు యథాతథంగా కొనసాగనున్నాయి.

ఆంధ్రా రొయ్యలకు గండం… కొత్త గమ్యస్థానాల వేట: భారత రొయ్యలపై అమెరికా సుంకాన్ని ఏకంగా 60 శాతానికి పెంచడంతో, ముఖ్యంగా ఆంధ్రప్రదేశ్‌లోని ఆక్వా రైతులు తీవ్ర ఆందోళనలో ఉన్నారు. ఈ సంక్షోభం నుంచి గట్టెక్కేందుకు చైనా, యూరోపియన్ యూనియన్ (ముఖ్యంగా స్పెయిన్), జపాన్ వంటి కొత్త మార్కెట్లతో కేంద్ర ప్రభుత్వం చర్చలు ముమ్మరం చేసింది. ఈ చర్చలు సఫలమైతే రొయ్యల రైతులకు కొత్త భరోసా లభిస్తుంది.

లెదర్, ఆభరణాల పరిశ్రమలకు భరోసా: లెదర్ ఉత్పత్తుల కోసం బ్రిటన్, ఫ్రాన్స్, జర్మనీ మార్కెట్లపై, రత్నాలు, ఆభరణాల కోసం హాంగ్‌కాంగ్, యూఏఈ, బెల్జియం మార్కెట్లపై భారత్ దృష్టి సారించింది. సకాలంలో ఈ దేశాల నుంచి ఆర్డర్లు సాధించగలిగితే, ఈ రంగాల్లోని లక్షలాది మంది కార్మికుల ఉపాధికి ఢోకా ఉండదు.

అమెరికాకు అసలు చెక్… దేశ ప్రజలకు ‘దీపావళి’ కానుక : విదేశీ మార్కెట్లపైనే ఆధారపడకుండా, దేశీయంగా వినియోగాన్ని పెంచడమే ఈ సంక్షోభానికి అసలైన విరుగుడని మోదీ సర్కారు భావిస్తోంది. 140 కోట్ల మంది ప్రజలున్న భారత దేశమే ఒక అతిపెద్ద మార్కెట్. ఈ నేపథ్యంలో, ఈ దీపావళి పండుగ సందర్భంగా ప్రజల కొనుగోలు శక్తిని పెంచేందుకు వస్తు, సేవల పన్ను (జీఎస్టీ)లో భారీ సంస్కరణలకు కేంద్రం సిద్ధమవుతోంది. నిత్యావసరాలు, కార్లు, ఎలక్ట్రానిక్ వస్తువుల వరకు అనేక ఉత్పత్తులను తక్కువ జీఎస్టీ శ్లాబుల్లోకి మార్చి, వాటి ధరలను గణనీయంగా తగ్గించాలని యోచిస్తోంది. ఇది అమలైతే, అమెరికాకు బలమైన సందేశం పంపడంతో పాటు, దేశ ప్రజలకు అతిపెద్ద పండుగ కానుక లభించినట్లే!