Indian economy growth rate 2025 : ప్రపంచం ఆర్థిక మాంద్యం సుడిగుండాన చిక్కుకొని ఉండగా… భారత ఆర్థిక వ్యవస్థ మాత్రం శరవేగంతో దూసుకుపోతుంది. ప్రపంచానికే ఆశాకిరణంగా నిలుస్తూ, ఈ ఆర్థిక సంవత్సరం తొలి త్రైమాసికంలో ఏకంగా 7.8 శాతం వృద్ధిరేటును నమోదు చేసిందని ప్రధానమంత్రి నరేంద్ర మోదీ సగర్వంగా ప్రకటించారు. దిల్లీలోని ప్రతిష్ఠాత్మక ‘యశోభూమి’లో ‘సెమీకాన్ ఇండియా-2025’ సదస్సును ప్రారంభిస్తూ ఆయన చేసిన ఈ వ్యాఖ్యలు, భారత ఆర్థిక సామర్థ్యంపై కొత్త విశ్వాసాన్ని నింపుతున్నాయి. ఇంతకీ, ఈ అద్భుత వృద్ధికి దోహదపడిన కారణాలేంటి..? సెమీకండక్టర్ల రంగంలో భారత్ పాత్ర ఏమిటి..? ఈ సదస్సులో ప్రధాని మోదీ ప్రసంగంలోని ముఖ్యాంశాలేమిటి..?

సెమీకాన్ సదస్సులో ప్రధాని ప్రసంగం: ప్రపంచవ్యాప్తంగా 40 దేశాల ప్రతినిధులు, దిగ్గజ కంపెనీల అధినేతలు హాజరైన ‘సెమీకాన్ ఇండియా-2025’ సదస్సులో ప్రధాని మోదీ తన ప్రసంగంతో నూతనోత్తేజాన్ని నింపారు.

వృద్ధిరేటుతో విశ్వాసం: “ప్రపంచం మొత్తం ఆర్థిక మందగమనంతో సతమతమవుతున్న వేళ, భారత్ మాత్రం తొలి త్రైమాసికంలో 7.8 శాతం జీడీపీ వృద్ధిరేటు సాధించింది. ఇది ప్రపంచానికి భారత్‌పై పెరుగుతున్న నమ్మకానికి నిదర్శనం,” అని ప్రధాని అన్నారు.

మూడో అతిపెద్ద ఆర్థిక వ్యవస్థగా: భారత్ త్వరలోనే ప్రపంచంలోనే మూడో అతిపెద్ద ఆర్థిక వ్యవస్థగా అవతరించనుందని, అన్ని రంగాల్లోనూ సరికొత్త శిఖరాలను అధిరోహిస్తోందని ఆయన ధీమా వ్యక్తం చేశారు.

సెమీకండక్టర్ల హబ్‌గా భారత్: “పోటీ పెరిగినప్పటికీ, సెమీకండక్టర్ల రంగంలో ప్రపంచ దేశాలు భారత్‌తో కలిసి పనిచేసేందుకు ముందుకు వస్తున్నాయి. ఆత్మనిర్భర్ భారత్ యాత్రలో ఇదొక కీలక మైలురాయి,” అని మోదీ పేర్కొన్నారు.

‘విక్రమ్’ చిప్ ఆవిష్కరణ: ఈ సదస్సులో ‘మేకిన్ ఇండియా’ దార్శనికతకు ప్రతిరూపంగా నిలిచే ఓ కీలక ఘట్టం ఆవిష్కృతమైంది.

తొలి స్వదేశీ మైక్రోప్రాసెసర్: ఇస్రోకు చెందిన సెమీకండక్టర్ ల్యాబ్ అభివృద్ధి చేసిన తొలి ‘మేకిన్ ఇండియా’ మైక్రోప్రాసెసర్ చిప్‌ను కేంద్రమంత్రి అశ్వినీ వైష్ణవ్, ప్రధాని మోదీకి అందజేశారు.

‘విక్రమ్’ ప్రత్యేకత: ‘విక్రమ్’ 32-బిట్ ప్రాసెసర్‌గా పిలిచే ఈ చిప్‌ను, అంతరిక్షంలోని వాహకనౌకల్లో అత్యంత కఠినమైన వాతావరణ పరిస్థితులను సైతం తట్టుకునేలా ఇస్రో శాస్త్రవేత్తలు ప్రత్యేకంగా రూపొందించారు. ఇది సెమీకండక్టర్ల రంగంలో భారత స్వావలంబనకు తొలి అడుగుగా నిపుణులు అభివర్ణిస్తున్నారు.

ప్రభుత్వ లక్ష్యం: ఈ సదస్సు ద్వారా, సెమీకండక్టర్ల రూపకల్పన, తయారీ, సరఫరా గొలుసులో భారత్‌ను ఒక కీలకమైన గ్లోబల్ హబ్‌గా మార్చడమే లక్ష్యంగా కేంద్ర ప్రభుత్వం ముందుకు సాగుతోంది. ఈ సదస్సులో కేంద్రమంత్రులు అశ్వినీ వైష్ణవ్, జితిన్ ప్రసాద, దిల్లీ ముఖ్యమంత్రి రేఖా గుప్తా తదితరులు పాల్గొన్నారు.