Rafale Technical Malfunction :భారత్ తన సాయుధ బలగాలకు అండగా నిలిచే అత్యాధునిక రఫేల్ యుద్ధ విమానాలలో ఒకదానిని కోల్పోయిందనే వార్త దేశవ్యాప్తంగా కలకలం రేపింది. అయితే, ఈ నష్టం శత్రువుల దాడి వల్ల కాదని, సాంకేతిక లోపం వల్లే జరిగిందని డస్సాల్ట్ ఏవియేషన్ ఛైర్మన్, సీఈఓ ఎరిక్ ట్రాపియర్ చేసిన వ్యాఖ్యలు ఇప్పుడు చర్చనీయాంశంగా మారాయి. అసలు ఏం జరిగింది? పాకిస్తాన్ ప్రచారానికి, వాస్తవానికి ఉన్న సంబంధం ఏమిటి?
విమానం కూలిపోయింది.. కారణం ఏమిటి : డస్సాల్ట్ ఏవియేషన్ ఛైర్మన్ మరియు సీఈఓ ఎరిక్ ట్రాపియర్ వెల్లడించిన వివరాల ప్రకారం, భారత్ కోల్పోయిన రఫేల్ యుద్ధ విమానం శత్రు దాడి వల్ల గానీ, రాడార్ గుర్తింపు వల్ల గానీ నష్టపోలేదు. అధిక ఎత్తులో, అంటే 12,000 మీటర్ల కంటే ఎక్కువ ఎత్తులో శిక్షణ సమయంలో తలెత్తిన సాంకేతిక లోపం కారణంగా ఈ ప్రమాదం జరిగిందని ఆయన స్పష్టం చేశారు. ఈ ఘటనపై దర్యాప్తు జరుగుతోందని కూడా ట్రాపియర్ పేర్కొన్నారు. ఈ వ్యాఖ్యలు పాకిస్తాన్ చేస్తున్న నిరాధారమైన వాదనలకు చెక్ పెట్టాయి.
సీడీఎస్ అనిల్ చౌహాన్ కీలక వ్యాఖ్యలు: గత నెల (జూన్) సింగపూర్‌లో జరిగిన ఓ కార్యక్రమంలో భారత చీఫ్ ఆఫ్ డిఫెన్స్ స్టాఫ్ (సీడీఎస్) అనిల్ చౌహాన్ చేసిన వ్యాఖ్యలు ఈ ఘటనకు సంబంధించి మరింత స్పష్టతనిచ్చాయి. భారత్, పాక్ మధ్య జరిగిన సైనిక ఘర్షణల్లో భారత వైమానిక దళం (ఐఏఎఫ్) కొన్ని నష్టాలను చవిచూసిందని ఆయన అంగీకరించారు. అయితే, ఎంతమంది యుద్ధ విమానాలకు నష్టం వాటిల్లిందనేది మాత్రం ఆయన వెల్లడించలేదు. కానీ, పాకిస్తాన్ చేస్తున్న ‘భారత్‌కు చెందిన రఫేల్‌తో సహా 6 విమానాలను కూల్చివేశాం’ అనే ప్రచారాన్ని సీడీఎస్ తీవ్రంగా ఖండించారు. అది ‘పూర్తిగా అవాస్తవం’ అని తేల్చి చెప్పారు. భారత దళాలు అనేక సందర్భాల్లో పాక్ గగనతలంలోకి ప్రవేశించాయని కూడా ఆయన స్పష్టం చేశారు. డస్సాల్ట్ సీఈఓ వ్యాఖ్యలు సీడీఎస్ మాటలకు బలం చేకూర్చాయి.
రఫేల్‌పై చైనా కుట్రపూరిత ప్రచారం: భారత్‌ను దెబ్బతీసే యత్నం : ఫ్రాన్స్‌లో తయారైన రఫేల్ యుద్ధ విమానాల విషయంలో చైనా కుట్రపూరితంగా వ్యవహరిస్తోందని ఫ్రాన్స్ సైనిక, నిఘా విభాగం అధికారులు గుర్తించారు. భారత్-పాకిస్తాన్ ఉద్రిక్తతల అనంతరం రఫేల్ పనితీరుపై సందేహాలు రేకెత్తించేందుకు చైనా ప్రయత్నిస్తోందని వారు కనుగొన్నారు. రఫేల్ ఖ్యాతిని, అంతర్జాతీయ విక్రయాలను దెబ్బతీసే లక్ష్యంతో చైనా తన రాయబార కార్యాలయాలను ఉపయోగించుకుంటోందని అనుమానం వ్యక్తం చేశారు. చైనా దౌత్య కార్యాలయాల్లోని రక్షణ శాఖ అధికారులు రఫేల్ యుద్ధక్షేత్రంలో “పేలవంగా పనిచేసింది” అని ప్రచారం చేస్తూ, వాటి అమ్మకాలను అడ్డుకోవాలని చూస్తున్నారని ఫ్రెంచ్ నిఘా వర్గాలు తెలిపాయి. ఇప్పటికే ఆర్డర్ చేసిన దేశాలకు మరిన్ని రఫేల్ విమానాలు కొనుగోలు చేయొద్దని, ఆసక్తి చూపుతున్న ఇతర దేశాలకు చైనా తయారీ యుద్ధవిమానాలను తీసుకునేలా ప్రోత్సహిస్తున్నారని కూడా ఈ వర్గాలు పేర్కొన్నాయి. ఇది ఒక రక్షణ రంగంలో చైనా అనుసరిస్తున్న దుష్టనీతికి అద్దం పడుతోంది.
పహల్గాం ప్రతీకార చర్య, పాక్ ప్రగల్భాలు: వాస్తవాలు వెలుగులోకి : పహల్గాం ఉగ్రదాడికి ప్రతీకారంగా భారత్ చేపట్టిన ‘ఆపరేషన్ సిందూర్’లో భాగంగా పాక్, పాక్ ఆక్రమిత కశ్మీర్‌లోని ఉగ్రవాద స్థావరాలను లక్ష్యంగా చేసుకుని వందలాది మంది ముష్కరులను మట్టుబెట్టింది. ఈ పరిణామంతో భారత్, పాక్ మధ్య ఉద్రిక్త పరిస్థితులు తలెత్తాయి. ఇరు దేశాలు సైనిక చర్యలు చేపట్టగా, భారత్ పాక్ క్షిపణులను విజయవంతంగా కూల్చివేసింది. పాక్ పై భారత్ క్షిపణుల వర్షం కురిపించి తీవ్ర నష్టం మిగిల్చింది. ఆ తర్వాత ఇరు దేశాల మధ్య కాల్పుల విరమణ ఒప్పందం కుదరడంతో పరిస్థితి సద్దుమణిగింది. అయితే, పాకిస్తాన్ మాత్రం ‘భారత్‌పై యుద్ధంలో తామే గెలిచామని’ ప్రగల్భాలు పలుకుతూ సంబరాలు చేసుకుంది. పాక్ ఆర్మీ చీఫ్ అసిం మునీర్‌కు పదోన్నతి సైతం కల్పించింది. అంతేకాకుండా, భారత్‌కు చెందిన రఫేల్ సహా పలు విమానాలను కూల్చివేశామని వాదించింది. అయితే, తాజాగా డస్సాల్ట్ ఏవియేషన్ ఛైర్మన్, సీఈఓ ఎరిక్ ట్రాపియర్ చేసిన వ్యాఖ్యలతో భారత్‌పై పాక్ చేసిన వ్యాఖ్యలు నిరాధారమైనవని మరోసారి స్పష్టమైంది.
