India-US trade deal talks : కొంతకాలంగా నెలకొన్న ప్రతిష్టంభనకు తెరదించుతూ, ప్రపంచంలోని రెండు అతిపెద్ద ప్రజాస్వామ్య దేశాల మధ్య వాణిజ్య చర్చలు మళ్లీ గాడిన పడ్డాయి. భారత్-అమెరికా మధ్య ప్రతిపాదిత వాణిజ్య ఒప్పందంపై చర్చలు సానుకూలంగా జరిగాయని, త్వరలోనే ఇరు పక్షాలకు ప్రయోజనకరమైన ఒప్పందాన్ని కుదుర్చుకోవాలని లక్ష్యంగా పెట్టుకున్నామని కేంద్ర వాణిజ్య మంత్రిత్వ శాఖ ప్రకటించింది. ఇటీవల ఇరు దేశాల అధినేతల మధ్య సానుకూల వాతావరణం నెలకొన్న నేపథ్యంలో, ఈ చర్చలకు ప్రాధాన్యత సంతరించుకుంది. అసలు ఈ చర్చల్లో ఏం జరుగుతోంది…? ఒప్పందం ఎప్పటిలోగా కుదిరే అవకాశం ఉంది…?

సానుకూలంగా సాగిన చర్చలు : ద్వైపాక్షిక వాణిజ్య ఒప్పందంపై చర్చలు జరిపేందుకు, అమెరికా ప్రతినిధి, ప్రధాన చర్చాకర్త బ్రెండన్ లించ్ సోమవారం రాత్రి భారత్‌కు విచ్చేశారు. ఢిల్లీలోని వాణిజ్య భవన్‌లో భారత వాణిజ్య శాఖ సీనియర్ అధికారి రాజేశ్ అగర్వాల్‌తో ఆయన చర్చలు జరిపారు.

“చర్చలు సానుకూలంగా, భవిష్యత్ దృక్పథంతో సాగాయి. పరస్పర ప్రయోజనకరమైన వాణిజ్య ఒప్పందాన్ని త్వరగా పూర్తి చేసేందుకు ప్రయత్నాలను వేగవంతం చేయాలని ఇరు దేశాలు నిర్ణయించాయి,” అని వాణిజ్య మంత్రిత్వ శాఖ అధికారిక ప్రకటనలో తెలిపింది.

అయితే, ఇవి అధికారికంగా ఆరో విడత చర్చలు కావని, కేవలం సన్నాహక సమావేశం మాత్రమేనని ఓ సీనియర్ అధికారి స్పష్టం చేశారు. ఇకపై ఇరు పక్షాలు వారానికొకసారి వర్చువల్‌గా సమావేశమవుతాయని, తదుపరి ప్రత్యక్ష సమావేశ తేదీని త్వరలో నిర్ణయిస్తాయని తెలిపారు.

గతంలో ఎందుకీ ప్రతిష్టంభన : భారత్-అమెరికా మధ్య వాణిజ్య చర్చలు ఈ ఏడాది మార్చి నుంచి జరుగుతున్నా, మధ్యలో కొన్ని అడ్డంకులు ఎదురయ్యాయి.

రష్యా చమురు ప్రభావం: ఉక్రెయిన్ యుద్ధం నేపథ్యంలో, రష్యా నుంచి భారత్ చమురును కొనుగోలు చేస్తుండటంపై అమెరికా అసంతృప్తి వ్యక్తం చేసింది. దీనికి ప్రతిగా, భారత్‌పై 50% సుంకాన్ని విధించడంతో, వాణిజ్య చర్చల్లో అనిశ్చితి నెలకొంది.

రద్దయిన పర్యటన: ఈ సుంకాల ప్రభావంతో, ఆగస్టు 25న జరగాల్సిన అమెరికా నిపుణుల బృందం భారత పర్యటన రద్దయింది.

అధినేతల సంకేతాలతో కొత్త ఆశలు : ఇటీవల, భారత ప్రధాని నరేంద్ర మోదీతో మాట్లాడేందుకు ఎదురుచూస్తున్నానంటూ అమెరికా అధ్యక్షుడు ట్రంప్ చేసిన పోస్ట్‌కు, తాను కూడా ఎదురుచూస్తున్నానంటూ మోదీ బదులివ్వడంతో, ఇరు దేశాల మధ్య వాతావరణం మళ్లీ సానుకూలంగా మారింది. ఈ నేపథ్యంలోనే, అమెరికా ప్రతినిధి బ్రెండన్ లించ్ భారత్‌కు రావడం ప్రాధాన్యత సంతరించుకుంది.

భారత వాణిజ్య శాఖ మంత్రి పీయూష్ గోయల్ కూడా ఇటీవల స్పందిస్తూ, చర్చలు సంతృప్తికరంగా ఉన్నాయని, ఈ ఏడాది నవంబర్ నాటికి మొదటి విడత ఒప్పందం పూర్తయ్యే అవకాశం ఉందని ఆశాభావం వ్యక్తం చేశారు.