Indian Railways train cancellations : పండుగ సీజన్‌లో ఊరెళ్దామనుకుంటున్నారా? తీర్థయాత్రలకు, పర్యాటక ప్రాంతాలకు టికెట్లు బుక్ చేసుకున్నారా? అయితే మీ ప్రయాణ ప్రణాళికలను ఓసారి సరిచూసుకోవాల్సిందే. రైల్వే శాఖ చేపడుతున్న భద్రతా పనుల కారణంగా దేశవ్యాప్తంగా 300కు పైగా రైలు ట్రిప్పులు రద్దు కానున్నాయి. మరికొన్ని రైళ్లను దారి మళ్లించనున్నారు. అసలు రైల్వే శాఖ ఈ నిర్ణయం ఎందుకు తీసుకుంది..? ఏయే రైళ్లు రద్దయ్యాయి..? ప్రయాణికులపై దీని ప్రభావం ఎలా ఉండనుంది..?

రైలు ప్రయాణికులకు ఇది నిజంగా చేదువార్తే. ముఖ్యంగా ఝాన్సీ డివిజన్ మీదుగా ప్రయాణించే వారికి ఇబ్బందులు తప్పవు. భారతీయ రైల్వే చేపడుతున్న కీలకమైన భద్రతా అప్‌గ్రేడ్ పనుల కారణంగా, వివిధ మెయిల్, ఎక్స్‌ప్రెస్, ప్యాసింజర్ రైళ్లకు సంబంధించిన 300కు పైగా ట్రిప్పులను రద్దు చేస్తున్నట్లు రైల్వే శాఖ ప్రకటించింది. దీంతో ఇప్పటికే అడ్వాన్స్ బుకింగ్ చేసుకున్న లక్షలాది మంది ప్రయాణికులు అయోమయంలో పడిపోయారు.

ఎందుకీ రద్దు? రైల్వే ఏం చెబుతోంది : ఈ భారీ రద్దులపై నార్త్ సెంట్రల్ రైల్వే చీఫ్ పబ్లిక్ రిలేషన్స్ ఆఫీసర్ శశికాంత్ త్రిపాఠి స్పందిస్తూ, ప్రయాణికుల భద్రతే తమకు ప్రథమ ప్రాధాన్యమని తెలిపారు. “సురక్షితమైన రైలు కార్యకలాపాల కోసం రైల్వే స్టేషన్లలో ‘బ్యాలస్ట్ లేని ట్రాక్‌ల’ను ఏర్పాటు చేస్తున్నాం. సాంప్రదాయ ట్రాక్‌ల కింద వర్షపు నీరు నిలిచిపోయి, కాలక్రమేణా ట్రాక్ బేస్‌ను బలహీనపరుస్తుంది. కానీ, ఈ కొత్త టెక్నాలజీతో నిర్మించే ట్రాక్‌ల కింద నీరు నిల్వ ఉండదు. పటిష్టమైన డ్రైనేజీ వ్యవస్థ ద్వారా నీరు బయటకు వెళ్లిపోతుంది. దీనివల్ల ట్రాక్‌ల భద్రత పెరగడమే కాకుండా, భద్రత రెట్టింపు అవుతుంది,” అని ఆయన వివరించారు.

నవంబర్ 25 నుంచి జనవరి 8 వరకు పనులు : ఈ ఆధునీకరణ పనులు ఈ ఏడాది నవంబర్ 25న ప్రారంభమై, వచ్చే ఏడాది జనవరి 8 వరకు కొనసాగుతాయి. ఈ 45 రోజుల పాటు రైళ్ల రాకపోకలపై తీవ్ర ప్రభావం ఉండనుంది.

రద్దయిన కొన్ని ముఖ్యమైన రైళ్లు:
రైలు నెం. 11901: వీరాంగన లక్ష్మీబాయి (ఝాన్సీ) – ఆగ్రా కాంట్ (నవంబర్ 26 – జనవరి 9)
రైలు నెం. 11902: ఆగ్రా కాంట్ – వీరాంగన లక్ష్మీబాయి (ఝాన్సీ) (నవంబర్ 25 – జనవరి 8)
రైలు నెం. 11903: వీరాంగన లక్ష్మీబాయి (ఝాన్సీ) – ఇటావా (నవంబర్ 25 – జనవరి 8)
రైలు నెం. 11904: ఇటావా – వీరాంగన లక్ష్మీబాయి (ఝాన్సీ) (నవంబర్ 26 – జనవరి 9)
రైలు నెం. 07075: హైదరాబాద్ – గోరఖ్‌పుర్ (వారానికి ఒకసారి) (నవంబర్ 28 – జనవరి 2)
రైలు నెం. 07076: గోరఖ్‌పుర్ – హైదరాబాద్ (వారానికి ఒకసారి) (నవంబర్ 30 – జనవరి 4)
వీటితో పాటు పలు MEMU ప్యాసింజర్ రైళ్లను కూడా పూర్తిగా రద్దు చేశారు.

ప్రయాణికుల ఆవేదన.. విమాన ఛార్జీల మోత : రైల్వే నిర్ణయంపై ప్రయాణికులు మిశ్రమంగా స్పందిస్తున్నారు. “భద్రత కోసం మంచి పనులు చేస్తున్నారనడం సంతోషమే, కానీ పండుగలు, పెళ్లిళ్ల సీజన్‌లో ముందస్తు ప్రణాళిక లేకుండా ఇన్ని రైళ్లను రద్దు చేయడం వల్ల మాలాంటి మధ్యతరగతి ప్రజలు తీవ్రంగా నష్టపోతారు. విమాన ప్రయాణ ఖర్చులు భరించలేం కదా,” అని దిల్లీకి చెందిన ప్రయాణికుడు మధుసూదన్ శర్మ ఆవేదన వ్యక్తం చేశారు. మరోవైపు, ఈ రద్దుల ప్రభావంతో విమాన టికెట్ల ధరలకు రెక్కలొచ్చాయి. సాధారణ రోజుల్లో రూ.7,000 ఉండే ప్రయాగ్‌రాజ్ – బెంగళూరు విమాన టికెట్ ధర, దీపావళి నేపథ్యంలో ఏకంగా రూ.17,000కు చేరింది. రైళ్ల రద్దుతో ఈ ధరలు మరింత పెరిగే అవకాశం ఉందని విశ్లేషకులు భావిస్తున్నారు.