India Traditional Medicine Digitalization Leadership: భారతదేశం మరో అరుదైన మైలురాయిని అధిగమించింది. శతాబ్దాల నాటి ప్రాచీన వైద్య విధానాలను ఆధునిక ఆర్టిఫిషియల్ ఇంటెలిజెన్స్‌తో (AI) మేళవించి, ‘డిజిటల్ లైబ్రరీ’గా మార్చిన తొలి దేశంగా భారత్ చరిత్ర సృష్టించింది. ఈ అనూహ్య పురోగతిని ప్రపంచ ఆరోగ్య సంస్థ (WHO) స్వయంగా వెల్లడించి, భారత్‌ను ప్రశంసల జల్లులో ముంచెత్తింది. అసలు భారత్ ఎలా ఈ ఘనతను సాధించింది? ఈ ‘ట్రెడిషనల్ నాలెడ్జ్ డిజిటల్ లైబ్రరీ’ (TKDL) ప్రాముఖ్యత ఏమిటి? దీని వల్ల కలిగే ప్రయోజనాలేమిటి? తెలుసుకోవాలంటే …

WHO ప్రశంసల వెనుక అసలు కథ:

  ప్రపంచ ఆరోగ్య సంస్థ ఇటీవల విడుదల చేసిన ‘మ్యాపింగ్ ది అప్లికేషన్ ఆఫ్ ఆర్టిఫిషియల్ ఇంటెలీజెన్స్ ఇన్ ట్రెడిషనల్ మెడిసిన్’ శీర్షికన సంప్రదాయ వైద్య విధానాలపై AI కార్యాచరణ ప్రణాళికలో భారత్ సాధించిన ఈ అద్భుత ఘనతను ప్రత్యేకంగా ప్రస్తావించింది. ఆయుర్వేద, సిద్ధ, యునాని, సోవా రిగ్పా, హోమియోపతి వంటి ప్రాచీన వైద్య విధానాలకు సంబంధించిన సమాచారాన్ని ‘ట్రెడిషనల్ నాలెడ్జ్ డిజిటల్ లైబ్రరీ’ (TKDL) ద్వారా డిజిటల్ రూపంలోకి తెచ్చిన తొలి దేశం భారతేనని WHO కొనియాడింది. కేవలం డిజిటలైజ్ చేయడమే కాకుండా, ఇందులోని విలువైన ప్రాచీన సమాచారాన్ని ప్రతీ వైద్య నిపుణుడు అర్ధవంతంగా తెలుసుకునేందుకు ప్రత్యేక AI టూల్స్‌ను భారత్ అందుబాటులోకి తెచ్చిందని పేర్కొంది. ఇది సంప్రదాయ వైద్యానికి ఆధునిక సాంకేతికతను జోడించి, సరికొత్త అధ్యాయాన్ని ప్రారంభించినట్లైంది.

ఆయుష్ మంత్రిత్వ శాఖ ఆనందం.. కేంద్ర సంకల్పం:

WHO చేసిన ఈ ప్రకటనను భారత ఆయుష్ మంత్రిత్వ శాఖ హర్షం వ్యక్తం చేసింది. డిజిటల్ ఆరోగ్య రంగంలో నూతన ఆవిష్కరణలతో, ప్రాచీన వైద్య విధానాల పరిరక్షణతో భవిష్యత్ తరాల ఆరోగ్యాన్ని సుసంపన్నం చేయాలన్న మోడీ ప్రభుత్వ ప్రగాఢ సంకల్పానికి ఈ పురోగతి అద్దం పడుతోంది. సంప్రదాయ ఔషధాల వినియోగ సమాచారాన్ని AIతో సమీకృతం చేయాలనే WHO కార్యాచరణ ప్రణాళికకు భారత్ మార్గదర్శిగా నిలిచిందని పేర్కొంది. ప్రాచీన వైద్య పద్ధతులను ప్రోత్సహించేందుకు ఒక శాస్త్రీయమైన వ్యవస్థను అందుబాటులోకి తేవాలనే బలమైన సంకల్పంతో కేంద్ర సర్కారు ముందుకుసాగుతోందని ఆయుష్ శాఖ వెల్లడించింది.

భారత్ సాధించిన AI పురోగతి: WHO నివేదిక నుండి కీలక అంశాలు:

 WHO తన నివేదికలో భారత్ సాధించిన AI పురోగతిని పలు అంశాల్లో ప్రశంసించింది. అవేంటంటే..

మార్కెట్‌లో భారత్ ప్రభావం:

ప్రపంచ సంప్రదాయ ఔషధ చికిత్సా మార్కెట్‌లో భారత్ ప్రభావం గణనీయంగా పెరుగుతోందని WHO గుర్తించింది.

AI, ఆయుష్‌లలో కీలక పురోగతి:

AI, ఆయుష్ విభాగాల్లో భారత్ కీలక పురోగతిని సాధించిందని పేర్కొంది.

AI సాఫ్ట్‌వేర్‌ల లభ్యత:

ఆయుర్వేద, సిద్ధ, యునాని, సోవా రిగ్పా, హోమియోపతి వంటి చికిత్సా పద్ధతులపై AI సాఫ్ట్‌వేర్‌లను భారత్ అందుబాటులోకి తెచ్చింది. ఈ చికిత్సలు అందించే క్రమంలో రోగి నాడిని పరిశీలించడం, నాలుకను పరీక్షించడం వంటి రోగ నిర్ధరణ పద్ధతులను ఎలా అనుసరించాలనే సమాచారం ఆయా సాఫ్ట్‌వేర్‌లలో పొందుపరిచారు.

ప్రకృతి మదింపులో AI:

రోగులకు ఆయుర్వేద చికిత్సను అందించే క్రమంలో వాత, పిత్త, కఫ దోషాలను గుర్తిస్తారు. ఇందుకోసం ప్రకృతి మదింపు పరీక్ష చేస్తారు. మెషీన్ లెర్నింగ్ అల్గారిథమ్‌లు, డీప్ న్యూరల్ నెట్‌వర్క్‌లతో ఈ మదింపును చేసేలా టెక్నాలజీని భారత్ అందుబాటులోకి తెచ్చింది.

ఆయుర్ జీనోమిక్స్ కాన్సెప్ట్:

భారత్ తీసుకొచ్చిన ‘ఆయుర్ జీనోమిక్స్’ కాన్సెప్ట్‌ను WHO కొనియాడింది. ఆయుర్వేద సిద్ధాంతాలతో జీనోమిక్స్‌ను మిళితం చేయడం గొప్ప విషయమని పేర్కొంది. జీనోమిక్స్ అనేది జీవరాశుల DNAలు, జన్యువుల గురించి అధ్యయనం చేస్తుంది. ఏయే వ్యాధులు ఎందుకు వస్తాయి? ఎలాంటి ఆరోగ్య సమస్యలకు ఏవిధమైన పరిష్కారాలు ఉంటాయి? అనే ప్రశ్నలకు ఆయుర్వేదం ప్రకారం సమాధానాలను అందించే AI సాఫ్ట్‌వేర్‌లను భారత్ అందుబాటులోకి తెచ్చింది.

ఔషధ ప్రభావాల విశ్లేషణ:

ఆయుర్వేద మూలికా ఔషధాలు రోగి శరీరంపై ఎలాంటి ప్రభావాన్ని చూపిస్తాయి? రోగి జన్యువులపై వాటి ప్రభావం ఎంత? ప్రస్తుత వ్యాధుల చికిత్సకు ఆయుర్వేద ఔషధాలతో ఎంతమేర చికిత్స చేయొచ్చు? అనే వివరాలను AIలో భారత్ పొందుపర్చింది.

TKDL పాత్ర:

‘ట్రెడిషనల్ నాలెడ్జ్ డిజిటల్ లైబ్రరీ’ ఎంతోమంది ఆయుష్ ప్రాక్టీషనర్లకు ఒక దిక్సూచిలా ఉపయోగపడనుంది.

తులనాత్మక అధ్యయనం:

ఆయుర్వేదం, ప్రాచీన చైనా వైద్యం (TCM), యునానిలను తులనాత్మకంగా అధ్యయనం చేసేందుకు ‘ట్రెడిషనల్ నాలెడ్జ్ డిజిటల్ లైబ్రరీ’లోని సమగ్ర సమాచారం ఉపయోగపడుతుంది.

ఔషధ పనితీరు మదింపులో AI:

కృత్రిమ రసాయన సెన్సర్లను అభివృద్ధిచేసి, వాటితో ఆయుర్వేద శాస్త్రంలోని రస, గుణ, వీర్య సూత్రాల ప్రకారం ఔషధాల పనితీరును మదింపు చేసేందుకు AI టెక్నాలజీ దోహదం చేస్తుంది.