Millionaire beggar in Indore : “అయ్యా, ధర్మం చేయండి బాబూ..” అంటూ దీనంగా అడిగే బిచ్చగాడిని చూస్తే ఎవరికైనా జాలి కలుగుతుంది. కానీ, మీరు జాలిపడి దానం చేసే ఆ బిచ్చగాడు, మీకంటే పెద్ద కోటీశ్వరుడైతే..? అతనికి మూడు మేడలు, సొంత కారు, వడ్డీ వ్యాపారం ఉంటే..? వినడానికి సినిమా కథలా ఉన్నా, మధ్యప్రదేశ్‌లోని ఇందౌర్‌లో వెలుగుచూసిన ఈ నిజ జీవిత ఘటన, అధికారులనే నివ్వెరపోయేలా చేసింది. అసలు ఎవరీ మంగీలాల్…? అతని ఆస్తుల చిట్టా ఏంటి.?

దేశంలోనే అత్యంత పరిశుభ్ర నగరంగా పేరుగాంచిన ఇందౌర్‌ను, ‘బిచ్చగాళ్లు లేని నగరం’గా మార్చేందుకు, అధికారులు ప్రత్యేక డ్రైవ్ నిర్వహిస్తున్నారు. ఈ క్రమంలో, నగరంలోని ప్రఖ్యాత సరాఫా బజార్‌లో చక్రాల బండిపై భిక్షాటన చేస్తున్న మంగీలాల్ అనే వికలాంగ బిచ్చగాడిని అదుపులోకి తీసుకున్నారు. అతన్ని విచారించగా, దిమ్మతిరిగే నిజాలు బయటపడ్డాయి.

అధికారుల కళ్లు బైర్లు కమ్మిన ఆస్తుల చిట్టా : మంగీలాల్ సాదాసీదా బిచ్చగాడు కాదు, అక్షరాలా ఓ వ్యాపార సామ్రాజ్యాన్నే నడుపుతున్నాడు.
మూడు మేడలు: ఇందౌర్ నగరంలోనే అతనికి మూడు పక్కా ఇళ్లు ఉన్నాయి. ఒకటి మూడంతస్తుల భవనం, మరొకటి 600 చదరపు అడుగుల ఇల్లు, ఇంకొకటి రెడ్ క్రాస్ సొసైటీ నుంచి ఉచితంగా పొందిన వన్ బీహెచ్‌కే ఫ్లాట్. అతను భిక్షాటన చేసే సరాఫా బజార్‌లోని బంగారం వ్యాపారులకే, వారం, రోజువారీ వడ్డీలకు అప్పులు ఇస్తుంటాడు.

సొంత కారు, డ్రైవర్: భిక్షాటనకు చక్రాల బండి వాడినా, సొంత పనులకు వెళ్లడానికి అతనికి ఓ ‘స్విఫ్ట్ డిజైర్’ కారు ఉంది. దానికోసం, నెలకు రూ.12,000 జీతంతో ఓ డ్రైవర్‌ను కూడా పెట్టుకున్నాడు. వీటికి అదనంగా నగరంలో మూడు ఆటోలను కొనుగోలు చేసి, వాటిని అద్దెకు తిప్పుతూ అదనపు ఆదాయం గడిస్తున్నాడు. కేవలం భిక్షాటన ద్వారానే, రోజుకు కనీసం రూ.500కు పైగా సంపాదిస్తున్నాడు.

“సరాఫా ప్రాంతంలో ఓ బిచ్చగాడి గురించి మాకు సమాచారం అందింది. విచారణలో అతని ఆస్తుల చిట్టా చూసి మేమే షాక్ అయ్యాం. అతనిపై మరింత లోతుగా దర్యాప్తు చేస్తున్నాం.”
– దినేష్ మిశ్రా, రెస్క్యూ టీమ్ నోడల్ ఆఫీసర్

‘బిచ్చగాళ్లు లేని ఇందౌర్’ : ఈ ఘటన, ఇందౌర్ అధికారులు చేపట్టిన ‘బిచ్చగాళ్లు లేని నగరం’ ప్రచారం యొక్క ఆవశ్యకతను మరోసారి స్పష్టం చేస్తోంది. ఈ క్యాంపెయిన్‌లో భాగంగా, ఇప్పటివరకు 6,500 మంది బిచ్చగాళ్లను గుర్తించి, వారిలో చాలామందికి పునరావాసం కల్పించారు. 172 మంది పిల్లలను పాఠశాలల్లో చేర్పించారు. మంగీలాల్ వంటి వారి వల్ల, నిజంగా సహాయం అవసరమైన వారికి అన్యాయం జరుగుతోందని అధికారులు అభిప్రాయపడుతున్నారు.