ISRO’s milestones in 2025 : ఒకే ఏడాది.. 200కు పైగా చారిత్రక విజయాలు! భారత అంతరిక్ష పరిశోధనా సంస్థ (ఇస్రో), 2025లో సరికొత్త చరిత్రను లిఖించింది. ప్రధాని నరేంద్ర మోదీ దార్శనిక నాయకత్వంలో, ఈ ఒక్క ఏడాదిలోనే భారత అంతరిక్ష రంగం అద్భుతమైన పురోగతిని సాధించిందని ఇస్రో ఛైర్మన్ వి. నారాయణన్ గర్వంగా ప్రకటించారు. ఆదిత్య ఎల్-1 డేటా విడుదల నుంచి, స్పేస్ డాకింగ్‌లో ప్రపంచ రికార్డు వరకు.. ఇస్రో సాధించిన విజయాలేంటి? ప్రతిష్ఠాత్మక గగన్‌యాన్ ప్రాజెక్ట్ ఏ దశలో ఉంది..?

 బెంగళూరులో జరిగిన ‘ఎమర్జింగ్ సైన్స్, టెక్నాలజీ అండ్ ఇన్నోవేషన్ కాంక్లేవ్ – 2025’ (ESTIC-2025) సన్నాహక కార్యక్రమంలో ఇస్రో ఛైర్మన్ వి. నారాయణన్ పాల్గొన్నారు. ఈ సందర్భంగా, 2025లో ఇస్రో సాధించిన విజయాల పరంపరను ఆయన వివరించారు.

2025 – విజయాల సంవత్సరం :
“ప్రధాని మోదీ నేతృత్వంలో, జనవరి నుంచి ఇప్పటి వరకు 200కు పైగా కీలక మైలురాళ్లను అధిగమించాం.”
– వి. నారాయణన్, ఇస్రో ఛైర్మన్

ఆదిత్య ఎల్-1 డేటా: సూర్యుడిని అధ్యయనం చేస్తున్న ఆదిత్య ఎల్-1 మిషన్, ఇప్పటివరకు 15 టెరాబైట్ల (TB) విలువైన శాస్త్రీయ డేటాను పంపింది. దీనిని ప్రపంచ పరిశోధకులకు అందుబాటులో ఉంచారు.

స్పేస్ డాకింగ్ రికార్డు: జనవరి 16న, ‘స్పేడెక్స్’ ప్రయోగంలో భాగంగా, గంటకు 28,400 కి.మీ. వేగంతో ప్రయాణిస్తున్న రెండు ఉపగ్రహాలను విజయవంతంగా అనుసంధానం (డాకింగ్) చేశారు. ఈ ఘనత సాధించిన నాలుగో దేశంగా భారత్ చరిత్ర సృష్టించింది.
శ్రీహరికోట నుంచి 100వ ప్రయోగం: జనవరి 29న జీఎస్‌ఎల్‌వీ-ఎఫ్15 మిషన్‌ను విజయవంతంగా ప్రయోగించడం ద్వారా, శ్రీహరికోటలోని సతీశ్ ధావన్ స్పేస్ సెంటర్ నుంచి 100వ ప్రయోగాన్ని పూర్తిచేశారు.

మూడో లాంచ్‌ప్యాడ్‌కు ఆమోదం: తమిళనాడులో రూ.400 కోట్లతో మూడో లాంచ్‌ప్యాడ్ నిర్మాణానికి ప్రభుత్వం ఆమోదం తెలిపింది. భారత వ్యోమగాములను అంతరిక్షంలోకి పంపే ప్రతిష్ఠాత్మక గగన్‌యాన్ ప్రాజెక్ట్ పనులు చివరి దశకు చేరుకున్నాయని ఛైర్మన్ వెల్లడించారు.

“ప్రాజెక్టుకు సంబంధించిన 85-90% పనులు పూర్తయ్యాయి. ప్రస్తుతం అంతర్గత, సాఫ్ట్‌వేర్ పరీక్షలు జరుగుతున్నాయి,” అని ఆయన తెలిపారు. దీనికి ముందు, మూడు మానవ రహిత మిషన్లను చేపట్టనున్నట్లు స్పష్టం చేశారు. అలాగే, ‘బ్లూబర్డ్’ కమ్యూనికేషన్ ఉపగ్రహం ప్రయోగానికి సిద్ధంగా ఉందని, ఈ ఏడాది చివరి నాటికి ప్రధాని మోదీ సరైన సమయంలో దీనిని ప్రారంభిస్తారని తెలిపారు. చంద్రయాన్-4 మిషన్‌కు కూడా సన్నాహాలు జరుగుతున్నాయని వెల్లడించారు. ఈ ప్రాజెక్టులన్నీ, అంతరిక్ష రంగంలో భారత ‘ఆత్మనిర్భరత’కు నిలువుటద్దాలని ఆయన అన్నారు.