Jagdeep Dhankhar : భారత మాజీ ఉపరాష్ట్రపతి జగదీప్ ధన్‌ఖడ్, రాజస్థాన్ మాజీ ఎమ్మెల్యేగా తనకు రావాల్సిన పెన్షన్ కోసం దరఖాస్తు చేసుకున్నారు. దేశంలో రెండో అత్యున్నత పదవిని అలంకరించిన ఆయన, ఇప్పుడు ఎమ్మెల్యే పెన్షన్ కోసం దరఖాస్తు చేయడం చర్చనీయాంశమైంది. రాజస్థాన్ అసెంబ్లీ సెక్రటేరియట్ ఆయన దరఖాస్తును స్వీకరించి పరిశీలిస్తోంది. అసెంబ్లీ స్పీకర్ వాసుదేవ్ దేవనాని ఈ విషయాన్ని ధ్రువీకరించారు. నిబంధనల ప్రకారం, అవసరమైన ప్రక్రియలు పూర్తయిన తర్వాత ధన్‌ఖడ్‌కు పెన్షన్ మంజూరు కానుంది.
ALSO READ: Telangana Assembly : తెలంగాణ అసెంబ్లీలో మాగంటి గోపీనాథ్‌కు సంతాపం, సమావేశాలు రేపటికి వాయిదా
రాజస్థాన్ నిబంధనల ప్రకారం, మాజీ ఎమ్మెల్యేలకు నెలకు రూ. 35,000 పెన్షన్ లభిస్తుంది. 70 ఏళ్లు దాటిన వారికి 20 శాతం అదనం ఉంటుంది. 74 ఏళ్ల ధన్‌ఖడ్‌కు ఈ అదనపు ప్రయోజనంతో నెలకు సుమారు రూ. 42,000 పెన్షన్ అందనుంది. భవిష్యత్తులో ఆయన 80 ఏళ్లు దాటితే, పెన్షన్ మొత్తం మరింత పెరుగుతుంది.
జగదీప్ ధన్‌ఖడ్ 1993 నుంచి 1998 వరకు అజ్మీర్ జిల్లాలోని కిషన్‌గఢ్ నియోజకవర్గం నుంచి కాంగ్రెస్ టికెట్‌పై ఎమ్మెల్యేగా గెలిచారు. ఆ సమయంలో అసెంబ్లీ రూల్స్ కమిటీలో సభ్యుడిగా పనిచేశారు. ఆ తర్వాత లోక్‌సభ సభ్యుడిగా, కేంద్ర మంత్రిగా, 2022లో ఉపరాష్ట్రపతిగా ఉన్నత స్థాయికి చేరారు. ఇప్పుడు ఆయన రాజస్థాన్ మాజీ ఎమ్మెల్యేల పెన్షన్ జాబితాలో చేరనున్నారు. ఈ నిర్ణయం ఆయన రాజకీయ జీవితంలో మరో మైలురాయిగా నిలుస్తుంది.
