Pinarayi Vijayan :కేరళ రాష్ట్ర అవతరణ దినోత్సవం ‘కేరళ పిరవి’ సందర్భంగా, రాష్ట్ర ముఖ్యమంత్రి పినరయి విజయన్ శనివారం అసెంబ్లీలో ఒక చారిత్రక ప్రకటన చేశారు. కేరళ ఇప్పుడు తీవ్ర పేదరికం నుంచి విముక్తి పొందింది అని ఆయన ప్రకటించారు, ఇది రాష్ట్ర సామాజిక అభివృద్ధిలో ఒక కీలక ఘట్టం.
ఈ ప్రకటనకు ఆధారం, రాష్ట్రంలో 2021లో ప్రారంభించిన తీవ్ర పేదరిక నిర్మూలన ప్రాజెక్టు (EPEP). దీని అమలుకు కుటుంబశ్రీ మహిళా నెట్‌వర్క్‌లు, ఆశా-అంగన్వాడీ కార్యకర్తలు మరియు స్థానిక సంస్థలు కీలక పాత్ర పోషించాయి. తొలి సర్వేలో రాష్ట్ర జనాభాలో దాదాపు 0.2% మంది (64,006 కుటుంబాలు) తీవ్ర పేదరికంలో ఉన్నట్లు గుర్తించారు.
వీరి కోసం ప్రభుత్వం వ్యక్తిగత సూక్ష్మ ప్రణాళికలు రూపొందించింది. ఇవి గృహనిర్మాణం, భూమి లేమి, దీర్ఘకాలిక అనారోగ్య సమస్యలు, ఆదాయం లేకపోవడం వంటి నిర్దిష్ట సవాళ్లను పరిష్కరించాయి.
ప్రభుత్వ డేటా:
5,422 కొత్త ఇళ్లు నిర్మాణం, 5,522 ఇళ్ల పునరుద్ధరణ.
439 కుటుంబాలకు 28.32 ఎకరాల భూమి పంపిణీ.
34,672 కుటుంబాలకు అదనంగా రూ. 77 కోట్ల ఆదాయం లభించింది.
ఆరోగ్య సేవల్లో భాగంగా వేలాది మందికి ఉపశమన సంరక్షణ, సహాయక పరికరాలు అందించారు.20,648 కుటుంబాలకు రోజువారీ భోజనం అందించబడింది.
కేరళ జనాభాలో కేవలం 0.55% మంది మాత్రమే బహుమితీయ పేదరికంలో ఉన్నారని నీతి ఆయోగ్ 2023 MPI నివేదిక ధృవీకరించింది, ఇది దేశంలోనే అత్యల్పం.అయితే, కాంగ్రెస్ నేతృత్వంలోని యునైటెడ్ డెమోక్రటిక్ ఫ్రంట్ (UDF) ప్రతిపక్షం ఈ వాదనను మోసం అని కొట్టిపారేసింది. ప్రతిపక్ష విమర్శలను తోసిపుచ్చిన ముఖ్యమంత్రి విజయన్, మేము అమలు చేయగలిగిన వాటిని మాత్రమే చెప్పాము, చెప్పిన వాటిని అమలు చేసి చూపించామని బదులిచ్చారు.
ఈ చారిత్రక ప్రకటనను రాష్ట్ర అవతరణ దినోత్సవం సందర్భంగా అధికారికంగా ప్రకటించడానికి బాలీవుడ్ మరియు మలయాళ దిగ్గజాలు మమ్ముట్టి, మోహన్ లాల్, కమల్ హాసన్ ప్రత్యేక అతిథులుగా హాజరవుతారు.
