Mallikarjun Kharge criticises PM Modi: ప్రధానమంత్రి నరేంద్ర మోదీపై కాంగ్రెస్ జాతీయ అధ్యక్షుడు మల్లికార్జున ఖర్గే తీవ్రస్థాయిలో విమర్శనాస్త్రాలు సంధించారు. ప్రపంచ దేశాల చుట్టూ ప్రదక్షిణలు చేసే ప్రధానికి, ఏడాదికి పైగా జాతుల ఘర్షణతో అట్టుడుకుతున్న సొంత రాష్ట్రం మణిపుర్‌ను సందర్శించేందుకు తీరిక లేదా అని సూటిగా ప్రశ్నించారు. కర్ణాటకలోని మైసూరులో రూ. 2,500 కోట్లతో చేపట్టిన పలు అభివృద్ధి పనుల ప్రారంభోత్సవంలో పాల్గొన్న ఆయన, బీజేపీ మరియు ఆర్‌ఎస్‌ఎస్‌లు రాజ్యాంగాన్ని మార్చేందుకు చేస్తున్న ప్రయత్నాలను దేశ ప్రజలు సహించరని హెచ్చరించారు. అదే సమయంలో, గాంధీ కుటుంబంపై కక్ష సాధింపు చర్యల్లో భాగంగానే ప్రియాంకా గాంధీ భర్త రాబర్ట్ వాద్రాపై ఈడీ ఛార్జిషీట్ దాఖలు చేశారని ఆరోపించారు. 

మణిపుర్‌పై మౌనమెందుకు:

“ప్రధాని మోదీ ఇప్పటివరకు 42 దేశాల్లో పర్యటించారు, కానీ ఏడాదికి పైగా జాతి వైరంతో రగిలిపోతున్న మణిపుర్‌ను ఒక్కసారి కూడా సందర్శించలేదు” అని ఖర్గే చురకలు అంటించారు. మణిపుర్‌లో శాంతిభద్రతలను నెలకొల్పడంలో కేంద్రం విఫలమైందని, అక్కడి ప్రజల ఆవేదనను పట్టించుకోవడం లేదని ఆయన ఆరోపించారు.

రాజ్యాంగంపై దాడి: బీజేపీ, ఆర్‌ఎస్‌ఎస్‌లు రాజ్యాంగాన్ని మార్చడానికి కుట్ర పన్నుతున్నాయని ఖర్గే తీవ్ర ఆరోపణలు చేశారు. “ఈ దేశ ప్రజలు బీజేపీ, ఆర్‌ఎస్‌ఎస్‌లను రాజ్యాంగాన్ని మార్చడానికి ఎప్పటికీ అనుమతించరు. ఆ రాజ్యాంగం కల్పించిన హక్కుల వల్లే నరేంద్ర మోదీ ఒకప్పుడు ముఖ్యమంత్రి, ఇప్పుడు ప్రధానమంత్రి కాగలిగారు” అని ఆయన గుర్తుచేశారు.

వాద్రాపై కక్ష సాధింపు:

రాబర్ట్ వాద్రాపై ఎన్‌ఫోర్స్‌మెంట్ డైరెక్టరేట్ (ఈడీ) ఛార్జిషీట్ దాఖలు చేయడాన్ని కాంగ్రెస్ అధినేత మల్లికార్జున్ ఖర్గే తీవ్రంగా దుయ్యబట్టారు. ప్రియాంకా గాంధీ భర్త అయిన వాద్రాపై ఈడీ చర్యలు కేవలం రాజకీయ కక్ష సాధింపు చర్యలేనని ఖర్గే స్పష్టం చేశారు. ఇది కేంద్ర ప్రభుత్వ రాజకీయ కుట్రలో భాగమేనని ఆయన ఆరోపించారు. వాద్రాను అనవసరంగా వేధిస్తున్నారని, కాంగ్రెస్ పార్టీని లక్ష్యంగా చేసుకునే ఈడీ ఇలా వ్యవహరిస్తోందని విమర్శించారు.

రాహుల్ గాంధీ అండ:

అంతకుముందు, కాంగ్రెస్ అగ్రనేత రాహుల్ గాంధీ కూడా తన బావ రాబర్ట్ వాద్రాకు మద్దతుగా నిలిచారు. పదేళ్లుగా బీజేపీ ప్రభుత్వం తమ కుటుంబాన్ని వేధిస్తోందని, రాజకీయ దురుద్దేశంతో పెట్టిన ఈ కేసును ఎదుర్కొనేందుకు ప్రియాంక, రాబర్ట్‌లకు తాను అండగా ఉంటానని భరోసా ఇచ్చారు.

ఏమిటీ షికోపుర్ భూముల కేసు: 

హరియాణాలోని గురుగ్రామ్, షికోపుర్‌లో 2008లో జరిగిన భూ ఒప్పందానికి సంబంధించిన మనీలాండరింగ్ కేసులో ఈడీ వాద్రాపై ఛార్జిషీట్ దాఖలు చేసింది.  వాద్రాకు చెందిన స్కైలైట్ హాస్పిటాలిటీ అనే సంస్థ, ఓంకారేశ్వర్ ప్రాపర్టీస్ నుంచి 3.5 ఎకరాల భూమిని రూ. 7.5 కోట్లకు కొనుగోలు చేసిన కొద్ది కాలానికే డీఎల్‌ఎఫ్‌కు రూ. 58 కోట్లకు విక్రయించినట్లు ఈడీ ఆరోపిస్తోంది. ఈ వ్యవహారంలో అవకతవకలు జరిగాయని, వాద్రా అక్రమంగా లబ్ధి పొందారని కేసు నమోదు చేసింది.