కేంద్రప్రభుత్వం వక్ఫ్ చట్ట సవరణ బిల్లు(Waqf Amendment Bill)ను లోక్‌సభలో ప్రవేశపెట్టిన సంగతి తెలిసిందే. కేంద్ర మైనార్టీ వ్యవహారాల మంత్రి కిరణ్ రిజిజు బిల్లు ప్రవేశపెట్టిన అనంతరం ప్రసంగించారు. ఈ బిల్లుపై అన్ని వర్గాల అభిప్రాయాలు తీసుకున్నామని తెలిపారు. 1954లో తొలిసారి వక్ఫ్ చట్టం అమల్లోకి వచ్చిందని.. అప్పుడు అప్రజాస్వామికం అని ఎవరూ చెప్పలేదని పేర్కొన్నారు. యూపీఏ హయాంలోనూ వక్ఫ్ చట్టంలో సవరణలు జరిగాయని గుర్తుచేశారు.
అది మిగతా చట్టాలపై ప్రభావం చూపిందని.. అందుకే మళ్లీ సవరణలు చేయాల్సి వచ్చిందన్నారు. చట్టంలో సానుకూల మార్పులు తీసుకొస్తుంటే ఎందుకు విపక్షాలు విమర్శలు చేస్తున్నాయని ఆయన మండిపడ్డారు. అసత్య ప్రచారం చేస్తూ ప్రజలను తప్పుదోవ పట్టిస్తున్నాయని విమర్శించారు. ఈ బిల్లును తీసుకురాకపోతే.. పార్లమెంట్ భూమిని కూడా వక్ఫ్ ఆస్తిగా చెబుతారని వివరించారు. ఓవైపు రిజిజు ప్రసంగం కొనసాగుతుండగానే.. మరోవైపు విపక్షాలు దీనిని వ్యతిరేకిస్తున్నాయి.
కాగా ఈ బిల్లుపై దాదాపు 8 గంటల పాటు చర్చించనున్నారు. అనంతరం ఓటింగ్‌ నిర్వహించనున్నారు. సభలో ఎన్డీయేకు మెజార్టీ ఉండటంతో బిల్లు సునాయాసంగా ఆమోదం పొందనుంది. లోక్‌సభలో బిల్లు ఆమోదం అనంతరం రాజ్యసభలో ప్రవేశపెట్టనున్నారు. ఈ నేపథ్యంలో వచ్చే మూడు రోజుల పాటు ఎంపీలందరూ తప్పకుండా పార్లమెంట్‌కు హాజరుకావాలని ఎన్డీయే, ఇండియా కూటమి పార్టీలు తమ ఎంపీలకు విప్ జారీ చేశాయి.
