Ajit Pawar Plane Crash Revelation : విధి రాతను మార్చలేం.. కానీ కొన్నిసార్లు అదృష్టం మృత్యువు ముఖం నుంచి మనల్ని వెనక్కి లాగుతుంది. సరిగ్గా ఇలాంటి అనుభవమే తనకు ఎదురైందంటూ మహారాష్ట్ర మాజీ మంత్రి, రాష్ట్రీయ సమాజ్ పక్ష (RSP) అధినేత మహాదేవ్ జంకర్ సంచలన విషయాలు వెల్లడించారు. యావత్ దేశాన్ని దిగ్భ్రాంతికి గురిచేసిన మహారాష్ట్ర ఉపముఖ్యమంత్రి అజిత్ పవార్ విమాన ప్రమాద ఘటనలో, తాను కూడా బాధితుడిగా మారాల్సిందని, కానీ తృటిలో తప్పించుకున్నానని ఆయన పేర్కొన్నారు. అజిత్ పవార్తో ఉన్న సాన్నిహిత్యం, ఆ రోజు జరిగిన చివరి సంభాషణ, ప్రమాదానికి ముందు చోటుచేసుకున్న పరిణామాలను జంకర్ మీడియా ముందు ఏకరువు పెట్టారు. మరోవైపు ఈ ప్రమాదంపై రాజకీయ రచ్చ మొదలవడంతో, ఎన్సీపీ కురువృద్ధుడు శరద్ పవార్ రంగంలోకి దిగి కీలక వ్యాఖ్యలు చేశారు.
ఆ పిలుపే చివరిది అవుతుందనుకోలేదు : మహారాష్ట్ర రాజకీయాల్లో విషాదం నింపిన ఆ విమాన ప్రమాదం జరగడానికి కొద్ది రోజుల ముందే అజిత్ పవార్ తనతో మాట్లాడారని మహాదేవ్ జంకర్ గుర్తు చేసుకున్నారు. “బారామతికి వెళ్తున్నాను.. నాతో పాటు రండి” అని అజిత్ సాదరంగా ఆహ్వానించారు. అజిత్ పవార్ పిలుపు మేరకు తాను కూడా వెళ్లాలని నిర్ణయించుకున్నప్పటికీ, చివరి నిమిషంలో ముంబయికి చేరుకోవడం ఆలస్యమైందన్నారు. ట్రాఫిక్ లేదా ఇతర కారణాల వల్ల తాను సమయానికి రాలేకపోవడంతో, అజిత్ పవార్ విమానం టేకాఫ్ అయ్యింది. ఆ తర్వాత కొద్ది సేపటికే ఆ ఘోర ప్రమాదం జరగడం, అజిత్ పవార్ మరణించడం తనను తీవ్ర షాక్కు గురిచేసిందని జంకర్ ఆవేదన వ్యక్తం చేశారు. పశుసంవర్ధక శాఖ మంత్రిగా పనిచేసిన జంకర్, పశ్చిమ మహారాష్ట్రలో అజిత్తో కలిసి పనిచేశారు.
రాజకీయం వద్దు – ఇది పూర్తిగా ప్రమాదమే: శరద్ పవార్ : జనవరి 28న బారామతిలో జరిగిన ఈ విమాన ప్రమాదంపై పలు అనుమానాలు, కుట్ర కోణాలు తెరపైకి వచ్చాయి. ముఖ్యంగా పశ్చిమ బెంగాల్ సీఎం మమతా బెనర్జీ సహా పలువురు నేతలు దీనిపై సమగ్ర దర్యాప్తు కోరారు. ఈ నేపథ్యంలో ఎన్సీపీ (SP) అధినేత శరద్ పవార్ స్పందించారు.
స్పష్టత: అజిత్ పవార్ మరణం పూర్తిగా ప్రమాదవశాత్తు జరిగిందేనని, ఇందులో కుట్ర కోణం వెతకొద్దని ఆయన విజ్ఞప్తి చేశారు.
ఆవేదన: సమర్థుడైన నాయకుడిని కోల్పోయామని, ఈ విషాదాన్ని రాజకీయం చేయడం సరికాదని హితవు పలికారు. “ప్రతిదీ మన చేతుల్లో ఉండదు, జరిగిన నష్టాన్ని పూడ్చలేం,” అని శరద్ పవార్ వ్యాఖ్యానించారు.
పవార్ కుటుంబంలో విషాద ఛాయలు – ఏకమైన కుటుంబం : రాజకీయంగా విభేదాలు ఉన్నప్పటికీ, కుటుంబంలో జరిగిన విషాదం పవార్ కుటుంబాన్ని కలిపింది. శరద్ పవార్ బుధవారం మహారాష్ట్ర ఉపముఖ్యమంత్రి (అజిత్ సతీమణి) సునేత్రా పవార్ ఇంటికి వెళ్లారు. అక్కడ దివంగత అజిత్ పవార్ చిత్రపటానికి నివాళి అర్పించారు. అనంతరం బారామతిలోని విద్యా ప్రతిష్ఠాన్లో అజిత్ కుమారులు పార్థ్ పవార్, జయ్ పవార్లతో శరద్ పవార్ గంటన్నర పాటు ఏకాంతంగా భేటీ అయ్యారు. కుటుంబ పెద్దగా వారికి ధైర్యం చెప్పినట్లు తెలుస్తోంది.
చివరి ఫోన్ కాల్ మిస్టరీ వీడింది : అజిత్ పవార్ చివరిసారిగా మాట్లాడిన ఫోన్ కాల్పై జరుగుతున్న చర్చకు ఆయన బంధువు శ్రీజిత్ పవార్ తెరదించారు. ఆ కాల్లో అజిత్ రాజకీయాలకు అతీతంగా మాట్లాడారని తెలిపారు. “మనం కుల, మత బేధాలు లేకుండా అందరినీ కలుపుకుపోవాలి. అందరికీ న్యాయం చేయడమే మన లక్ష్యం,” అని అజిత్ అన్నట్లు శ్రీజిత్ స్పష్టం చేశారు. జిల్లా పరిషత్ ఎన్నికల ప్రచారం కోసం వెళ్తుండగా ఈ దుర్ఘటన జరగడం గమనార్హం.