Viral Video : ప్ర‌జ‌ల నుంచి తీవ్ర వ్య‌తిరేక‌త వ్య‌క్తం కావ‌డంతో జీరో కొవిడ్ ఆంక్ష‌ల‌ను చైనా ఎత్తివేసిన సంగ‌తి తెలిసిందే. నాటి నుంచి ఆ దేశంలో క‌రోనా పాజిటివ్ కేసులు పెరుగుతున్నాయి. ప్ర‌స్తుతం అక్క‌డ ఊహించిన దానికంటే ప‌రిస్థితి చాలా భ‌యంక‌రంగా ఉంది. డిసెంబర్ నెల తొలి 20 రోజుల్లో 25 కోట్ల మందికి వైర‌స్ సోక‌గా, ల‌క్ష‌ల్లో ప్ర‌జ‌లు మ‌ర‌ణించారంటే ప‌రిస్థితి ఎలా ఉందో అర్థం చేసుకోవ‌చ్చు. ఈ నేప‌థ్యంలో చైనా ప్ర‌భుత్వం అప్ర‌మ‌త్త‌మైంది. క‌రోనా నిబంధ‌న‌ల‌ను ప‌టిష్టంగా అమ‌లు చేయాల‌ని నిర్ణ‌యించింది. మాస్కుల‌ను మ‌ళ్లీ త‌ప్ప‌నిస‌రి చేసింది.
దీంతో ప్ర‌జ‌లు అంద‌రూ మాస్క్‌లు ధ‌రిస్తున్నారు. ఒకే ర‌క‌మైన మాస్క్‌లు ఉప‌యోగిస్తే కిక్కు ఏముంద‌ని అనుకున్నారో ఏమో ర‌క‌ర‌కాల మాస్క్‌ల‌ను అక్క‌డి ప్ర‌జ‌లు ఉప‌యోగిస్తున్నారు. ఎలాంటి వెరైటీ మాస్క్‌లు ఉప‌యోగించినా స‌రే తిన‌డానికి, తాగ‌డానికి మాస్క్‌లు తీయాల్సిందే గ‌దా. అయితే.. ఇక్క‌డో ఓ వ్య‌క్తి కొత్త ర‌కం మాస్క్‌ను ధ‌రించాడు. దీంతో అత‌డు మాస్క్ తీయ‌కుండా ఎంచ‌క్కా తింటూ, తాగుతున్నాడు.
ప‌క్షి ముక్కు ఆకారంలో మాస్క్ పెట్టుకున్న ఒక‌త‌ను రెస్టారెంట్‌లో భోజ‌నం చేస్తున్న వీడియోని స‌ఫీర్ అనే యూజ‌ర్ త‌న ట్విట‌ర్ హ్యాండిల్‌లో పోస్ట్ చేశాడు. ప్ర‌స్తుతం ఈ వీడియో సోష‌ల్ మీడియాలో వైర‌ల్‌గా మారింది. మాస్క్ చాలా బాగుంది భ‌య్యా.. ఎక్క‌డ దొరుకుతుందో కాస్త చెప్ప‌రు ప్లీజ్‌ అంటూ కామెంట్లు పెడుతున్నారు.
