Voter List Revision : తమిళనాడు రాజకీయాలు ఓటర్ల జాబితా ప్రత్యేక సమగ్ర సవరణ (Special Intensive Revision – SIR) అంశంతో అట్టుడికిపోతున్నాయి. ఎన్నికల సంఘం వచ్చే వారం ఈ సవరణ ప్రక్రియను ప్రారంభించనుండగా, అధికార డీఎంకే పార్టీ దీనిని తీవ్రంగా వ్యతిరేకిస్తోంది. ఈ క్రమంలోనే ముఖ్యమంత్రి ఎం.కె. స్టాలిన్ ప్రతిపక్షాలపై తీవ్ర స్థాయిలో విరుచుకుపడ్డారు.
బీజేపీ, దాని మిత్రపక్షం అన్నాడీఎంకేలు కలిసి ‘ఎస్‌ఐఆర్’ ద్వారా ప్రజల ఓటు హక్కును హరించి, రాబోయే 2026 అసెంబ్లీ ఎన్నికల్లో అక్రమంగా గెలవాలని యత్నిస్తున్నాయని స్టాలిన్ ఆరోపించారు. డీఎంకే శ్రేణులకు విడుదల చేసిన లేఖలో, “ఎన్నికల క్షేత్రంలో ప్రజలను ఎదుర్కొనే శక్తి లేనివారు, శ్రామికులు, ఎస్సీలు, మైనారిటీలు, మహిళల ఓట్లను తొలగించడం ద్వారా విజయం సాధిస్తామని భావించడం అవివేకం. తమిళనాడులో అలాంటి అప్రజాస్వామిక కుయుక్తులు బోల్తా పడతాయి” అని స్టాలిన్ హెచ్చరించారు. ఈ చట్టవిరుద్ధ చర్యలను ప్రజలతో కలిసి న్యాయబద్ధంగా ఎదుర్కొంటామని ఆయన స్పష్టం చేశారు.
అంతేకాకుండా, అన్నాడీఎంకే అధినేత ఎడప్పాడి కె. పళనిస్వామి (EKP) పైనా సీఎం స్టాలిన్ మండిపడ్డారు. ఈశాన్య రుతుపవనాల కారణంగా రాష్ట్రంలో విపత్కర పరిస్థితులు నెలకొన్నా, EKP రాజకీయ ప్రయోజనాల కోసం ప్రయత్నిస్తున్నారే తప్ప, ప్రజలకు అండగా నిలవడం లేదని విమర్శించారు. ధాన్యం సేకరణపై ఆయన చేసిన ఆరోపణలు అబద్ధాలని కొట్టిపారేసిన స్టాలిన్, తమ ప్రభుత్వం ప్రజా సంక్షేమం కోసం పనిచేయడం కొనసాగిస్తుందని ప్రకటించారు. ఈ కీలక ఉపఎన్నిక వేళ, డీఎంకే వర్సెస్ విపక్షాల మధ్య మాటల యుద్ధం తారాస్థాయికి చేరుకుంది.
