National Energy Conservation Day : పెట్రోల్, డీజిల్, గ్యాస్, విద్యుత్.. ఇవి లేని జీవితాన్ని ఊహించగలమా? మన ఆధునిక జీవనశైలికి ఇంధనమే ప్రాణాధారం. కానీ, ఈ వనరులు అపరిమితం కాదు. మనం వాడుతున్న కొద్దీ తరిగిపోతున్నాయి, పర్యావరణానికి పెను ముప్పుగా మారుతున్నాయి. ఈ నేపథ్యంలో, ఇంధనాన్ని పొదుపుగా వాడుకోవాల్సిన ఆవశ్యకతపై అవగాహన కల్పించేందుకు, ప్రతి ఏటా డిసెంబర్ 14న ‘జాతీయ ఇంధన పరిరక్షణ దినోత్సవం’ జరుపుకుంటున్నాం. అసలు మనం ఇంధనాన్ని ఎలా వృథా చేస్తున్నాం? చిన్న చిన్న మార్పులతో మన భవిష్యత్తును ఎలా కాపాడుకోవచ్చు?

పెరుగుతున్న జనాభా, పారిశ్రామికీకరణతో ఇంధన వినియోగం విపరీతంగా పెరిగిపోయింది. దీనివల్ల శిలాజ ఇంధనాల నిల్వలు తరిగిపోవడమే కాకుండా, వాతావరణ కాలుష్యం ప్రమాదకర స్థాయికి చేరుకుంటోంది. ఈ ప్రమాదాన్ని గుర్తించిన కేంద్ర ప్రభుత్వం, బ్యూరో ఆఫ్ ఎనర్జీ ఎఫిషియెన్సీ (BEE) ఆధ్వర్యంలో 1990 నుంచి ఇంధన పరిరక్షణపై ప్రచారం చేస్తోంది.

పొదుపు పాఠాలు.. మన ఇంటి నుంచే : ఇంధనాన్ని ఆదా చేయడం అనేది ఓ పెద్ద యజ్ఞం కాదు, మన దైనందిన అలవాట్లలో చేసుకునే చిన్న చిన్న మార్పులతోనే ఇది సాధ్యం.

5-స్టార్ రేటింగ్: ఫ్రిజ్, ఏసీ, వాషింగ్ మెషీన్ వంటి గృహోపకరణాలు కొనేటప్పుడు, తప్పనిసరిగా 5-స్టార్ రేటింగ్ ఉన్న వాటినే ఎంచుకోండి. దీనివల్ల విద్యుత్ బిల్లు తగ్గడమే కాకుండా, విద్యుత్ ఆదా అవుతుంది.
ఆపితేనే ఆదా: అవసరం లేనప్పుడు లైట్లు, ఫ్యాన్లు, టీవీలను ఆపడం అలవాటు చేసుకోండి.
ఎల్‌ఈడీ వెలుగులు: సాధారణ బల్బులకు బదులుగా, తక్కువ విద్యుత్‌ను వినియోగించుకునే ఎల్‌ఈడీ బల్బులను వాడండి. ఈ చిన్న మార్పులతో, ఒక కుటుంబం ఏటా 120 నుంచి 170 యూనిట్ల వరకు విద్యుత్‌ను ఆదా చేయవచ్చు.

ఇంధన ఆదా:
ట్రాఫిక్ సిగ్నల్ వద్ద ఇంజిన్ ఆఫ్: ట్రాఫిక్ సిగ్నల్ వద్ద 10 సెకన్ల కంటే ఎక్కువ సేపు ఆగాల్సి వస్తే, ఇంజిన్‌ను ఆఫ్ చేయండి. ఈ చిన్న పని వల్ల 8% వరకు వాయు కాలుష్యం తగ్గుతుందని అంచనా.
రోజుకు 18 నిమిషాల వృథా: సగటున ఒక వాహనదారుడు రోజుకు 18 నిమి-షాల పాటు అనవసరంగా ఇంజిన్‌ను ఆన్‌లో ఉంచడం వల్ల, ఏటా 100 లీటర్ల ఇంధనం వృథా అవుతోంది.

ప్రత్యామ్నాయాల వైపు పయనం : శిలాజ ఇంధనాల వాడకాన్ని తగ్గించి, ప్రత్యామ్నాయ ఇంధనాల వైపు మళ్లడం అత్యవసరం.
ఎలక్ట్రిక్ వాహనాలు (EV): పెట్రోల్, డీజిల్ వాహనాలకు బదులుగా, కాలుష్యరహితమైన ఎలక్ట్రిక్ వాహనాల వాడకాన్ని ప్రోత్సహించాలి. తెలంగాణ ప్రభుత్వం ఈవీల కొనుగోలుపై రిజిస్ట్రేషన్ ఫీజు నుంచి మినహాయింపు కూడా ఇస్తోంది.

బయో-ఫ్యూయల్స్: ఇథనాల్, బయోడీజిల్, సీఎన్‌జీ వంటి ప్రత్యామ్నాయ ఇంధనాల వాడకాన్ని పెంచాలి. ఇంధనాన్ని పొదుపుగా వాడుకోవడం అనేది కేవలం డబ్బు ఆదా చేసే విషయం కాదు. అది మన పర్యావరణాన్ని, మన భావి తరాల భవిష్యత్తును కాపాడే ఓ సామాజిక బాధ్యత.