Take-Home Salary: మోదీ ప్రభుత్వం కార్మికుల సంక్షేమం, సామాజిక భద్రతను పటిష్టం చేసే లక్ష్యంతో రూపొందించిన కొత్త లేబర్ కోడ్స్ (New Labour Codes 2025) అమలుకు సిద్ధమవుతున్నాయి. ఈ సంస్కరణలు కార్మికుల హక్కులను పరిరక్షిస్తాయనడంలో సందేహం లేదు, కానీ ఉద్యోగులు వెంటనే గమనించాల్సిన విషయం ఏమిటంటే… వారి నెలవారీ ‘టేక్-హోమ్ శాలరీ’ (చేతికి వచ్చే జీతం)లో కీలక మార్పులు రాబోతున్నాయి.

ఇప్పటివరకు అనేక కంపెనీలు తమ ఉద్యోగుల జీతాల నిర్మాణాన్ని (Salary Structure) చాలా తెలివిగా రూపొందించేవి. ఉద్యోగి మొత్తం జీతంలో ‘బేసిక్ పే’ (ప్రాథమిక వేతనం) భాగాన్ని చాలా తక్కువగా ఉంచి, మిగిలిన మొత్తాన్ని రకరకాల భత్యాలు (Allowances) కింద చూపించేవి. దీని ప్రధాన ఉద్దేశం – ప్రావిడెంట్ ఫండ్ (PF), గ్రాట్యూటీ వంటి సామాజిక భద్రతా కాంట్రిబ్యూషన్ల భారాన్ని తగ్గించుకోవడం. ఎందుకంటే, ఈ కాంట్రిబ్యూషన్లు వేతనంపై ఆధారపడి ఉంటాయి.

ALSO READ: PNB: బిగ్ అలర్ట్..ఇలా చేయకపోతే నవంబర్ 30 తర్వాత మీ బ్యాంకు అకౌంట్ క్లోజ్

అయితే, కొత్త నిబంధనలు ఈ పద్ధతికి పూర్తిగా అడ్డుకట్ట వేయనున్నాయి. కొత్త లేబర్ కోడ్స్ ప్రకారం, ఒక ఉద్యోగి మొత్తం జీతంలో కనీసం 50 శాతం మొత్తాన్ని తప్పనిసరిగా వేతనంగా పరిగణించాలి. ఈ వేతనంలో బేసిక్ పే, డియర్‌నెస్ అలవెన్స్ (DA), రిటైనింగ్ అలవెన్స్ వంటివి ఉంటాయి.

ఈ కొత్త నిబంధనల వల్ల ఉద్యోగుల ప్రాథమిక వేతనం (Basic Pay) స్వయంచాలకంగా పెరుగుతుంది. దీంతో పాటు, వేతనం ఆధారంగా లెక్కించే పీఎఫ్‌, గ్రాట్యూటీకి కంపెనీలు చెల్లించే వాటా కూడా అదే స్థాయిలో పెరుగుతుంది. ఇది ఉద్యోగుల మొత్తం వ్యయం నుంచే కట్ అవుతుంది కాబట్టి, సహజంగానే నెలవారీగా చేతికి వచ్చే జీతం (In-Hand Salary) తగ్గుతుంది.

ఉదాహరణకు, ఒక ఉద్యోగికి రూ.10 లక్షల వార్షిక ప్యాకేజీ ఉందనుకుందాం. పాత పద్ధతిలో, అతని బేసిక్ పే 40 శాతం (రూ. 4 లక్షలు) ఉంటే, కొత్త రూల్స్ ప్రకారం అది కనీసం 50 శాతం (రూ. 5 లక్షలు)కు పెరుగుతుంది. దీని ఫలితంగా, ఉద్యోగి నెలవారీ టేక్-హోమ్ శాలరీ సుమారు రూ.1,400 వరకు తగ్గే అవకాశం ఉంది. సంవత్సరానికి ఇది దాదాపు రూ.16,810 వరకు తేడా చూపవచ్చు.

దీర్ఘకాలిక ప్రయోజనం

ప్రస్తుతం ఇన్-హ్యాండ్ శాలరీ తగ్గినా, దీనిని ఉద్యోగులు తమ భవిష్యత్తు కోసం చేస్తున్న చిన్నపాటి త్యాగంగా నిపుణులు అభివర్ణిస్తున్నారు. ప్రాథమిక వేతనం పెరగడం వల్ల, ఉద్యోగుల పదవీ విరమణ సమయానికి వారి పీఎఫ్ ఖాతాలో జమ అయ్యే మొత్తం గణనీయంగా పెరుగుతుంది. అదే విధంగా, గ్రాట్యూటీ చెల్లింపు కూడా అధికంగా ఉంటుంది.

ఉద్యోగులు తమ రిటైర్‌మెంట్ సమయంలో ఎక్కువ మొత్తంలో సామాజిక భద్రతా నిధిని అందుకునేందుకు ఈ కొత్త నిబంధనలు గొప్ప అవకాశాన్ని కల్పిస్తున్నాయి. ఈ ప్రభావం కేవలం రూ.10 లక్షల ప్యాకేజీలకే కాకుండా, రూ.15 లక్షలు, రూ.20 లక్షలు అంతకు మించిన ప్యాకేజీలు ఉన్న ఉద్యోగులపై కూడా ఉంటుంది.

ఈ నేపథ్యంలో, ఉద్యోగులందరూ తమ కొత్త జీతాల నిర్మాణాన్ని (Salary Structure) ఆ మార్పుల ప్రభావాన్ని సమీక్షించుకోవాల్సిన అవసరం ఉంది. ప్రస్తుత కొద్దిపాటి జీతం తగ్గింపు, సురక్షితమైన మరియు ధనికమైన భవిష్యత్తుకు మార్గం అని నిస్సందేహంగా చెప్పవచ్చు.