Nirmala Sitharaman sarees: కేంద్ర బడ్జెట్ ప్రవేశపెట్టే రోజు భారత రాజకీయాల్లో మాత్రమే కాదు, దేశపు చేనేత ప్రపంచంలో కూడా ప్రత్యేకమైన గుర్తింపును తెచ్చిపెట్టే రోజు. ఆ రోజు ఆర్థిక మంత్రి నిర్మలా సీతారామన్ మాట్లాడే గణాంకాలు, ప్రకటించే విధానాలతో పాటు ఆమె ధరించే చీర కూడా విస్తృతంగా చర్చకు వస్తుంది. కారణం స్పష్టం. ప్రతి బడ్జెట్ రోజున ఆమె ఎంచుకునే చేనేత చీర భారతదేశంలోని ఒక ప్రాంతానికి చెందిన సంప్రదాయం, కళా నైపుణ్యం, చేతి పనితనాన్ని ప్రతినిధ్యం వహిస్తుంది. ఈ కారణంగానే నిర్మలా సీతారామన్ బడ్జెట్ చీరలు ఇప్పుడు ఒక ప్రత్యేక శైలిగా మారాయి.
చేనేతకు ప్రాధాన్యం..
నిర్మలా సీతారామన్ తొలి సారిగా కేంద్ర బడ్జెట్ ప్రవేశపెట్టిన రోజు నుంచే ఆమె చేనేతకు ఇచ్చిన ప్రాధాన్యం స్పష్టంగా కనిపిస్తుంది. ఆ రోజు ఆమె బంగారు అంచుతో కూడిన పింక్ రంగు మంగళగిరి చీరను ధరించారు. అదే సమయంలో సూట్కేస్కు బదులుగా సంప్రదాయ బహి ఖాతాను తీసుకురావడం దేశవ్యాప్తంగా చర్చనీయాంశమైంది. ఆ రోజు నుంచి బడ్జెట్ అంటే గణాంకాలతో పాటు చేనేత చీర అనే భావన ప్రజల్లో బలంగా స్థిరపడింది.
పసుపు రంగు పట్టు చీర..
2020 బడ్జెట్ సమయంలో నిర్మలా సీతారామన్ పసుపు రంగు పట్టు చీరను ఎంచుకున్నారు. దానికి నీలం రంగు అంచు ప్రత్యేక ఆకర్షణగా నిలిచింది. ఆ సంవత్సరం ఆర్థికంగా అనిశ్చిత పరిస్థితులు ఉన్నప్పటికీ, ఆమె ధరించిన ప్రకాశవంతమైన రంగుల చీరలో ఒక ధైర్యం, సానుకూలత కనిపించిందని పలువురు విశ్లేషించారు. ఇది కేవలం దుస్తుల ఎంపిక మాత్రమే కాకుండా, చేనేత రంగానికి ఇచ్చిన గౌరవంగా కూడా భావించారు.
పోచంపల్లి ఇక్కత్ చీర..
2021లో బడ్జెట్ రోజున ఆమె తెలంగాణకు చెందిన పోచంపల్లి ఇక్కత్ చీరలో కనిపించారు. ఎరుపు, తెలుపు రంగుల కలయికతో ఉన్న ఈ చీర భారతదేశంలో అత్యంత గుర్తింపు పొందిన చేనేత శైలుల్లో ఒకటి. ఇక్కత్ అల్లికలో ఉండే సూక్ష్మత, రంగుల సమతుల్యత పోచంపల్లిని ప్రపంచ స్థాయిలో ప్రసిద్ధి చేసింది. ఈ చీరను ధరించడం ద్వారా ఆ ప్రాంతంలోని చేనేత కార్మికుల కష్టాన్ని దేశానికి గుర్తుచేసినట్టైంది.
బొంఖై చీరను..
2022 బడ్జెట్ సమయంలో నిర్మలా సీతారామన్ ఒడిశాకు చెందిన బొంఖై చీరను ఎంచుకున్నారు. ఎర్త్ బ్రౌన్ టోన్లతో, ఆఫ్ వైట్ అంచుతో ఉన్న ఈ చీర ప్రాంతీయ సంప్రదాయాలకు అద్దం పట్టింది. బొంఖై చీరల్లో కనిపించే చేతితో చేసిన నమూనాలు, సహజ రంగుల వినియోగం ఒడిశా చేనేత ప్రత్యేకతను చాటుతాయి. బడ్జెట్ రోజున ఈ చీర ధరించడం ద్వారా తూర్పు భారతదేశపు చేనేతకు ఆమె ప్రాధాన్యం ఇచ్చారు.
ఎరుపు రంగు చీరలో..
2023 బడ్జెట్ సమయంలో ఆమె ఎరుపు రంగు చీరలో నలుపు, బంగారు రంగుల సాంప్రదాయ టెంపుల్ శైలి సరిహద్దుతో కనిపించారు. ఈ క్లాసిక్ డిజైన్ బడ్జెట్ ప్రవేశపెట్టే వేళ ప్రత్యేకంగా నిలిచింది. ఆలయ శైలిలో ఉండే సరిహద్దులు దక్షిణ భారత చేనేత సంప్రదాయాన్ని గుర్తుచేస్తాయి. సరళమైన ఆభరణాలతో ఈ చీరకు ఆమె మరింత హుందాతనాన్ని జోడించారు.
నీలం రంగు తుస్సర్ సిల్క్ చేనేత చీర..
మధ్యంతర బడ్జెట్ సందర్భంగా నిర్మలా సీతారామన్ నీలం రంగు తుస్సర్ సిల్క్ చేనేత చీరను ధరించారు. తుస్సర్ సిల్క్ అంటే సహజమైన మెరుపు, ప్రత్యేకమైన అల్లికకు ప్రసిద్ధి. ఈ చీర ద్వారా భారతదేశంలోని గిరిజన ప్రాంతాలు, గ్రామీణ చేనేత కార్మికుల శ్రమకు గుర్తింపు లభించింది. బడ్జెట్ వంటి కీలక సందర్భంలో ఈ చీర ఎంపిక చేనేతకు కేంద్రస్థానాన్ని ఇచ్చినట్టైంది.
తెలుపు రంగు పట్టు చీర…
2024 బడ్జెట్ సమయంలో ఆమె తెలుపు రంగు పట్టు చీరను ఎంచుకున్నారు. దానికి మెజెంటా రంగు హైలైట్స్, బంగారు అంచులు ప్రత్యేక ఆకర్షణగా నిలిచాయి. ఈ రంగుల కలయిక ఆమె సాధారణ శైలికి అనుగుణంగా ఉండటమే కాకుండా, సింపుల్ అయినా గంభీరతను ప్రతిబింబించింది. ఈ చీరలో కూడా భారతీయ పట్టు చేనేత నాణ్యత స్పష్టంగా కనిపించింది.
తెలుపు రంగు పట్టు చీర..
2025లో ఎనిమిదవ కేంద్ర బడ్జెట్ ప్రవేశపెట్టిన రోజున నిర్మలా సీతారామన్ తెలుపు రంగు పట్టు చీరను ధరించారు. దీనికి బంగారు అంచు ఉండగా, మధుబని కళాకృతితో అలంకరించి ఉంది. మధుబని కళ బీహార్ ప్రాంతానికి చెందిన ప్రసిద్ధ ప్రజా కళ. ఈ చీరలోని చిత్రాలు, నమూనాలు భారతదేశంలోని లోకకళల వైవిధ్యాన్ని ప్రతిబింబించాయి. ఎరుపు రంగు బ్లౌజ్, తక్కువ ఆభరణాలతో ఆమె ఈ చీరను మరింత ఆకర్షణీయంగా తీర్చిదిద్దారు.