Indian Railways Denies Halal-Only Non-Veg Meals Policy on Trains: రైలు ప్రయాణాల్లో వడ్డించే ఆహారంపై ఎప్పుడూ ఏదో ఒక చర్చ నడుస్తూనే ఉంటుంది. తాజాగా రైళ్లలో కేవలం ‘హలాల్’ చేసిన మాంసాన్ని మాత్రమే వడ్డిస్తున్నారనే ప్రచారం జోరుగా సాగుతోంది. దీనిపై ప్రయాణికుల్లో, ముఖ్యంగా మాంసాహార ప్రియుల్లో అనేక అనుమానాలు వ్యక్తమవుతున్నాయి. ఈ నేపథ్యంలో భారతీయ రైల్వే (Indian Railways) క్యాటరింగ్ విభాగమైన IRCTC స్పందించింది.  హలాల్ చేసిన మాంసాహారం (Halal-only Non-Veg Meals) పై వస్తున్న ఆరోపణలను కొట్టిపారేస్తూ కీలక ప్రకటన చేసింది. అసలు రైల్వేలో Halal certification తప్పనిసరా? నిబంధనలు ఏం చెబుతున్నాయి? అనేది ఇప్పుడు చూద్దాం.

ALSO READ: Trinamool Congress: ఈసీపై తృణమూల్ ఫైర్.. “మీ చేతులకు రక్తం అంటుకుంది”.. 38 మంది మరణాలకు బాధ్యత ఎవరిది?

సోషల్ మీడియాలో రచ్చ

వాస్తవానికి ఈ గొడవ ఈనాటిది కాదు. జూలై 2023లోనే సోషల్ మీడియాలో దీనిపై పెద్ద రచ్చ జరిగింది. హిందువులు, సిక్కుల మత విశ్వాసాలకు విరుద్ధంగా రైల్వేలో కేవలం హలాల్ పద్ధతిలో కోసిన మాంసాన్ని మాత్రమే విక్రయిస్తున్నారనే విమర్శలు వచ్చాయి. సిక్కులు, హిందువులు సాధారణంగా ‘ఝట్కా’ (Jhatka) పద్ధతిని ఇష్టపడతారు. కానీ రైల్వేలో మాత్రం హలాల్ మాంసాన్ని రుద్దుతున్నారని, ఇది మత స్వేచ్ఛను హరించడమేనని కొందరు జాతీయ మానవ హక్కుల కమిషన్ (NHRC)ను ఆశ్రయించారు. దీనిపై కమిషన్ రైల్వే శాఖకు నోటీసులు ఇచ్చిందన్న వార్తలతో ఈ వివాదం మళ్లీ రాజుకుంది.

ఐఆర్‌సీటీసీ ఏమంటోందంటే?

ఈ ఆరోపణలపై ఐఆర్‌సీటీసీ గురువారం నాడు స్పష్టత ఇచ్చింది. రైళ్లలో వడ్డించే నాన్-వెజ్ భోజనానికి హలాల్ సర్టిఫికేషన్ తప్పనిసరి చేస్తూ తమ వద్ద ఎలాంటి మార్గదర్శకాలు లేవని తేల్చి చెప్పింది. “మాకు అలాంటి పాలసీ ఏదీ లేదు. కేవలం హలాల్ మాంసాన్నే వడ్డించాలనే రూల్ రైల్వేలో ఎక్కడా లేదు” అని అధికారులు స్పష్టం చేశారు. ఇది కేవలం పుకారు మాత్రమేనని, ప్రయాణికులు ఆందోళన చెందాల్సిన పనిలేదని భరోసా ఇచ్చారు.

నిబంధనలు ఏం చెబుతున్నాయి?

చికెన్ లేదా ఇతర మాంసాహార వంటకాలను తయారు చేసేటప్పుడు కేంద్ర ప్రభుత్వం నిర్దేశించిన ఆహార భద్రతా ప్రమాణాలను (Food Safety and Standards Act, 2006) మాత్రమే పాటిస్తామని కంపెనీ పేర్కొంది. కాంట్రాక్టర్లు, వెండర్లు అందరూ ఈ ఎఫ్ఎస్ఎస్ఏఐ (FSSAI) నిబంధనల ప్రకారమే నడుచుకోవాలి తప్ప, మతపరమైన కట్టింగ్ విధానాలకు (హలాల్ లేదా ఝట్కా) రైల్వే ప్రత్యేకంగా ఎలాంటి ప్రాధాన్యత ఇవ్వదని తెలిపింది. నాణ్యత, సురక్షితమైన ఆహారం అందించడమే తమ బాధ్యత అని వెల్లడించింది.

గందరగోళం వద్దు

ప్రయాణికుల్లో అనవసరమైన గందరగోళం సృష్టించవద్దని, సోషల్ మీడియాలో వచ్చే నిరాధారమైన వార్తలను నమ్మవద్దని ఐఆర్‌సీటీసీ కోరింది. అందరి మనోభావాలను గౌరవిస్తూ, ఎవరి ఆహారపు అలవాట్లకు భంగం కలగకుండా సేవలు అందిస్తామని స్పష్టం చేసింది. తాజా వివరణతో హలాల్ వివాదానికి పుల్ స్టాప్ పడుతుందని అధికారులు భావిస్తున్నారు.

ALSO READ: Missing Woman Found: తీర్థయాత్రలో తప్పిపోయి.. దేశం దాటిపోయింది! 20 ఏళ్ల తర్వాత వీధుల్లో బిచ్చగత్తెలా దొరికిన అమ్మ