Parliament opposition protest against Ram temple donation theft : దేశ రాజధాని ఢిల్లీలోని పార్లమెంటు ప్రాంగణం తీవ్ర రాజకీయ వేడితో అట్టుడికిపోయింది. జాతీయ ప్రజాస్వామ్య వ్యవస్థకు కేంద్ర బిందువైన పార్లమెంటు ఉభయసభలు మంగళవారం నిరసనల హోరుతో సభాకార్యక్రమాలు నడవకుండా స్తంభించిపోయాయి. ప్రతిపక్షాల ఆందోళనల నడుమ లోక్‌సభ, రాజ్యసభలు మధ్యాహ్నం 2 గంటల వరకు వాయిదా పడటంతో, ‘ఇండీ’ కూటమి ఎంపీలు పార్లమెంట్ ప్రాంగణంలోని ‘మకర ద్వారం’ వద్దకు చేరుకుని ప్రభుత్వంపై ప్రత్యక్ష పోరుకు దిగారు.

సభలు మధ్యాహ్నం 2 గంటలకు వాయిదా పడిన వెంటనే ఇండీ కూటమికి చెందిన పలువురు ఎంపీలు పార్లమెంట్ ప్రాంగణంలోని మకర ద్వారం వద్దకు తరలివచ్చారు. అయోధ్యలోని శ్రీరామ జన్మభూమి క్షేత్రంలో భక్తులు అర్పించిన విరాళాల నిధుల్లో భారీ అక్రమాలు, చోరీ జరిగాయని ఆరోపిస్తూ సమాజ్‌వాదీ పార్టీ (SP), కాంగ్రెస్, తృణమూల్ కాంగ్రెస్ (TMC) సహా ఇతర పక్షాల ఎంపీలు నిరసన చేపట్టారు.

వినూత్న ప్రదర్శన: ప్రతిపక్ష ఎంపీలు మకర ద్వారం ముందర ప్రతీకాత్మకంగా ఒక ‘హుండీ’ని ఏర్పాటు చేసి, అందులో డబ్బులు వేస్తూ నిరసన తెలిపారు. భక్తుల విశ్వాసాలతో ముడిపడి ఉన్న విరాళాల సొమ్ము దుర్వినియోగం కావడంపై కేంద్ర ప్రభుత్వం తక్షణమే స్పందించాలని, దీనిపై పార్లమెంటులో పూర్తిస్థాయి చర్చ జరగాలని విపక్ష నేతలు డిమాండ్ చేశారు. “చందా చోర్ – గద్దీ చోడ్” అంటూ ప్రతిపక్ష నాయకులు హోరెత్తించే నినాదాలతో పార్లమెంటు పరిసరాలను ప్రకంపిపజేశారు.

ఉదయనిధి అరెస్టుపై నిరసన సెగ : మరొకవైపు, తమిళనాడు రాజకీయ పరిణామాల సెగ పార్లమెంటు ప్రాంగణానికి సైతం తాకింది. డీఎంకే యువజన విభాగం కార్యదర్శి, తమిళనాడు అసెంబ్లీ ప్రతిపక్ష నేత ఉదయనిధి స్టాలిన్ అరెస్టును తీవ్రంగా ఖండిస్తూ డీఎంకే ఎంపీలు పార్లమెంటు ప్రాంగణంలో గళమెత్తారు.

రాజకీయ కక్షసాధింపే కారణమా?: కేంద్ర ప్రభుత్వ ప్రాద్బలంతోనే డీఎంకే నాయకత్వాన్ని బలహీనపరిచేందుకు ఇటువంటి అక్రమ అరెస్టులకు పాల్పడుతున్నారని డీఎంకే సభ్యులు ఆరోపించారు. ఉదయనిధి స్టాలిన్ అరెస్టు ప్రజాస్వామ్య విరుద్ధమని, రాజకీయ దురుద్దేశంతోనే ఈ చర్యలు చేపట్టారని ఎంపీలు విమర్శల బాణాలు విసిరారు. సభల వాయిదా అనంతరం మకర ద్వారం పరిసరాల్లో విపక్షాల కూటమికి మద్దతుగా నిలుస్తూ డీఎంకే ఎంపీలు తమ నిరసన ప్రదర్శనను కొనసాగించారు.

కేంద్రం వైఖరిపై విపక్షాల మండిపాటు : పార్లమెంట్ వర్షాకాల సమావేశాలు ప్రారంభమైనప్పటి నుంచి వివిధ ప్రజా సమస్యలు, కేంద్రీయ వివాదాలపై విపక్షాలు పట్టుబడుతుండటంతో సభాకార్యక్రమాలు సజావుగా సాగడం లేదు. మంగళవారం ఉదయం సభ ప్రారంభం కాగానే విపక్షాల నిరసనలు, నినాదాల మధ్య సభాపతులు కల్పించుకుని శాంతింపజేసేందుకు ప్రయత్నించినప్పటికీ ఫలితం లేకపోయింది. సభలో కేంద్ర హోం మంత్రి హాజరై రామమందిర విరాళాల చోరీ, విద్యార్థుల ఆందోళనలపై క్లారిటీ ఇవ్వాలని ప్రతిపక్షాలు డిమాండ్ చేశాయి. విపక్షాల పట్టుదలతో సభలో తీవ్ర గందరగోళం నెలకొనడంతో స్పీకర్, ఛైర్మన్లు సభను మధ్యాహ్నం 2 గంటల వరకు వాయిదా వేయక తప్పలేదు.