Parliament Winter Session 2025 10 Key Bills: ఢిల్లీలో చలి తీవ్రత పెరుగుతున్నా, రాజకీయ వాతావరణం మాత్రం అప్పుడే వేడెక్కింది. డిసెంబర్ 1, సోమవారం నుంచి మూడు వారాల పాటు సాగనున్న Parliament Winter Session 2025 వాడివేడిగా జరిగేలా కనిపిస్తోంది. ఈ సమావేశాల్లో ప్రభుత్వం ఏకంగా 10 కీలక బిల్లులను ప్రవేశపెట్టేందుకు సిద్ధం కాగా, ప్రతిపక్షాలు Special Intensive Revision (SIR) పేరుతో జరుగుతున్న ఓటర్ల జాబితా సవరణపై ప్రభుత్వాన్ని నిలదీసేందుకు కత్తులు నూరుతున్నాయి. మరోవైపు దేశభక్తి గీతం వందేమాతరం (Vande Mataram) చుట్టూ జరగనున్న చర్చ కూడా ఈ సెషన్‌లో హైలైట్‌గా నిలవనుంది.

ALSO READ: Assam Bans Polygamy: ఇక రెండో పెళ్లి చేసుకుంటే పదేళ్ళు జైలు శిక్ష

వందేమాతరం: 150 ఏళ్ల స్ఫూర్తి

ఈసారి సమావేశాలు ఒక ప్రత్యేకతతో మొదలుకానున్నాయి. వందేమాతరం గీతానికి 150 ఏళ్లు పూర్తయిన సందర్భంగా, ప్రభుత్వం ఆ గీత విశిష్టతపై రోజంతా చర్చ జరపాలని నిర్ణయించింది. ప్రధానమంత్రి నరేంద్ర మోదీ నవంబర్ 7న చేసిన వ్యాఖ్యలు ఈ చర్చకు ప్రాతిపదిక కానున్నాయి. “1937లో వందేమాతరం గీతం నుంచి ఆత్మ వంటి కీలక చరణాలను తొలగించారు. ఆ చర్యే దేశ విభజనకు బీజం వేసింది. ఆనాడు జరిగిన అన్యాయం గురించి నేటి తరం తెలుసుకోవాలి” అని మోదీ గతంలో అన్నారు. స్వాతంత్య్ర పోరాటంలో ఈ గీతం పోషించిన పాత్రను యువతకు గుర్తుచేయడమే లక్ష్యంగా లోక్‌సభ స్పీకర్, రాజ్యసభ చైర్మన్ ఈ చర్చను ముందుకు తీసుకెళ్లనున్నారు.

బిల్లుల ప్రవాహం

కేవలం చర్చలే కాదు, చట్టాల తయారీలోనూ ప్రభుత్వం దూకుడుగా ఉంది. అణుశక్తి (Nuclear Energy), ఉన్నత విద్య (Higher Education), కార్పొరేట్ చట్టాలు, సెక్యూరిటీ మార్కెట్‌లలో మార్పులు తెచ్చేలా పది కీలక బిల్లులను ఈ సెషన్‌లోనే ఆమోదింపజేసుకోవాలని కేంద్రం భావిస్తోంది. చండీగఢ్ కోసం రాజ్యాంగ సవరణ బిల్లు కూడా ఇందులో ఉంది.

‘ఓటు బందీ’పై మమతా ఫైర్

మరోవైపు ప్రతిపక్ష శిబిరం నిరసనలకు సిద్ధమైంది. కేంద్ర ఎన్నికల సంఘం తొమ్మిది రాష్ట్రాల్లో చేపట్టిన ‘స్పెషల్ ఇంటెన్సివ్ రివిజన్’ (SIR) ప్రక్రియను తృణమూల్ కాంగ్రెస్ అధినేత్రి మమతా బెనర్జీ (Mamata Banerjee) తీవ్రంగా వ్యతిరేకిస్తున్నారు. దీనిని ఆమె “ఓటు బందీ” (Votebandi) అని అభివర్ణించారు. “ఓటర్ల హక్కులను కాపాడేందుకు నా గొంతు కోసినా సరే వెనక్కి తగ్గను” అని ఆమె ఆవేశంగా ప్రకటించారు. తమిళనాడులో డీఎంకే, అటు సమాజ్‌వాదీ పార్టీలు కూడా ఇదే అంశంపై ఆందోళన వ్యక్తం చేస్తున్నాయి. దీనికి తోడు దేశంలో పెరుగుతున్న నిరుద్యోగం, ఢిల్లీలో వాయు కాలుష్యం వంటి అంశాలపై ప్రభుత్వాన్ని ఇరకాటంలో పెట్టేందుకు విపక్షాలు సిద్ధమయ్యాయి.

తుఫాను తప్పదా?

ప్రభుత్వం మాత్రం తాము ఏ అంశంపై అయినా చర్చకు సిద్ధమని చెబుతోంది. అయితే ఎన్నికల సంఘం నిర్ణయాలపై తాము చర్చించలేమని, కేవలం ఎన్నికల సంస్కరణలపైనే మాట్లాడగలమని స్పష్టం చేసింది. రక్షణ మంత్రి రాజ్‌నాథ్ సింగ్ నివాసంలో సీనియర్ మంత్రులు సమావేశమై ప్రభుత్వ వ్యూహాన్ని ఖరారు చేశారు. పార్లమెంటరీ వ్యవహారాల మంత్రి కిరణ్ రిజిజు ఆదివారం అఖిలపక్ష భేటీ ఏర్పాటు చేసి సభ సజావుగా సాగేలా చూడాలని కోరనున్నారు. డిసెంబర్ 19 వరకు సాగే ఈ సమావేశాలు అధికార, ప్రతిపక్షాల మధ్య మాటల యుద్ధానికి వేదిక కానున్నాయి.

ALSO READ: New Labour Codes 2025 : ‘కొత్త లేబర్ కోడ్ 2025’తో వేతన వ్యవస్థలో పెను మార్పులు..!