79th Independence Day ‘Naya Bharat’ celebrations : దేశరాజధాని దిల్లీలోని ఎర్రకోట శుక్రవారం మరో చారిత్రక ఘట్టానికి వేదికైంది. 79వ స్వాతంత్య్ర దినోత్సవం సందర్భంగా ప్రధానమంత్రి నరేంద్ర మోదీ మువ్వన్నెల జెండాను ఎగురవేసి, జాతినుద్దేశించి ప్రసంగించారు. వరుసగా 12వ సారి ఈ అరుదైన గౌరవాన్ని అందుకున్న ఆయన, తనదైన శైలిలో దేశ భవిష్యత్ ప్రస్థానాన్ని ఆవిష్కరించారు. అయితే, ఈసారి వేడుకల వెనుక ఉన్న ‘నయా భారత్’ స్ఫూర్తి ఏమిటి..? ప్రధాని ధరించిన సిందూర వర్ణపు తలపాగా దేనికి సంకేతం.? ఆయన ప్రసంగంలో ప్రతిధ్వనించిన ఆత్మవిశ్వాసం వెనుక ఉన్న బలమేంటి..? 

‘నయా భారత్’ థీమ్‌తో నవశకానికి నాంది : 2047 నాటికి ‘వికసిత భారత్’ నిర్మాణమే లక్ష్యంగా, ‘నయా భారత్’ థీమ్‌తో ఈ ఏడాది స్వాతంత్య్ర దినోత్సవ వేడుకలను అత్యంత వైభవంగా నిర్వహించారు. శుక్రవారం ఉదయం ప్రధాని నరేంద్ర మోదీ మొదట రాజ్‌ఘాట్‌కు చేరుకుని జాతిపిత మహాత్మా గాంధీకి ఘనంగా నివాళులర్పించారు. అనంతరం ఎర్రకోటకు చేరుకున్న ప్రధానికి రక్షణ శాఖ మంత్రి రాజ్‌నాథ్ సింగ్ స్వాగతం పలికారు. త్రివిధ దళాల గౌరవ వందనాన్ని స్వీకరించిన అనంతరం, ప్రధాని మోదీ ఎర్రకోట బురుజులపై జాతీయ పతాకాన్ని ఆవిష్కరించారు. ఈ అద్భుత ఘట్టానికి గుర్తుగా భారత వైమానిక దళానికి చెందిన రెండు ఎంఐ-17 హెలికాప్టర్లు ఆకాశం నుంచి పూల వర్షం కురిపించాయి.

ఆపరేషన్ సిందూర్‌కు ప్రతీకగా : ఈ వేడుకల్లో ప్రధాని మోదీ ప్రత్యేక వస్త్రధారణ అందరి దృష్టినీ ఆకర్షించింది. సిందూర వర్ణపు (కాషాయ) తలపాగా, జాతీయ పతాకంలోని రంగులతో కూడిన కండువా ధరించారు. ఇది కేవలం యాదృచ్ఛికం కాదు. ఏప్రిల్ 22, 2025న పహల్గాంలో ఉగ్రవాదులు జరిపిన కిరాతక దాడికి ప్రతీకారంగా, పాకిస్తాన్ ప్రేరేపిత ఉగ్రవాద శిబిరాలపై భారత సైన్యం ‘ఆపరేషన్ సిందూర్’ పేరుతో మెరుపు దాడులు నిర్వహించింది. ఈ ఆపరేషన్ విజయానికి, ఉగ్రవాదంపై భారత వైఖరికి ప్రతీకగా ప్రధాని ఈ వస్త్రధారణను ఎంచుకున్నారని విశ్లేషకులు భావిస్తున్నారు. వేడుకల ఆహ్వాన పత్రికలు, అలంకరణలలో కూడా ‘ఆపరేషన్ సిందూర్’ లోగోను ప్రముఖంగా ప్రదర్శించడం ఈ ఏడాది వేడుకల ప్రత్యేకత.

చరిత్రలో మూడో ప్రధానిగా మోదీ : ఎర్రకోటపై వరుసగా 12వ సారి జాతీయ జెండాను ఎగురవేసిన ప్రధానిగా నరేంద్ర మోదీ అరుదైన రికార్డును సొంతం చేసుకున్నారు. అత్యధిక సార్లు పతాకావిష్కరణ చేసిన ప్రధానుల జాబితాలో ఆయన మూడో స్థానంలో నిలిచారు. భారత తొలి ప్రధాని పండిట్ జవహర్‌లాల్ నెహ్రూ 17 సార్లు, ఆ తర్వాత ఇందిరా గాంధీ 16 సార్లు ఈ ఘనతను అందుకున్నారు. అయితే, కాంగ్రెసేతర ప్రధానుల్లో ఈ మైలురాయిని చేరుకున్న ఏకైక నేతగా మోదీ చరిత్ర సృష్టించారు.

భద్రతా వలయంలో రాజధాని : స్వాతంత్య్ర దినోత్సవ వేడుకల సందర్భంగా దేశ రాజధాని దిల్లీలో పటిష్ఠమైన భద్రతను ఏర్పాటు చేశారు. ఎర్రకోట పరిసర ప్రాంతాల్లో సుమారు 11,000 మందికి పైగా భద్రతా సిబ్బందిని మోహరించారు. ఎత్తైన భవనాలపై స్నైపర్లు, వెయ్యికి పైగా సీసీటీవీ కెమెరాలతో నిరంతర నిఘా కొనసాగించారు. ట్రాఫిక్ నియంత్రణకు 3,000 మంది పోలీసులను వినియోగించారు. ప్రధాన రైల్వే స్టేషన్లు, బస్ టెర్మినళ్లు, మెట్రో స్టేషన్ల వద్ద భద్రతను కట్టుదిట్టం చేశారు.

ఈ వేడుకలకు వివిధ రంగాలకు చెందిన సుమారు 5,000 మంది ప్రత్యేక అతిథులు హాజరయ్యారు. వీరిలో అంతర్జాతీయ క్రీడల్లో విజేతలు, పారా గేమ్స్ స్వర్ణ పతక విజేతలు, తేనెటీగల పెంపకంలో ఉత్తమ రైతులు వంటి వారు ఉన్నారు. ‘నయా భారత్’ లోగో ఆకారంలో కూర్చున్న 2,500 మంది ఎన్.సి.సి. క్యాడెట్లు ప్రత్యేక ఆకర్షణగా నిలిచారు.