PM Modi Forgives Minor Girl : తన కుమార్తెను ప్రధాని క్షమించారన్న వార్త వినగానే ఆ బాలిక తల్లి భావోద్వేగానికి లోనయ్యారు. “ఆ రోజు ప్రధానిపై నా కుమార్తె ఉపయోగించిన పదాలు విని తల్లడిల్లిపోయాం. అంతటి మహాపరాధాన్ని దేశ ప్రధాని క్షమిస్తారని మేం కలలో కూడా ఊహించలేదు. కానీ ఆయన గొప్ప మనసుతో నా కుమార్తెను క్షమించి, ఆమెకు కొత్త జీవితాన్ని ప్రసాదించారు” అని పేర్కొన్నారు. యాదృచ్ఛికంగా ఈ రోజే తన కుమార్తె పుట్టినరోజు అని తెలుపుతూ.. దేశ ప్రధాని నరేంద్ర మోదీ తమ కుమార్తెకు ఇచ్చిన అత్యంత విలువైన బహుమతి ఈ ‘పునర్జన్మ’ అని, ఆయన రుణం ఎప్పటికీ తీర్చుకోలేమని కన్నీటిపర్యంతమయ్యారు.

‘అంతా అయిపోయిందనుకున్నా..’ : ప్రధాని సందేశం వినగానే తన కళ్లలో నీళ్లు తిరిగాయని, తాను చేసిన తప్పిదానికి తీవ్రంగా పశ్చాత్తాపపడుతున్నానని ఆ 15 ఏళ్ల విద్యార్థిని తెలిపారు. “నేను అంత పెద్ద తప్పు చేశాక నా భవిష్యత్తు, చదువు, జీవితం అంతా అయిపోయిందనే తీవ్ర నిరాశలో మునిగిపోయాను. కానీ మోదీ చూపిన ఉదారత నాకు రెండోసారి జీవించే అవకాశాన్ని ఇచ్చింది” అని ఆమె పేర్కొంది. పసి వయసులో జరిగిన పొరపాటును దిద్దుకుని, భవిష్యత్తులో మంచి పౌరురాలిగా ఎదుగుతానని భావోద్వేగంగా వెల్లడించింది.

యూట్యూబర్లు, స్వార్థపరుల మాయాజాలం: జంతర్‌మంతర్ వద్ద జరిగిన నిరసనల్లో తాను అంత ఘోరంగా మాట్లాడటానికి కొందరు వ్యక్తులు, యూట్యూబర్లు చెప్పిన రెచ్చగొట్టే మాటలే కారణమని ఆ బాలిక స్పష్టం చేసింది. రాజకీయ ప్రయోజనాలు, వ్యూస్ కోసం కొందరు వ్యక్తులు పిల్లలను పావులుగా వాడుకుంటూ, వారిని తప్పుదోవ పట్టించారని తెలిపింది. ఆవేశంలో ఆలోచన కోల్పోయి, వారి వలలో పడి ప్రధానిపైనే కాకుండా ఆయన మాతృమూర్తిపై కూడా అనుచిత వ్యాఖ్యలు చేశానని, ఆ క్షణంలో తనకు మంచి-చెడుల విచక్షణ లేకుండా పోయిందని ఆవేదన వ్యక్తం చేసింది.

“శిక్షించడం కాకుండా మార్చడమే సమాజ బాధ్యత”: ఈ వివాదం సోషల్ మీడియాలో దావానలంలా వ్యాపించిన అనంతరం, ప్రధాని నరేంద్ర మోదీ ఇన్​స్టాగ్రామ్ వేదికగా ఒక ప్రత్యేక వీడియో సందేశాన్ని పంచుకున్నారు. నిరసనల్లో పాల్గొన్న యువతీయువకులు ఆవేశంలో తప్పుదోవ పట్టారని, వారిపై కక్షసాధింపు చర్యలు తీసుకోవడం లేదా శిక్షించడం సరికాదని స్పష్టం చేశారు. పసి మనసులను సరైన దిశగా నడిపించి, వారికి నైతిక మార్గం చూపించడమే బాధ్యతాయుత సమాజం చేయాల్సిన పని అని పేర్కొంటూ, ఆ బాలికతో పాటు ఇతర యువతను కూడా మనస్ఫూర్తిగా క్షమిస్తున్నట్లు ప్రకటించారు.

క్షమించినా ఆగని బెదిరింపులు: ఆందోళనకర పరిస్థితులు : దేశ ప్రధాని ఉదారంగా క్షమించినప్పటికీ, సోషల్ మీడియాలో ఆ బాలికపై వేధింపులు ఆగకపోవడం కలకలం రేపుతోంది. గుర్తుతెలియని వ్యక్తులు, ట్రోలర్లు సోషల్ మీడియా మాధ్యమాల ద్వారా తనకు అసభ్యకర సందేశాలు పంపుతున్నారని, తీవ్ర బెదిరింపులకు గురిచేస్తున్నారని ఆ విద్యార్థిని వాపోయింది. ప్రధాని మోదీ చూపిన మార్గదర్శకత్వాన్ని పక్కనపెట్టి, కొందరు వికృత మనస్తత్వంతో ఇంకా వేధింపులకు గురిచేస్తుండటం పట్ల స్థానిక వర్గాలు ఆందోళన వ్యక్తం చేస్తున్నాయి.