PM Modi seatbelt controversy : ఒకరు అతిథి.. మరొకరు ఆతిథేయి. ఒకరు నిబంధనలు పాటిస్తే, మరొకరు పట్టించుకోలేదు. ఇటీవల భారత పర్యటనకు వచ్చిన బ్రిటన్ ప్రధాని సర్ కీర్ స్టార్మర్‌తో కలిసి, ప్రధాని నరేంద్ర మోదీ కారులో ప్రయాణిస్తున్న ఫోటో ఇప్పుడు సోషల్ మీడియాలో పెను దుమారానికి దారితీసింది. ఆ ఫోటోలో బ్రిటన్ ప్రధాని సీట్ బెల్ట్ పెట్టుకుని ఉంటే, మన ప్రధాని మాత్రం పెట్టుకోకపోవడంపై నెటిజన్లు తీవ్రస్థాయిలో విరుచుకుపడుతున్నారు. “చట్టాలు చేసేవారే వాటిని ఉల్లంఘిస్తే ఎలా?” అని వారు ప్రశ్నిస్తున్నారు.
ఇటీవల భారత్‌లో పర్యటించిన బ్రిటన్ ప్రధాని సర్ కీర్ స్టార్మర్‌తో, ప్రధాని నరేంద్ర మోదీ ముంబైలో సమావేశమయ్యారు. ఈ సందర్భంగా, ఇద్దరు ప్రధానులు కలిసి కారులో ప్రయాణిస్తున్నప్పుడు తీసిన ఫోటో ఒకటి బయటకు వచ్చింది.
ఫోటోలో ఏముంది: ఆ ఫోటోలో, బ్రిటన్ ప్రధాని కీర్ స్టార్మర్ సీట్ బెల్టు ధరించి ఉండగా, ఆయన పక్కనే కూర్చున్న ప్రధాని మోదీ మాత్రం ఎలాంటి సీట్ బెల్టు పెట్టుకోకుండా, కెమెరా వైపు చూస్తూ కనిపించారు.
నెట్టింట విమర్శల వర్షం : ఈ ఫోటో ఇంటర్నెట్‌లో వైరల్ అవ్వడంతో, నెటిజన్ల నుంచి తీవ్ర విమర్శలు వెల్లువెత్తాయి.
“రూల్స్ అందరికీ ఒకటే కదా “: “దేశ ప్రధానే రోడ్డు భద్రతా నియమాలను ఉల్లంఘించడం ఏమిటి? సామాన్యులకు జరిమానాలు వేసే చట్టాలు, పాలకులకు వర్తించవా?” అని పలువురు ప్రశ్నిస్తున్నారు.
“అతిథిని చూసి నేర్చుకోండి”: “మన దేశానికి అతిథిగా వచ్చిన బ్రిటన్ ప్రధాని మన నిబంధనలను గౌరవిస్తుంటే, మన ప్రధాని వాటిని విస్మరించడం ఎలాంటి సందేశం ఇస్తుంది?” అని కామెంట్లు పెడుతున్నారు.
“ఆదర్శంగా ఉండాల్సింది పోయి..”: “దేశాన్ని నడిపించే నాయకులే ఇలా చేస్తే, సాధారణ పౌరులు నిబంధనలను ఎలా గౌరవిస్తారు?” అంటూ నెటిజన్లు తమ అభిప్రాయాలను వ్యక్తం చేస్తున్నారు.
భారత ఆర్థిక వ్యవస్థపై స్టార్మర్ ప్రశంసలు : ఈ వివాదానికి ముందు, ప్రధాని మోదీతో భేటీ అయిన కీర్ స్టార్మర్, భారత ఆర్థిక ప్రగతిపై ప్రశంసల వర్షం కురిపించారు. జపాన్‌ను అధిగమించి భారత్ ప్రపంచంలోనే నాలుగో అతిపెద్ద ఆర్థిక వ్యవస్థగా అవతరించడాన్ని ఆయన అభినందించారు. 2028 నాటికి మూడో అతిపెద్ద ఆర్థిక వ్యవస్థగా ఎదిగే దిశగా భారత్ దూసుకెళ్తోందని స్టార్మర్ కొనియాడారు. అయితే, ఇంతటి సానుకూల వాతావరణంలో జరిగిన భేటీ తర్వాత, ఈ ‘సీట్ బెల్ట్’ వివాదం తెరపైకి రావడం గమనార్హం.
