PM RAHAT Scheme: రోడ్డు ప్రమాద బాధితులకు సత్వర చికిత్స అందించేలా కేంద్ర ప్రభుత్వం చర్యలు చేపట్టింది. ఈ మేరకు ‘పీఎం రాహత్’ పథకానికి ప్రధాని నరేంద్ర మోదీ ఆమోదం తెలిపారు. జాప్యం తలెత్తకుండా బాధితులకు సమయానికి వైద్యం అందించేలా ఈ పథకం దోహదపడనుంది.
ప్రధాని మోదీ నూతన పీఎంఓ కార్యాలయం ‘సేవా తీర్థ్’ను ప్రారంభించిన అనంతరం.. పలు పథకాలను ఆయన ఆమోదం తెలిపారు. వాటిలో భాగంగా ‘పీఎం రాహత్’ (PM RAHAT) పథకానికి ఆమోదం లభించింది. దేశవ్యాప్తంగా రోడ్డు ప్రమాదాలకు గురైన బాధితులందరికీ వర్తించేలా ఈ పథకాన్ని రూపొందించారు. ప్రమాదానికి గురైన వారికి గరిష్ఠంగా రూ. 1.5 లక్షల వరకు ఉచిత నగదు రహిత చికిత్స అందిస్తారు. ప్రమాదం జరిగినప్పటి నుంచి గరిష్ఠంగా 7 రోజుల వరకు ఈ ఉచిత వైద్య సదుపాయం అందుబాటులో ఉంటుందని కేంద్రం తెలిపింది.
రోడ్డు ప్రమాదాల్లో గాయపడిన వారికి ‘గోల్డెన్ అవర్’లో వెంటనే వైద్యం అందించాలనే సుప్రీంకోర్టు ఆదేశాలతో ఈ పథకాన్ని లాంచ్ చేశారు. ‘గోల్డెన్ అవర్’ ట్రీట్మెంట్ ద్వారా ప్రాణనష్టాన్ని నివారించడమే ప్రధాన లక్ష్యంగా పీఎం రాహత్ రూపుదిద్దుకుంది. ఇక, బాధితులను సకాలంలో ఆసుపత్రికి చేర్చి ప్రాణాలను కాపాడే వారికి రూ. 25,000 నగదు పురస్కారం కూడా అందించనున్నారు.
పీఎం రాహత్ పథకం ప్రకారం.. రోడ్డు ప్రమాద బాధితుడిని ఆస్పత్రికి తీసుకొచ్చిన వెంటనే వైద్య సదుపాయం అందించాలి. ఒకవేళ ఆ ఆస్పత్రిలో వైద్య సదుపాయాలు లేకపోతే రవాణా ఏర్పాటు చేసి మరో ఆస్పత్రికి తరలించాలి. బాధితుడు డిశ్చార్జి అయిన తర్వాత చికిత్సకి సంబంధించిన బిల్లులను ప్యాకేజీకి అనుగుణంగా పోర్టల్లో అప్లోడ్ చేయాల్సి ఉంటుంది.