Prashant Kishor’s Bihar election strategy : బిహార్ రాజకీయ చదరంగంలోకి, ఎన్నికల వ్యూహకర్త ప్రశాంత్ కిషోర్ (పీకే) ఓ సరికొత్త పావును కదిపారు. దశాబ్దాలుగా పాతుకుపోయిన కుల, మత సమీకరణాలకు సవాల్ విసురుతూ, ’60-40′ అనే నూతన ఫార్ములాను తెరపైకి తెచ్చారు. ఓ వైపు ఆర్జేడీకి స్నేహహస్తం చాస్తూనే, మరోవైపు జేడీయూ ఓటు బ్యాంకుకు గండికొట్టే ఈ భారీ స్కెచ్, రాష్ట్ర రాజకీయాల్లో పెను ప్రకంపనలు సృష్టిస్తోంది. అసలు ఏమిటీ ’60-40′ ఫార్ములా? దీని వెనుక పీకే వ్యూహమేంటి? ఇది బిహార్ రాజకీయ ముఖచిత్రాన్ని మారుస్తుందా?
‘జన్ సురాజ్’ పార్టీ కన్వీనర్‌గా పాదయాత్ర చేస్తున్న ప్రశాంత్ కిషోర్, ఇటీవల ఓ సంచలన ప్రతిపాదన చేశారు.
ఆర్జేడీకి ఆఫర్: “మాకు ముస్లిం ఓట్లు వద్దు, వారి మద్దతు కావాలి. ఆర్జేడీ ముస్లిం అభ్యర్థిని నిలబెట్టిన చోట మేం పోటీ చేయం. బదులుగా, మేం ముస్లిం అభ్యర్థిని నిలబెట్టిన చోట ఆర్జేడీ పోటీ చేయకూడదు,” అంటూ పీకే ఆర్జేడీకి ఓపెన్ ఆఫర్ ఇచ్చారు.
‘60-40′ ఫార్ములా: “40 శాతం హిందువులు, 20 శాతం ముస్లింలు.. అంటే మొత్తం 60 శాతం ప్రజలు మాతో నిలిస్తే, జన్ సురాజ్ విజయం ఖాయం,” అని ఆయన ధీమా వ్యక్తం చేశారు.
పీకే అసలు ప్లాన్ ఏంటి? ‘ఒకే దెబ్బకు రెండు పిట్టలు’
పీకే ప్రతిపాదన వెనుక ‘ఒకే దెబ్బకు రెండు పిట్టలు’ కొట్టే వ్యూహం ఉందని రాజకీయ విశ్లేషకులు భావిస్తున్నారు.
ఆర్జేడీ ఓటు బ్యాంకుకు గండి: ముస్లిం కార్డును ప్రయోగించడం ద్వారా, లాలూ ప్రసాద్ యాదవ్ సంప్రదాయ ‘ముస్లిం-యాదవ్’ (M-Y) ఓటు బ్యాంకును చీల్చాలని పీకే చూస్తున్నారు. 40 ముస్లిం స్థానాల్లో ఆర్జేడీతో ఒప్పందం కుదుర్చుకోవడం ద్వారా, మిగతా చోట్ల వారిని బలహీనపరచాలన్నది ఆయన వ్యూహం.
జేడీయూకు చెక్: అదే సమయంలో, 70 స్థానాల్లో అత్యంత వెనుకబడిన తరగతుల (EBC) అభ్యర్థులను నిలబెడతానని ప్రకటించడం ద్వారా, నితీశ్ కుమార్ ప్రధాన ఓటు బ్యాంకైన ఈబీసీలు, మహిళలను ఆకర్షించాలని చూస్తున్నారు.
ప్రత్యర్థుల కౌంటర్ : పీకే వ్యూహంపై ఆర్జేడీ, జేడీయూ, బీజేపీలు తీవ్రంగా స్పందించాయి.
ఆర్జేడీ: “పీకే బీజేపీకి ‘బి-టీమ్’. 2014లో మోదీని గెలిపించింది ఆయనే. ఆయన నిజస్వరూపం ముస్లింలకు తెలుసు,” అని ఆర్జేడీ అధికార ప్రతినిధి ఎజాజ్ అహ్మద్ కొట్టిపారేశారు.
బీజేపీ: “లాలూ కుటుంబం ‘జంగిల్ రాజ్’ను తిరిగి తీసుకురావడమే పీకే ప్రాజెక్ట్,” అని బీజేపీ విమర్శించింది.
జేడీయూ: “మైనారిటీలు అభివృద్ధిని చూశారు, వారు నీతీశ్ వెంటే ఉన్నారు. పీకేకు మద్దతివ్వరు,” అని జేడీయ్యూ స్పష్టం చేసింది.
వ్యూహం ఫలిస్తుందా..?
“అసదుద్దీన్ ఓవైసీ తర్వాత, పీకే కూడా ముస్లింలను బిహార్ రాజకీయాల్లోకి తీసుకురావడానికి ప్రయత్నిస్తున్నారు. ఆయన లక్ష్యం ఆర్జేడీ, జేడీయూల ఓటు బ్యాంకులను చీల్చి, మూడో శక్తిగా ఎదగడమే.”
– అరుణ్ పాండే, సీనియర్ జర్నలిస్ట్
పీకే ఫార్ములా సక్సెస్ అయితే, బిహార్ రాజకీయాల్లో త్రిముఖ పోటీ ఏర్పడి, ఎన్నికల ఫలితాలు అనూహ్యంగా మారే అవకాశం ఉందని విశ్లేషకులు భావిస్తున్నారు. అయితే, దశాబ్దాలుగా పాతుకుపోయిన ఓటు బ్యాంకులను చీల్చి, కొత్త సమీకరణాన్ని నిర్మించడం పీకేకు కత్తిమీద సాము లాంటిదే.
