Punjab Floods: పంజాబ్ రాష్ట్రం ప్రకృతి ప్రకోపానికి చిగురుటాకులా వణుకుతోంది. భారీ వర్షాలు, పొంగి పొర్లుతున్న నదుల కారణంగా పంజాబ్ అల్లకల్లోలంగా మారింది. ఇప్పటికే 30 మందికి పైగా ప్రాణాలు కోల్పోగా, 3.5 లక్షల మందికి పైగా నిరాశ్రయులయ్యారు. ఈ తీవ్రమైన పరిస్థితుల నేపథ్యంలో ప్రభుత్వం అప్రమత్తమైంది. విద్యార్థుల భద్రతను దృష్టిలో ఉంచుకుని అన్ని విద్యాసంస్థలకు సెప్టెంబర్ 7 వరకు సెలవులను పొడిగించింది.

ALSO READ: Body on Cot: ఆసుపత్రి వాహనం ఇవ్వకపోవడంతో మంచంపై శవాన్ని తీసుకెళ్లిన కుటుంబం

నదుల ఉగ్రరూపం

పంజాబ్‌లో వరదలకు ప్రధాన కారణం హిమాచల్ ప్రదేశ్, జమ్మూ కాశ్మీర్‌లలో కురుస్తున్న భారీ వర్షాలు. ఈ వర్షాల వల్ల సట్లెజ్, బియాస్, రావి నదులు ఉగ్రరూపం దాల్చాయి. వాటితో పాటు కాలానుగుణంగా ప్రవహించే వాగులు కూడా పొంగి పొర్లడంతో పంజాబ్‌లోని పలు ప్రాంతాలు జలదిగ్బంధంలో చిక్కుకున్నాయి. పొలాల్లోని పంటలు పూర్తిగా దెబ్బతిన్నాయి, అనేక ఇళ్లు కూలిపోయాయి. వేలాది కుటుంబాలు తమ సర్వస్వం కోల్పోయి సహాయ శిబిరాల్లో తలదాచుకుంటున్నాయి.

విద్యార్థుల రక్షణే తొలి ప్రాధాన్యత

ప్రభుత్వం తొలుత సెప్టెంబర్ 3 వరకు సెలవులను ప్రకటించింది. కానీ వరద పరిస్థితి ఇంకా మెరుగుపడకపోవడంతో, విద్యార్థుల భద్రత దృష్ట్యా ఈ సెలవులను పొడిగించాలని నిర్ణయించింది. పంజాబ్ విద్యాశాఖ మంత్రి హర్జోత్ సింగ్ బైన్స్ ఈ విషయాన్ని ఎక్స్ (గతంలో ట్విట్టర్) వేదికగా వెల్లడించారు. “ముఖ్యమంత్రి భగవంత్ సింగ్ మాన్ ఆదేశాల మేరకు, రాష్ట్రంలో వరద పరిస్థితిని బట్టి సెప్టెంబర్ 7 వరకు అన్ని ప్రభుత్వ, ప్రైవేట్ పాఠశాలలు, కళాశాలలు, విశ్వవిద్యాలయాలు, పాలిటెక్నిక్ సంస్థలు మూసివేయబడతాయి” అని ఆయన పేర్కొన్నారు. స్థానిక అధికారులు ఇచ్చే సూచనలను ప్రజలు తప్పనిసరిగా పాటించాలని ఆయన విజ్ఞప్తి చేశారు.

సహాయక చర్యలు ముమ్మరం

ప్రభుత్వం వరద ప్రభావిత ప్రాంతాల్లో సహాయక చర్యలను ముమ్మరం చేసింది. జాతీయ విపత్తు ప్రతిస్పందన దళం (NDRF), భారత సైన్యం బృందాలు సహాయక చర్యల్లో పాల్గొంటున్నాయి. చిక్కుకుపోయిన ప్రజలను సురక్షిత ప్రాంతాలకు తరలించడం, ఆహారం, తాగునీరు వంటి నిత్యావసరాలను అందించడంపై అధికారులు దృష్టి సారించారు.

ALSO READ: Sutlej River Floods: పాకిస్థాన్‌పై భారత్ మానవత్వం.. సట్లెజ్ వరద ముప్పుపై ముందస్తు హెచ్చరిక!