Ram Setu : రామసేతును జాతీయ వారసత్వ కట్టడంగా ప్రకటించాలని డిమాండ్ చేస్తూ బీజేపీ సీనియర్ నేత సుబ్రహ్మణ్యస్వామి దాఖలు చేసిన పిటిషన్‌పై సుప్రీంకోర్టు కీలక నిర్ణయం తీసుకుంది. ఈ ప్రజా ప్రయోజన వ్యాజ్యంపై విచారణ జరిపిన సర్వోన్నత న్యాయస్థానం, కేంద్ర ప్రభుత్వానికి నోటీసులు జారీ చేసింది. రామసేతు మతపరమైన, చారిత్రక ప్రాముఖ్యతను గుర్తించి, దానిని జాతీయ స్మారక చిహ్నంగా ప్రకటించాలని స్వామి తన పిటిషన్‌లో కోరారు. కేంద్ర సాంస్కృతిక మంత్రిత్వ శాఖ, భారత పురావస్తు శాఖ (ఏఎస్ఐ), తమిళనాడు ఏఎస్ఐ డైరెక్టర్‌లు ఈ నోటీసులకు సమాధానం ఇవ్వాలని కోర్టు ఆదేశించింది.
ALSO READ: Marwadi Go Back: ‘రాజకీయ లబ్ధి కోసమే మార్వాడీ గోబ్యాక్’: రాజాసింగ్
జస్టిస్ విక్రమ్ నాథ్, జస్టిస్ సందీప్ మెహతాల ధర్మాసనం ఈ విచారణను చేపట్టింది. స్వామి తరఫున సీనియర్ న్యాయవాది విభా దత్తా మఖిజా వాదనలు వినిపించారు. గతంలో కోర్టు ఆదేశాలను పాటించాలని, నిర్దిష్ట సమయంలో నిర్ణయం తీసుకోవాలని స్వామి కోరారు. రామసేతును రక్షించడానికి తగిన చర్యలు తీసుకోవాలని, దాని సాంస్కృతిక విలువను కాపాడాలని ఆయన వాదిస్తున్నారు.
గత ఏడాది జనవరిలో కూడా స్వామి ఈ అంశంపై కోర్టును ఆశ్రయించగా, ప్రభుత్వం స్పందించలేదని ఆయన ఆరోపించారు. మే 13న సాంస్కృతిక మంత్రికి మరోసారి విజ్ఞప్తి చేసినా ఫలితం లేకపోవడంతో, తాజాగా ఈ పిటిషన్ దాఖలు చేశారు. రామసేతు హిందూ సంస్కృతిలో పవిత్రమైన స్థానం కలిగి ఉందని, దాని పరిరక్షణ బాధ్యత ప్రభుత్వంపై ఉందని స్వామి పేర్కొన్నారు. ఈ కేసు రామసేతు యొక్క చారిత్రక, సాంస్కృతిక విలువలపై దేశవ్యాప్తంగా చర్చను రేకెత్తిస్తోంది.
