Amrit Udyan opening dates : ప్రకృతి ప్రేమికులకు, పూల ప్రియులకు శుభవార్త! దేశ రాజధాని ఢిల్లీ నడిబొడ్డున, రాష్ట్రపతి భవన్లో కొలువైన అద్భుత సౌందర్యరాశి, ‘అమృత్ ఉద్యాన్’ (గతంలో మొఘల్ గార్డెన్స్) ప్రజల సందర్శనార్థం మరోసారి తన ద్వారాలు తెరుచుకోనుంది. రంగురంగుల పుష్పాలు, కళ్లు చెదిరే ప్రకృతి అందాలతో అలరారే ఈ స్వర్గాన్ని వీక్షించేందుకు, రాష్ట్రపతి సచివాలయం తేదీలను ప్రకటించింది.
ప్రతి ఏటా శీతాకాలం, వసంత రుతువుల కలయికలో వికసించే ఈ ఉద్యానవనాన్ని, ప్రజల సందర్శనార్థం కొద్ది వారాల పాటు తెరుస్తారు. ఈ క్రమంలో, 2026 సంవత్సరానికి గాను, రాష్ట్రపతి సచివాలయం బుధవారం అధికారిక ప్రకటన విడుదల చేసింది.
సందర్శన వివరాలు.. గుర్తుంచుకోవాల్సినవి : ఈ ఉద్యానవనం ఫిబ్రవరి 3 నుంచి మార్చి 31, 2026 వరకు ప్రజల కోసం తెరిచి ఉంటుంది. ఉదయం 10 గంటల నుంచి సాయంత్రం 6 గంటల వరకు సందర్శించవచ్చు. (చివరి ప్రవేశం సాయంత్రం 5:15 గంటలకే). నిర్వహణ పనుల కోసం ప్రతి సోమవారం, అలాగే హోలీ పండుగ సందర్భంగా మార్చి 4న ఉద్యానవనం మూసి ఉంటుంది.
ప్రవేశం ఉచితం.. బుకింగ్ ఇలా : ఈ అందమైన ఉద్యానవనంలోకి ప్రవేశం పూర్తిగా ఉచితం.
ఆన్లైన్ బుకింగ్: రద్దీని నివారించడానికి, ముందుగానే ఆన్లైన్లో స్లాట్ బుక్ చేసుకోవడం మంచిది. దీనికోసం https://visit.rashtrapatibhavan.gov.in/ అనే అధికారిక వెబ్సైట్ను సందర్శించాలి.
వాక్-ఇన్ సందర్శకులు: ఆన్లైన్లో బుక్ చేసుకోని వారు కూడా నేరుగా రావచ్చు. ప్రవేశ ద్వారం వద్ద ఏర్పాటు చేసిన ‘సెల్ఫ్-సర్వీస్ రిజిస్ట్రేషన్ కియోస్క్’ల ద్వారా నమోదు చేసుకోవచ్చు.
చేరుకోవడం ఎలా…
ప్రవేశ ద్వారం: సందర్శకులందరికీ ప్రవేశం, నిష్క్రమణ రాష్ట్రపతి ఎస్టేట్లోని గేట్ నంబర్ 35 (నార్త్ అవెన్యూకు సమీపంలో) నుంచి మాత్రమే ఉంటుంది.
షటిల్ బస్సు సౌకర్యం: సందర్శకుల సౌకర్యార్థం, సెంట్రల్ సెక్రటేరియట్ మెట్రో స్టేషన్ నుంచి గేట్ నంబర్ 35 వరకు ప్రతి 30 నిమిషాలకు ఒక షటిల్ బస్సు సర్వీసును ఉదయం 9:30 నుంచి సాయంత్రం 6 గంటల వరకు నడుపుతారు. ‘షటిల్ సర్వీస్ ఫర్ అమృత్ ఉద్యాన్’ అనే బ్యానర్ ద్వారా ఈ బస్సులను గుర్తించవచ్చు. ఈ వసంత రుతువులో, ఢిల్లీ వెళ్లే పర్యాటకులు, స్థానికులు ఈ అద్భుతమైన పూల లోకాన్ని సందర్శించి, మధురమైన అనుభూతిని పొందవచ్చు.