దేశవ్యాప్తంగా సంచలనం సృష్టించిన ఆర్జీ కర్ ఆసుపత్రి(RG Kar Incident)ట్రైనీ డాక్టర్ హత్యాచార ఘటనలో నిందితుడు సంజయ్ రాయ్‌(Sanjay Roy)ని కోర్టు దోషిగా తేల్చిన సంగతి తెలిసిందే. రేపు(సోమవారం) నిందితుడికి కోల్‌కతా హైకోర్టు అతడికి శిక్ష విధించనుంది. ఈ నేపథ్యంలో తాజా పరిణామాలపై నిందితుడి తల్లి స్పందించారు. తన కుమారుడికి మరణశిక్ష విధించడమే సరైన చర్య అంటూ సంచలన వ్యాఖ్యలు చేశారు. తనకూ ముగ్గురు కుమార్తెలు ఉన్నారని తెలిపారు.
ట్రైనీ డాక్టర్ పట్ల తన కుమారుడు ప్రవర్తించిన తీరును ఓ తల్లిగా ఎప్పటికీ క్షమించలేనని స్పష్టంచేశారు. కుమార్తెకు ఇలాంటి దారుణమైన పరిస్థితి వస్తే తల్లి పడే వేదనను ఓ స్త్రీగా తాను అర్థం చేసుకోగలనని పేర్కొన్నారు. తన కుమారుడి చేతిలో మరణించిన యువతని కూడా తన కుమార్తెలాగే భావిస్తానన్నారు. తన కుమారుడికి మరణశిక్ష విధించినా తనకు ఎలాంటి అభ్యంతరం లేదని.. మహా అయితే కొన్ని రోజులు కన్నీళ్లు పెడతానని ఆమె చెప్పుకొచ్చారు.
