RG Kar victim’s mother denied treatment : కన్నపేగు శోకానికి కాలమే మందు అంటారు. కానీ ఆ గాయంపైనే లాఠీ దెబ్బలు పడితే? ఆ దెబ్బలకు చికిత్స అందించాల్సిన ఆసుపత్రే ముఖం చాటేస్తే..? పుండు మీద కారం చల్లినట్లు, హత్యాచారానికి గురైన తమ కుమార్తెకు న్యాయం కోసం పోరాడుతున్న ఆ తల్లిదండ్రులకు ఇప్పుడు ఇదే పరిస్థితి ఎదురైంది. పోలీసుల లాఠీఛార్జ్‌లో గాయపడిన తమను, ప్రభుత్వ ఒత్తిడితో ఆసుపత్రిలో చేర్చుకోలేదంటూ బాధితురాలి తండ్రి చేసిన ఆరోపణలు పశ్చిమ బెంగాల్ రాజకీయాల్లో పెను దుమారం రేపుతున్నాయి.
ఆసుపత్రిలో అసలేం జరిగింది : ఆర్జీ కర్ అత్యాచార బాధితురాలి తండ్రి ఆవేదన ఆయన మాటల్లోనే.. “పోలీసుల లాఠీఛార్జ్‌లో నా భార్య నుదుటిపై, చేతులకు, వీపునకు తీవ్ర గాయాలయ్యాయి. వెంటనే ఓ ఆసుపత్రికి తీసుకెళ్లి సీటీ స్కాన్ సహా అన్ని పరీక్షలు చేయించాం. ఆమెను రెండు రోజులు ఆసుపత్రిలో ఉంచి చికిత్స అందించాలని వైద్యులు చెప్పారు. కానీ, ఆయన వెళ్లిన కొద్దిసేపటికే అంతా మారిపోయింది. సిబ్బంది వైఖరిలో అకస్మాత్తుగా మార్పు వచ్చింది. రాత్రికి ఆసుపత్రిలో ఉండాల్సిన నా భార్యను, మధ్యాహ్నమే డిశ్చార్జ్ చేశారు. ఇదేంటని అడిగితే, ‘రాష్ట్ర ప్రభుత్వం నుంచి తీవ్ర ఒత్తిడి ఉంది, మేమేమీ చేయలేం’ అని వైద్యులు నిస్సహాయత వ్యక్తం చేశారు,” అంటూ ఆయన కన్నీటిపర్యంతమయ్యారు. ఈ ఆరోపణలపై స్పందించేందుకు సదరు ఆసుపత్రి వర్గాలు నిరాకరించడం గమనార్హం.
న్యాయపోరాటంపై పోలీసుల ప్రతాపం : ఆర్జీ కర్ వైద్య కళాశాల ఆవరణలో జూనియర్ వైద్యురాలిపై హత్యాచారం జరిగి ఏడాది గడిచినా, కేసులో అసలైన దోషులను పట్టుకోలేదని కుటుంబ సభ్యులు ఆరోపిస్తున్నారు. దీనికి నిరసనగా, వారు పశ్చిమ బెంగాల్ ప్రతిపక్ష నేత సువేందు అధికారితో కలిసి పార్క్ స్ట్రీట్ నుంచి సచివాలయానికి శాంతియుత ర్యాలీ చేపట్టారు. అయితే, పోలీసులు బారికేడ్లు అడ్డుపెట్టి వారిని నిలువరించారు. నిరసనకారులు బారికేడ్లను తొలగించేందుకు ప్రయత్నించడంతో ఇరువర్గాల మధ్య వాగ్వాదం చోటుచేసుకుంది. ఈ క్రమంలో పోలీసులు జరిపిన లాఠీఛార్జ్‌లో బాధితురాలి తల్లిదండ్రులకు గాయాలయ్యాయి. “న్యాయం అడిగినందుకు మా నెత్తురు కళ్లజూశారు” అంటూ బాధితురాలి తల్లి విలపించడం అక్కడివారిని కదిలించింది.
కొలిక్కిరాని కేసు.. వీడని అనుమానాలు : గతేడాది ఆగస్టు 9న ఆర్జీ కర్ ఆసుపత్రిలో జరిగిన ఈ దారుణ ఘటన దేశవ్యాప్తంగా ప్రకంపనలు సృష్టించింది. సీసీటీవీ ఫుటేజ్ ఆధారంగా సంజయ్ రాయ్ అనే వ్యక్తిని అరెస్ట్ చేయగా, కోర్టు అతనికి జీవిత ఖైదు విధించింది. అయితే, ఈ కేసులో రాజకీయ నేతల ప్రమేయం ఉందని మృతురాలి కుటుంబం మొదటి నుంచీ వాదిస్తోంది. అయితే, సీబీఐ ఆ దిశగా దర్యాప్తు చేయడం లేదని వారి ఆరోపణ. ఇప్పుడు వారిపైనే దాడి జరగడం, వైద్య సహాయం అందకుండా అడ్డుకోవడం వంటి ఘటనలు ఈ కేసులో నిజంగానే ఏదో జరుగుతోందనే అనుమానాలను పెంచుతున్నాయి.
