Misleading celebrity Advertisment : బాలీవుడ్ కండల వీరుడు సల్మాన్ ఖాన్ మరో వివాదంలో చిక్కుకున్నారు. ఆయన ప్రచారం చేసిన ఓ పాన్ మసాలా ప్రకటన ప్రజలను తప్పుదోవ పట్టించేలా ఉందంటూ రాజస్థాన్‌కు చెందిన ఓ న్యాయవాది వినియోగదారుల ఫోరంలో ఫిర్యాదు చేశారు. కేవలం ఐదు రూపాయలకే లభించే పాన్ మసాలా ప్యాకెట్‌లో, కిలో నాలుగు లక్షలు పలికే స్వచ్ఛమైన కుంకుమపువ్వు ఎలా సాధ్యమని ఆయన ప్రశ్నిస్తున్నారు. అసలు ఈ వివాదం ఏంటి? ఆ ఫిర్యాదులో ఉన్న కీలక అంశాలేమిటి?
వినియోగదారుల ఫోరంలో ఫిర్యాదు : సల్మాన్ ఖాన్ ప్రచారం చేస్తున్న పాన్ మసాలా ప్రకటనపై బీజేపీ నేత, రాజస్థాన్ హైకోర్టు న్యాయవాది ఇందర్ మోహన్ సింగ్ హనీ తీవ్ర అభ్యంతరం వ్యక్తం చేశారు. ఈ ప్రకటన పూర్తిగా అవాస్తవాలతో కూడి, ప్రజలను మోసం చేసేలా ఉందని ఆరోపిస్తూ ఆయన కోటా వినియోగదారుల కోర్టులో ఫిర్యాదు దాఖలు చేశారు.
ఫిర్యాదులో కీలక అంశాలు : ఇందర్ మోహన్ సింగ్ తన ఫిర్యాదులో ప్రధానంగా రెండు అంశాలను ప్రస్తావించారు.
కుంకుమపువ్వు అసాధ్యం: మార్కెట్‌లో కిలో నాణ్యమైన కుంకుమపువ్వు ధర సుమారు రూ.4 లక్షలు. అలాంటి అత్యంత ఖరీదైన పదార్థాన్ని, కేవలం రూ.5లకే అమ్మే పాన్ మసాలా ప్యాకెట్‌లో కలపడం అక్షరాలా అసాధ్యం. ఇది వినియోగదారులను ఆకర్షించడానికి చెబుతున్న పచ్చి అబద్ధమని, ఇది మోసం కిందకే వస్తుందని ఆయన వాదించారు.
ఆరోగ్యానికి హానికరం: పాన్ మసాలా వాడకం నోటి క్యాన్సర్‌కు దారితీసే ప్రధాన కారణాలలో ఒకటి అని ఆయన తన ఫిర్యాదులో పేర్కొన్నారు. ప్రజల ఆరోగ్యానికి హాని కలిగించే ఇలాంటి ఉత్పత్తులను, సల్మాన్ ఖాన్ వంటి ప్రముఖులు తమ పరపతిని ఉపయోగించి ప్రచారం చేయడం ద్వారా సమాజానికి తప్పుడు సందేశం పంపుతున్నారని ఆయన ఆవేదన వ్యక్తం చేశారు.
సెలబ్రిటీలు బాధ్యతాయుతంగా వ్యవహరించాలని, డబ్బు కోసం ఇలాంటి తప్పుడు ప్రకటనలలో నటించవద్దని ఆయన కోరారు. ఈ ఫిర్యాదుపై కోర్టు ఎలా స్పందిస్తుందో వేచి చూడాలి.
