Atlas of the developing brain : సృష్టిలోని అత్యంత సంక్లిష్టమైన, అద్భుతమైన నిర్మాణం మానవ మెదడు. పిండంలోని కొన్ని కణాల సముదాయం నుంచి ఆలోచనలు, భావోద్వేగాలను శాసించే మహాద్భుతంగా ఎలా మారుతుంది..? ఈ చిక్కుముడిని విప్పే దిశగా శాస్త్రలోకం ఒక చారిత్రక ముందడుగు వేసింది. మానవ మెదడు వికాసానికి తొలిసారిగా ఒక ‘అట్లాస్’ (చిత్రపటం) తొలి ముసాయిదాను రూపొందించింది. అసలేంటి ఈ అట్లాస్? ఇది వైద్య శాస్త్రంలో ఎలాంటి విప్లవాత్మక మార్పులకు నాంది పలకనుంది..?
మిస్టరీ వీడనున్న ‘మస్తిష్కం’ : అంతర్జాతీయ శాస్త్రవేత్తల బృందం సంయుక్తంగా ఈ మహత్తర కార్యానికి శ్రీకారం చుట్టింది. పిండ దశ నుంచి ప్రౌఢ దశకు చేరుకునే వరకు మెదడు ఎలా అభివృద్ధి చెందుతుందో దశలవారీగా పటం గీసే ప్రయత్నమే ఈ ‘బ్రెయిన్ అట్లాస్’. ఈ ప్రాజెక్టులో భాగంగా, మానవులతో పాటు ఇతర క్షీరదాల మెదళ్లలోని లక్షలాది కణాల పెరుగుదలను, వాటి మార్పులను శాస్త్రవేత్తలు నమోదు చేశారు. పరిశోధనలో భాగంగా, కేవలం ఎలుక మెదడులోనే 5,000కు పైగా విభిన్న రకాల కణాలను కనుగొనడం వారిని ఆశ్చర్యపరిచింది.
ఈ అట్లాస్, మెదడు సాధారణంగా ఎలా ఏర్పడుతుంది, దానిలోని వివిధ భాగాలు ఎలా సమన్వయంతో పనిచేస్తాయి అనే విషయాలపై లోతైన అవగాహనను అందిస్తుందని పరిశోధకులు తెలిపారు. “అభివృద్ధి చెందుతున్న మెదడు ఒక రహస్యమైన నిర్మాణం,” అని యూసీఎల్‌ఏ (UCLA) న్యూరో సైంటిస్ట్ అపర్ణా బహదూరి వ్యాఖ్యానించారు. ఈ అట్లాస్ ఆ రహస్య పొరలను ఛేదించడంలో సహాయపడుతుందని ఆమె అన్నారు.
రుగ్మతల నిర్ధారణలో కీలక ముందడుగు : ఈ ఆవిష్కరణ ముఖ్య ఉద్దేశ్యం కేవలం మెదడు నిర్మాణం తెలుసుకోవడం మాత్రమే కాదు. ఆటిజం, స్కిజోఫ్రెనియా వంటి ఎన్నో రకాల మానసిక, నాడీ సంబంధిత రుగ్మతలకు మూల కారణాలను అన్వేషించడానికి ఇది ఒక దిక్సూచిలా పనిచేయనుంది. మెదడు అభివృద్ధిలో ఏ దశలో, ఏ కణాలలో లోపాలు తలెత్తుతున్నాయో గుర్తించడం ద్వారా, భవిష్యత్తులో మెరుగైన చికిత్సా విధానాలను రూపొందించడానికి ఈ అట్లాస్ మార్గం సుగమం చేస్తుందని శాస్త్రవేత్తలు ప్రగాఢ విశ్వాసం వ్యక్తం చేస్తున్నారు.
